Friday, March 29, 2024

ၸဝ်ႈသြႃႇလၢႆး  ၵေႃပွင်ၵၢၼ်သင်ႇၶႃႇၸႄႈမိူင်းတႆး ၶဝ်ႈသူၼ်မၢၵ်ႇႁၢၵ်ႈၶမ်း

Must read

ၸဝ်ႈသြႃႇၽတ်ႉတၼ်တ ဝၸီရၺႃၼ ၽူႈၶဝ်ႈၸုမ်းၵေႃပွင်ၵၢၼ်သင်ႇၶႃႇ ၸႄႈမိူင်း တႆး ၶဝ်ႈသူၼ်မၢၵ်ႇႁၢၵ်ႈၶမ်း  ၽွင်း ဢႃယုလႆႈ 81 ပီ ဝႃႇသႃ 61 ဝႃႇ ဝႃႈၼႆ။

Photo: ၸဝ်ႈသြႃႇၽတ်ႉတၼ်တဝၸီရၺႃၼ (ႁွင်ႉ) ၸဝ်ႈသြႃႇလၢႆး

မိူဝ်ႈဝၼ်းတီႈ 27/8/2022 ယၢမ်းၵၢင်ၶိုၼ်း 12:50 မိၼိတ်ႉ  ၸဝ်ႈသြႃႇၽတ်ႉတၼ်တဝၸီရၺႃၼ (ႁွင်ႉ) ၸဝ်ႈသြႃႇလၢႆး  ၶဝ်ႈသူၼ်မၢၵ်ႇႁၢၵ်ႈၶမ်း  တီႈဝၢၼ်ႈလူင်ႁွင်ႈလိုၵ်ႉ ၸႄႈဝဵင်းတႃႈၶီႈလဵၵ်း လႅၼ်လိၼ်တႆး – ထႆး ၸိုင်ႈတႆးပွတ်းဢွၵ်ႇၶူင်း လူၺ်ႈတၢင်းပဵၼ်ၵူၼ်းထဝ်ႈ ။

- Subscription -

ၸၢႆးသႅင် ႁွၼ်ၼမ်ႉသၢႆ လုၵ်ႈၼွင်ႉတပႄး ၸဝ်ႈသြႃႇၽတ်ႉတၼ်တဝၸီရၺႃၼ (ၸဝ်ႈသြႃႇလၢႆး) လၢတ်ႈတီႈၽူႈတွႆႇ ႁွၵ်ႈဝႃႈ – “ၸဝ်ႈသြႃႇႁဝ်း လႆႈလွၼ်ႇၵႂႃႇ ယွၼ်ႉတၢင်းပဵၼ်ၵူၼ်းထဝ်ႈ။ တီႈဝတ်ႉ လူင်ႁွင်ႈလိုၵ်ႉ။ ၸဝ်ႈႁဝ်း ဢမ်ႇယူႇလီ လႆႈၶိုၼ်ႈ ႁူင်းယႃ မွၵ်ႈလိူၼ်ၼိုင်ႈသေ လူင်းႁူင်းယႃမႃးတၼ်းလႆႈ 4 ဝၼ်းၵေႃႈ လႆႈလွၼ်ႇၵႂႃႇၶႃႈယဝ်ႉ”- ဝႃႈၼႆ။

ယၢမ်းလဵဝ် ၶၢပ်ႈတူဝ် ၸဝ်ႈသြႃႇၽတ်ႉ တၼ်တဝၸီရၺႃၼ (ၸဝ်ႈသြႃႇလၢႆး) ၼႆႉ ဝႆႉတီႈဝတ်ႉဝၢၼ်ႈလူင်ႁွင်ႈလိုၵ်ႉ တႃႇၶၢဝ်း တၢင်း 100 ဝၼ်းသေ ပေႃးထိုင်မႃး ဝၼ်းတီႈ 5/12/2022  ၸင်ႇပူၼ်ႉၶၢပ်ႈတူဝ်သၢင်းၵဵဝ်ႇၵႂႃႇ ၼႆယဝ်ႉ။

ၸဝ်ႈသြႃႇၽတ်ႉတၼ်တ ဝၸီရၺႃၼ (ႁွင်ႉ) ၸဝ်ႈသြႃႇလၢႆးၼႆႉ ၵိူတ်ႇမိူဝ်ႈ 18/2/1941 လိူၼ် 4 မႂ်ႇ 5 ၶမ်ႈ ဝၼ်းပုတ်ႉ ပီ 1303 ၼီႈ ၸႃတိ ဝၢၼ်ႈၵဵင်းလဵၵ်း ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ။ ပဵၼ်လုၵ်ႈၸၢႆး ပေႃႈၸၢင်းၼွႆႉ – မႄႈၸၢင်း ၼၢင်းၺုၼ်ႉ (ပဵၼ်လုၵ်ႈၵဵပ်း) မီးပီႈၼွင်ႉ 5 ၵေႃႉ ၸဝ်ႈပဵၼ်ၵေႃႉထူၼ်ႈ 3 ဝႃႈၼႆ။

ၸဝ်ႈသြႃႇၽတ်ႉတၼ်တဝၸီရၺႃၼၼႆႉ ၵမ်ႈၼမ် ၵူၼ်းမိူင်း/ တၵ်ႉၵႃႇတေႁူႉၸၵ်း ႁွင်ႉဝႃႈ ၸဝ်ႈသြႃႇလၢႆး ။ ၸဝ်ႈပဵၼ် ၽူႈၶဝ်ႈၸုမ်းပွင်ၵၢၼ်သင်ႇၶႃႇၸႄႈမိူင်းတႆး ။ ၸဝ်ႈၼႆႉ ပဵၼ်ၽူႈဢွၼ်တူင်ႉၼိုင် ပၢင်သွၼ်လိၵ်ႈလၢႆး ၾိင်ႈ ငႄႈၾိင်ႈထုင်း ၵေႃႉႁႅၵ်ႈ ၼႂ်းမိူင်းတႆးပွတ်းဢွၵ်ႇၶူင်း။    ပဵၼ်ပႃးၽူႈဢွၼ်တူင်ႉၼိုင် ၼႂ်းၸုမ်းပရႁိတ ၊  ဢမ်ႇ ဝႃႈ ၽႃႇသႃႇ၊ သႃႇသၼႃႇလႂ်ၵေႃႈၶဝ်ႈပႃး ၸွႆႈထႅမ် ။   ၸဝ်ႈပဵၼ် ၽူႈဢွၼ်တူင်ႉၼိုင် ၸွႆႈထႅမ်ဢဝ်သင်ၶၸဝ်ႈသူင်ႇ ၵႂႃႇႁဵၼ်းလိၵ်ႈတၢင်း မိူင်းမၢၼ်ႈ ၸိူဝ်းၼႆႉ  ၸၢႆးသႅင် ႁွၼ်ၼမ်ႉသၢႆလၢတ်ႈ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း