ၵႃး Light Truck လႄႈရူတ်ႉလူင် 22 ၼိမ်း ၽႃႇၵၼ်တီႈ ၸႄႈဝဵင်း ပၢင်ႇဢူႈလူင်( ပျိၼ်ႇဢူးလုၼ်ႇ) တိူင်းတႃႈလိူဝ်ႇ၊ တၢႆ 8 ၵေႃႉ။
မိူဝ်ႈဝႃး 28/8/2022 ယၢမ်းၵၢင်ၶမ်ႈ 7 မူင်း ၵႃး Light Truck တၢင်ႇၵူၼ်းလႄႈ ရူတ်ႉလူင် 22 ၼိမ်း တၢင်ႇထူင်လိၼ်ပုၼ် ၽိလပ်ႉမျေႇ ၽႃႇၵၼ်တီႈႁိမ်းပႃႇပႅၵ်ႇ သဵၼ်ႈတၢင်းဝႄႈဝဵင်း။ ၵႃး Light Truck ၼၼ်ႉတၢင်ႇၵူၼ်းမႃး 14 ၵေႃႉ ၽူႈၸၢႆး 8 ၵေႃႉလႄႈၽူႈယိင်း 6 ၵေႃႉ။ ၼႂ်းၼၼ်ႉတၢႆပႅတ်ႈ 8 ၵေႃႉ ပဵၼ်ၽူႈၸၢႆး 5 ၵေႃႉၽူႈယိင်း 3 ၵေႃႉ။
ၽူႈၸၢႆး 3 ၵေႃႉလႄႈ ၽူႈယိင်း 3 ၵေႃႉသမ်ႉမၢတ်ႇၸဵပ်းႁၢဝ်ႈႁႅင် ၸုမ်းၸွႆႈထႅမ် သၼ်ႇတိသုၶ ဢဝ်တူဝ်မၢတ်ႇၸဵပ်းလႄႈတူဝ်တၢႆ သူင်ႇဝႆႉတီႈႁူင်းယႃပၢင်ႇဢူႈလူင်ဝႆႉယဝ်ႉ။
