ပၢင်ဢုပ်ႇၶႆႈ ပိုၼ်ႉႁူႉပၢႆးႁၼ် ဢၼ်ၸတ်းႁဵတ်းၵႂႃႇတီႈပၢင်လူင်ၼႆႉ ၸဝ်ႈၽူႈလူင်ႉလႅၼ်ႇလိၵ်ႈလၢႆးပၢႆပေႇတႆး တိုၵ်းသူၼ်းထိုင်ၵူၼ်းၼုမ်ႇ ႁႂ်ႈမေႃႁၵ်ႉသႃ ဢဝ်ပုၼ်ႈၽွၼ်း လိၵ်ႈလၢႆးလႄႈ ၾိင်ႈငႄႈႁိတ်ႈႁွႆး တူဝ်ၵဝ်ႇသေ သိုပ်ႇပိုၼ်ၽႄၵႂႃႇထႅင်ႈ ဝႃႈၼႆ။
ဝၼ်းတီႈ 20/03/2018 ယၢမ်းၵၢင်ၼႂ် 9 မူင်း ထိုင် 1 မူင်းဝၢႆးဝၼ်း ယူႇတီႈၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်း ပၢင်လူင် လႆႈဢွၼ်ႁူဝ် ၼမ်းၼႃႈသေ ၸတ်းႁဵတ်းပၢင်ဢုပ်ႇၶႆႈ ပိုၼ်ႉႁူႉပၢႆးႁၼ် လိၵ်ႈလၢႆးပၢႆပေႇ ၾိင်ႈႁိတ်ႈႁွႆးတႆး တီႈႁူင်းႁေႃ ၵေႃလိၵ်ႈလၢႆး ၸႄႈဝဵင်းပၢင်လူင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။
ၶူးႁိုၼ်း ၵႃယၢင်း လၢတ်ႈဝႃႈ “ မိူဝ်းၼႃႈၼႆႉ ၵူၼ်းၼုမ်ႇၶဝ် မီးပုၼ်ႈၽွၼ်းႁႃႉ ဢမ်ႇမီးႁႃႉ ဢၼ်ဝႃႈၼၼ်ႉ မၼ်းယူႇ တီႈၸႂ်ႁပ်ႉႁူႉႁႃႉ၊ ဢမ်ႇႁူႉႁႃႉၼႆၵူၺ်း။ ပေႃးမီး ၸႂ်ႁူႉပုၼ်ႈၽွၼ်းယဝ်ႉသမ်ႉ တေႁဵတ်းႁိုဝ်ႁၢပ်ႇႁၢမ်။ ၼင်ႇႁိုဝ် ၵူၼ်းၼုမ်ႇတေႁူႉၵႂၢင်ႈၶႂၢင်လိူဝ်ၼၼ်ႉထႅင်ႈသေ ၸင်ႇလႆႈမႃးတၢၼ်ႈၶႆႈ” ဝႃႈၼႆ။
ၶူးႁိုၼ်း သိုပ်ႇလၢတ်ႈဝႃႈ ၵူၼ်းၼုမ်ႇၼႆႉ တေပဵၼ်ၽူႈဢွၼ်ႁူဝ် ၽွင်းငမ်းဝၢၼ်ႈမိူင်းၵႂႃႇ ဝၼ်းမိူဝ်းၼႃႈ။ ယွၼ်ႉၼၼ် ထုၵ်ႇလႆႈမီးတင်းႁူႉ ပၺ်ၺႃ၊ လူဝ်ႇမီးၼမ်ႉၵတ်ႉ မေႃထတ်းသၢင်ႈ မေႃတႅပ်းတတ်း လႄႈ ပၢႆးဝူၼ်ႉလီ။ ၼင်ႇႁိုဝ် ပေႃး တေမီးတင်းႁူႉၼမ် တင်းႁၼ်ၵႂၢင်ႈၼၼ်ႉ ၵူၼ်းၼုမ်ႇႁဝ်းၶႃႈ လူဝ်ႇၶတ်းၸႂ်ႁႃတၢင်းႁူႉၼမ်ၼမ်။ ယွၼ်ႉၼၼ်ႉလႄႈ ၸင်ႇလႆႈဢုပ်ႇၶႆႈတိုၵ်းသူၼ်းပၼ်ႁႅင်းၵူၼ်းၼုမ်ႇၵႂႃႇ” ဝႃႈၼႆ။
လုင်းသုၼ်ယုၵ်ႉ ႁူဝ်ပဝ်ႈၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းပၢင်လူင် မွၵ်ႇလၢတ်ႈဝႃႈ “ ၼင်ႇႁိုဝ် လိၵ်ႈလၢႆးလႄႈ ၾိင်ႈႁိတ်ႈႁွႆး ပေႃးတေႁိူဝ်ႈႁိူင်းၵႂႃႇဝၼ်းတႃမိူဝ်းၼႃႈၼၼ်ႉ မၼ်းယူႇတီႈၵူၼ်းၼုမ်ႇသႅၼ်းႁုၼ်ႈမႂ်ႇၶဝ်ယဝ်ႉ။ ယိူင်းဢၢၼ်းလႆႈၸတ်းႁဵတ်းပၢင်ဢုပ်ႇၶႆႈၼႆႉ ၼင်ႇႁိုဝ်ၵူၼ်းၼုမ်ႇၶဝ် ပေႃးတေမေႃႁၵ်ႉသႃပႂ်ႉပႃး လိၵ်ႈလၢႆးႁဝ်း သေဢမ်ႇၵႃး ၼင်ႇႁိုဝ် ပေႃးတေမီးတင်းႁူႉၼမ်မႃးထႅင်ႈ” ဝႃႈၼႆ။
ပၢင်တၢၼ်ႈၶႆႈ တီႈဝဵင်းပၢင်လူင်ၼႆႉ မီးၽူႈလူင်ႉလႅၼ်ႇ လိၵ်ႈလၢႆးပၢႆပေႇတႆး မိူၼ်ၼင်ႇ ၶူးႁိုၼ်း ၵႃယၢင်း တင်း ၸရေးၵေႃႇမိူင်း ၶဝ်မႃးဢုပ်ႇၶႆႈၼႄ။ ယူႇတီႈ ၸရေးၵေႃႇမိူင်းသမ်ႉ ဢုပ်ႇၶႆႈၼႄပၼ် ၼင်ႇႁိုဝ် လိၵ်ႈလၢႆးၾိင်ႈႁိၵ်ႈႁွႆး ပေႃးတေဢမ်ႇၸူမ်ႁၢႆ ပဵၼ်ပုၼ်ႈၽွၼ်းၵူၼ်းၼုမ်ႇ လူဝ်ႇမေႃႁၵ်ႉသႃပႂ်ႉပႃးၵႂႃႇ ဝႃႈၼႆ။
ပၢင်ဢုပ်ႇၶႆႈၼႆႉ မီးၽူႈယႂ်ႇၵူၼ်းလူင် ၼႂ်းဝၢၼ်ႈၼႂ်းပွၵ်ႉလႄႈ ၵူၼ်းမိူင်းၼႂ်းပိုၼ်ႉတီႈ ၶဝ်ႈႁူမ်ႈ တင်းၼမ်လၢႆ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ