တၵ်ႉၵႃႇသတ်ႉထႃး တီႈၸမ်/ ၵႆ ဢွၼ်ၵၼ် ယုၵ်ႉတူဝ်ယေႃးၶိင်း သူႇႁွတ်ႈတဝ်ႈထိုင် တီႈထမ်ႈမိူင်းၵႅတ်ႇ ၵိုၼ်းၶွၼ်ႈ ပႂ်ႉဝႆႉသႃႁပ်ႉတွၼ်ႈ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ဢတိတ်ႉထၢၼ်ႇၽႃႇဝၼႃႇ ဢွင်ႇ ဢွၵ်ႇထမ်ႈ  ။

တႄႇဢဝ်ႁၢင်လိူၼ်ၵျုႊလၢႆႊၼႆႉမႃး ရူတ်ႉၵႃး လုၵ်ႉတၢင်းၸႄႈဝဵင်းမိူင်းပဵင်း မုင်ႈၸူး တၢင်းဢိူင်ႇမိူင်းၵႅတ်ႇ ၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်းၼႆႉ ၼိုင်ႈဝၼ်းလႂ် ရူတ်ႉၵႃးၵႂႃႇ ဢမ်ႇယွမ်း 200-300 လမ်း တႃႇၵႂႃႇပႂ်ႉႁပ်ႉတွၼ်ႈ ၸဝ်ႈသိလ်ထမ်း ၶူး ဝႃးဝုၼ်းၸုမ်ႉ တီႈထမ်ႈ မိူင်းၵႅတ်ႇ ၼႆယဝ်ႉ။

ၵူၼ်းမိူင်းပဵင်း လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈႁူဝ်လိူၼ်ၼႆႉ ၼိုင်ႈဝၼ်းလႂ် ရူတ်ႉၵႃး လုၵ်ႉမိူင်းပဵင်းမႃး မိူင်းၵႅတ်ႇ ဢမ်ႇယွမ်း 50-60 လမ်း။ ႁၢင်လိူၼ်ၼႆႉ မႃးၼိုင်ႈဝၼ်းလႂ် ဢမ်ႇယွမ်း 200 -300 လမ်း။ ယွၼ်ႉတၢင်းမိူင်းပဵင်းၼႆႉ ပဵၼ်တၢင်းၸူႉလႄႈ လုၵ်ႉတၢင်း ပွၵ်းဢွၵ်ႇၶူင်းမႃးၵေႃႈလႆႈ တၢင်းပွတ်းၸၢၼ်း ပွတ်းႁွင်ႇမႃးၵေႃႈလႆႈ ၵွပ်ႈၼႆ သၢႆသဵၼ်ႈတၢင်းၼႆႉ ရူတ်ႉၵႃးမႃးၼမ်။ တၢင်းသဵၼ်ႈတၢင်းမိူင်းသၢတ်ႇၵေႃႈ မႃးၼမ် မိူၼ်ၵၼ်ၶႃႈ။ ယၢမ်းလဵဝ် တီႈထမ်ႈမိူင်းၵႅတ်ႇတႄႉ ၵူၼ်းပေႃးၵိုၼ်းၶွၼ်ႈၼမ်ဝႆႉ ယဝ်ႉၶႃႈ”- ဝႃႈၼႆ။

ၵူၼ်းဝၢၼ်ႈၵူၼ်းမိူင်း ယုမ်ႇယမ်ၼပ်ႉယမ်ဝႆႈသႃပႃႇရမီႇၸဝ်ႈလႄႈ ၵႆထၢၼ်ႇလႂ်ၵေႃႈဢွၼ်ၵၼ် ၶတ်းၸႂ်မႃးပႂ်ႉႁပ်ႉတွၼ်ႈ၊ မၢင်ဝဵင်း မၢင်ဝၢၼ်ႈ ဝၢၼ်ႈဝဵင်းသမ်ႉပေႃးယဵၼ် ဝႃႈၼႆ။

ၵူၼ်းၼမ်ႉၸၢင် လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တၢင်းပၢင်ႇလႅင်း၊ ၼမ်ႉၸၢင်ၼႆႉ  ၵႂႃႇ ၼမ်ၼႃႇၶႃႇယဝ်ႉ။ ဝၢၼ်ႈပေႃးယဵၼ်လူင်ဝႆႉၶႃႈဢေႃႈ။ ႁဝ်းၶႃႈ ၵေႃႈတေၵႂႃႇမိူဝ်ႈၽုၵ်ႈၶႃႈ”- ဝႃႈၼႆ။

လိူဝ်ၼၼ်ႉ တၢင်းၸႄႈဝဵင်းတၢင်ႉယၢၼ်းၵေႃႈ မိူၼ်ၵၼ် ၵူၼ်းပိုၼ်ႉတီႈ ဢွၼ်ၵၼ်ၵႂႃႇၶဝ်ႈႁူမ်ႈပႂ်ႉႁပ်ႉတွၼ်ႈတၢင်းၼမ် ၸွမ်းမူႇ ဝၢၼ်ႈ ၼႂ်းဝဵင်း ၸိူဝ်းၼႆႉ ၵူၼ်းပေႃးယဵၼ်လူင်ဝႆႉ ၵူၼ်းတၢင်ႉယၢၼ်းလၢတ်ႈ။

  သင်ၶၸဝ်ႈ တီႈၸမ်/ ၵႆ ၸိူဝ်းတေၶဝ်ႈႁူမ်ႈပႂ်ႉႁပ်ႉတွၼ်ႈ ၸဝ်ႈသိလ်ထမ်း ၶူးဝႃး ဝုၼ်းၸုမ်ႉၼၼ်ႉ ႁႂ်ႈဢွၼ်ၵၼ် ႁွတ်ႈထိုင် တီႈထမ်ႈမိူင်းၵႅတ်ႇ  ဝၼ်းတီႈ 29/7/2022 ဝႃႈၼႆဝႆႉ။  

ပေႃးထိုင်မႃး ဝၼ်းတီႈ 1/8/2022 ယၢမ်းၵၢင်ၼႂ် 7 မူင်း သင်ၶၸဝ်ႈ 33 တူၼ်၊ တၵ်ႉၵႃႇလုၵ်ႈသိတ်ႇတပႄး 23 ၵေႃႉ လႄႈ ၽူႈယႂ်ႇၵူၼ်းလူင်ၸၢဝ်းမၢၼ်ႈ   9 ၵေႃႉ တေႁူမ်ႈၵၼ်သေ ၶိုၼ်ႈမိူဝ်းပၢင်း ၸဝ်ႈသိလ်ထမ်း ၶူးဝႃးဝုၼ်းၸုမ်ႉ တီႈထမ်ႈမိူင်း ၵႅတ်ႇ ဢိူင်ႇမိူင်းၵႅတ်ႇ ၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း ၸွမ်းၼင်ႇၸဝ်ႈဢတိတ်ႉထၢၼ်ႇ ၶွပ်ႈတဵမ် 3 ပီ 3 လိူၼ် ပၢႆ 3 ဝၼ်း။