မိူဝ်ႈၼႆႉ ဝၼ်းတီႈ 8/8/2022 ယၢမ်းၵၢင်ၼႂ် ၼမ်ႉသၢႆလူၼ်ႉၾင်ႇ ၼမ်ႉႁွင်ႈလၢႆႇၼႂ်းဝဵင်းတႃႈၶီႈလဵၵ်း လူၼ်ႉလႆၶဝ်ႈၼႂ်းပွၵ်ႉၼႂ်းဝဵင်း ထူမ်ႈႁၢဝ်ႈႁႅင်း ၼႂ်းဝဵင်းတႃႈၶီႈလဵၵ်း လႅၼ်လိၼ်တႆး – ထႆး ၸိုင်ႈတႆး ပွတ်းဢွၵ်ႇၶူင်း  ။  

ၵူၼ်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ၶမ်ႈဝႃးၾူၼ်တူၵ်းႁႅင်းတင်းၶိုၼ်းဢေႃႈ။ တေႃႇထိုင် မိူဝ်ႈ လဵဝ်ၾူၼ်တိုၵ်ႉတူၵ်းယူႇ။ ၼမ်ႉၾူၼ်ၼမ်ႉႁူၺ်ႈ/လွႆ လႆလူင်းၼမ်ႉသၢႆ။ ၼမ်ႉသၢႆလူၼ်ႉၾင်ႇ ၼွင်းၶဝ်ႈ ဝဵင်း ၊ လၢႆႇၼမ်ႉ တေႃႈၼမ်ႉၼႂ်းဝဵင်းသမ်ႉတၼ်လႄႈ ၼမ်ႉလူၼ်ႉဢွၵ်ႇတေႃႈၼမ်ႉမႃးသေထူမ်ႈ ၸွမ်းၵၢင် ဝဵင်းပွၵ်ႉသၼ်သၢႆး ပွၵ်ႉပႃႇလႅင် တီႈၶူင်ႈတီႈယၢၼ်းလႄႈ ၸွမ်းၵၢတ်ႇတႃႈလေႃႉ ၸိူဝ်းၼႆႉထႅင်ႈ”- ဝႃႈၼႆ။

  ၼမ်ႉလုပ်ႈပွၵ်ႈၼႆႉ ၶႆႈဝႃႈလုပ်ႇႁႅင်းလိူဝ်တၢင်ႇပွၵ်ႈၸိူဝ်းပူၼ်ႉမႃး။  တုမ်ႉတိူဝ်ႉႁိူၼ်းယေးၵူၼ်း ဝၢၼ်ႈလူႉသုမ်းၼမ်။

“ ပေႃးဝႃႈပဵၼ်ႁိူၼ်း ၸၼ်ႉလဵဝ်တႄႉ ၼမ်ႉလႆၶဝ်ႈၼမ်ဝႃႈ ၼမ်ယဝ်ႉ။ ႁွင်ႈၼမ်ႉလၢႆႇ ၸွမ်းၶၢင်ႈတၢင်း ၸိူဝ်းၼၼ်ႉၵေႃႈ ၵႅပ်ႈ၊ တၼ် မၢင်တီႈ ဢမ်ႇမီးယဝ်ႉ။ ၵွပ်ႈၼႆလႄႈ ၼမ်ႉၼႆႉ ၸင်ႇလႆႈ ထူမ်ႈ။ ပွၵ်ႈၼႆႉ တေလႆႈဝႃႈ ထူမ်ႈႁႅင်းလိူဝ်ၵူႈပွၵ်ႈ”- ၵူၼ်းတႃႈၶီႈလဵၵ်း သိုပ်ႇလၢတ်ႈၼႄၼင်ႇၼႆ။

မိူဝ်ႈၵၢင်လိူၼ်ၵျူႊလၢႆႊ ပူၼ်ႉမႃးၼႆႉၵေႃႈ ၾူၼ်တူၵ်းႁႅင်း  ၼမ်ႉသၢႆ လူၼ်ႉၾင်ႇလုပ်ႇထူမ်ႈ ၸွမ်းၼႂ်းၵၢတ်ႇတႃႈလေႃႉယဝ်ႉၵမ်းၼိုင်ႈ။

 မိူဝ်ႈၽွင်းၶၢဝ်းႁႅင်ႈၼၼ်ႉ ၸဝ်ႈသူၼ်ႁႆႈၼႃး တၢင်းၾင်ႇမိူင်းထႆး လႄႈ ၾင်ႇ မိူင်းတႆး တႃႈၶီႈလဵၵ်း ၵႆႉႁိမ်ၼမ်ႉသၢႆ  တႃႇ ၽုၵ်ႇသွမ်ႈ ။  ယၢမ်ႈပဵၼ်ပၼ်ႁႃယႂ်ႇ ထိုင်ၶၵ်ႉတွၼ်ႈၸမ်တေပေႃႉထုပ်ႉၵၼ်။  ယၢမ်းလဵဝ် ထိုင်ၶၢဝ်းၾူၼ် ၼမ်ႉလႆထူမ်ႈ ဝၢၼ်ႈထူမ်ႈဝဵင်းၸိူင်ႉၼႆ ႁၢဝ်ႈ ႁႅင်း ယူႇတီႈၾၢႆႇလိူမ်ႈလႆႇ ၽူႈမီးပုၼ်ႈၽွၼ်း တင်းသွင်ၾင်ႇၸိုင်ႈမိူင်း  ဢမ်ႇသႂ်ႇၸႂ်ၵႄႈလိတ်ႈႁဵတ်းသင်ပၼ် ၸဝ်ႈၼႃး တႃႈ ၶီႈလဵၵ်းလၢတ်ႈ။