မိူဝ်ႈၼႆႉ ဝၼ်းတီႈ 25/7/2022 ယၢမ်းဝၢႆးဝၼ်းမွၵ်ႈ 4 မူင်း ဢွၼ်ႇၸၢႆးဢႃယု 4 ၶူပ်ႇ ဢၼ်ၺႃးၸၢၵ်ႇမၢၵ်ႇလူင် ဢၼ်သိုၵ်းမၢၼ်ႈယိုဝ်းမိူဝ်ႈၼႆႉ ၵၢင်ၼႂ် 7 မူင်းၼၼ်ႉ လႆႈလူႉသဵင်ႈၵႂႃႇ တီႈႁူင်းယႃလူင် ဝဵင်းလႃႈသဵဝ်ႈယဝ်ႉ။
ၵူၼ်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈလုၵ်ႈဢွၼ်ႇၼႆႉ တၢႆၵႂႃႇ တီႈႁူင်းယႃဝဵင်းလႃႈသဵဝ်ႈ မိူဝ်ႈၵႆႈ ဝၢႆးဝၼ်းမွၵ်ႈ 4 မူင်းၼႆႉယဝ်ႉ။ သိုၵ်းမၢၼ်ႈယိုဝ်းမၢၵ်ႇလူင်ၶဝ်ႈဝၢၼ်ႈ။ ၸၢၵ်ႇမၢၵ်ႇၼႆႉ တိူဝ်ႉသႂ်ႇ တီႈၵွၵ်းႁူဝ်မၼ်း ။ ဢမ်ႇထုၵ်ႇလီပဵၼ်သေဢိတ်း လုၵ်ႈဢွၼ်ႇဢမ်ႇမီးတၢင်းၽိတ်းသင်သေ လႆႈလူႉတၢႆၵႂႃႇၸိူင်ႉၼႆႉ”- ဝႃႈၼႆ။
တူဝ်တၢႆလုၵ်ႈဢွၼ်ႇၼၼ်ႉ ပူၼ်ႉၶၢပ်ႈတူဝ်ပၼ်ၵႂႃႇယဝ်ႉတူဝ်ႈလီငၢမ်း ယၢမ်းႁူဝ်ၶမ်ႈၼႆႉ တီႈႁူင်းယႃလႃႈသဵဝ်ႈ လႆႈႁူႉၼင်ႇၼႆ။
ပိူင်ပဵၼ်ၼႆႉ မိူဝ်ႈၼႆႉ ယၢမ်းၵၢင်ၼႂ် မွၵ်ႈ 7 မူင်း သိုၵ်းမၢၼ်ႈတင်း သိုၵ်းၶၢင် KIA ပဵၼ် ပၢင်တိုၵ်းၵၼ်ႁၢဝ်ႈႁႅင်း ၼႂ်းၵႄႈမၢၼ်ႈ ၼွင်တင်း ၼမ်ႉပႃၶီး ႁိမ်းလွႆသၢမ်သိပ်း ၸႄႈဝဵင်းၵူတ်ႉၶၢႆ ။ သိုၵ်းမၢၼ်ႈယိုဝ်းၵွင်ႈ လူင်တူၵ်းတႅၵ်ႇၼႂ်းဝၢၼ်ႈ။ ၸၢၵ်ႇမၢၵ်ႇသဵၼ်တိူဝ်ႉသႂ်ႇ တီႈၵွၵ်းႁူဝ် ဢွၼ်ႇၸၢႆး ဢႃယု 4 ၶူပ်ႇ မိူဝ်ႈၽွင်း ၵေႃႉပဵၼ်မႄႈဢုမ်ႈႁွပ်ႈဝႆႉ ၼႂ်းမိုဝ်း မူၵ်းသွၼ်ႈဝႆႉၼႂ်းႁိူၼ်းၼၼ်ႉ။
ဢွၼ်ႇၸၢႆး ဢႃယု 4 ၶူပ်ႇၼႆႉ ပဵၼ်လုၵ်ႈၸၢႆး ဢူးယီႇၼီႇ (ႁွင်ႉ) လွႆၶမ်းလႄႈ တေႃႇဢေးတုၼ်ႇ ၸၢဝ်းၶၢင် ပဵၼ်ၵူၼ်းမၢၼ်ႈ ၼွင် ။
