ၽူႈလၵ်ႉၸၵ်ႉၶုတ်ႈ လိူင်ႇၼမ် ၼႂ်းဝဵင်းၼွင်ၶဵဝ် သၢႆၾႆးၵေႃႈ ဢမ်ႇဝႆႉ လၵ်ႉၵႅတ်းဢဝ်ၵႂႃႇၶၢႆ ပလိၵ်ႈ/သိုၵ်းမၢၼ်ႈ ဢမ်ႇဢဝ်လိူင်ႈ ဢမ်ႇတီႉၺွပ်းႁဵတ်းသင်ပၼ်။

မိူဝ်ႈဝႃး ဝၼ်းတီႈ 17/7/2022 ယၢမ်းၵၢင်ၶိုၼ်း သၢႆၾႆးၾႃႉ  ၵူၼ်းဝၢၼ်ႈ ပွၵ်ႉပၢင်ႁၵ်ႉ ၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး  ထုၵ်ႇလၵ်ႉၵႅတ်းဢဝ်ၵႂႃႇၶၢႆ ။

ၵူၼ်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “ၽိူဝ်ႇမႃးႁၼ် မိူဝ်ႈၼႆႉ ၵၢင်ၼႂ် သၢႆၾႆးၾႃႉ ဢၼ်လုၵ်ႉတီႈ သဝ်မႃးၼၼ်ႉ ၺႃး ၵႅတ်းၶၢတ်ႇဝႆႉ။   ၽူႈလၵ်ႉမႃးၶိုၼ်ႈ တူၼ်ႈမၢၵ်ႇၵႅင်းၼၼ်ႉသေၵႅတ်း၊ တီႈတူၼ်ႈမၢၵ်ႇၵႅင်းၼၼ်ႉ  ပဵၼ်ႁွႆးတိၼ်ၶဝ်ပေႃး လၢႆးလူင်ဝႆႉ ။ ယဝ်ႉၵေႃႈ တီႈႁိမ်းလၵ်းၾႆးၼၼ်ႉ မီးတူၼ်ႈယိူဝ်ႈ ယၢဝ်းပဵင်းႁူဝ်ၶဝ်ႇၼႆႉ ၼၼ်ႉၵေႃႈ ၶဝ် ယဵပ်ႇပၼ် ပေႃးလႅဝ်မူတ်း။ ၽိူဝ်ႇၵႂႃႇႁၼ် ႁွႆးတိၼ်ၶဝ် ၸိူင်ႉၼၼ် တူၵ်းၸႂ်ၵၼ်မူတ်းဢိူဝ်ႈ။  ”- ဝႃႈၼႆ။

ပေႃးပဵၼ်လွင်ႈလၵ်ႉၶူဝ်းၶွင်ၼႂ်းဝၢၼ်ႈၼႂ်းႁိူၼ်းမႃး သိုၵ်းမၢၼ်ႈပလိၵ်ႈမၢၼ်ႈဢမ်ႇတွၼ်ႉၸွႆႈၵႄႈၶႆပၼ်သင်။ ပေႃးပဵၼ်လွင်ႈလၵ်ႉသၢႆၾႆး  လွတ်ႇၾႆးတၢင်းၸိူဝ်းၼႆႉၵေႃႈ ပဵၼ်ၼႂ်းပွၵ်ႉၽႂ်ၵေႃႈၵူၼ်းပွၵ်ႉၼၼ်ႉလႆႈသိုဝ်ႉတႅၼ်းၶိုၼ်း၊ ပဵၼ်ၼႃႈႁိူၼ်းၽႂ်ၵေႃႈၸဝ်ႈႁိူၼ်းၼၼ်ႉလႆႈသိုဝ်ႉသႂ်ႇၶိုၼ်း။

ပူၼ်ႉမႃး မွၵ်ႈ 4 လိူၼ်ၼၼ်ႉၵေႃႈ လၵ်ႉၵႅတ်းဢဝ်သၢႆၾႆးၾႃႉၵႂႃႇယဝ်ႉဢမ်ႇႁိုင်သင် မႃးလၵ်ႉဢဝ်ၸၢၵ်ႈၾႆးထႅင်ႈ။ ၵူၼ်းဝၢၼ်ႈဢမ်ႇၸၢင်ႈၵႂႃႇလၢတ်ႈၽႂ် တိူင်ႇတီႈလႂ်။

ယၢမ်းလဵဝ် ၼႂ်းၸႄႈဝဵင်းၼွင်ၶဵဝ်ၼႆႉ  ပၢင်တေႃႇလွင်းလိူင်ႇၼမ် မိူၼ်ၼင်ႇ ယေႇၵူးၵၢၼ်ႇ၊ ၵျွင်းၵျွၵ်ႉၵူႇလႄႈ သ ပေႇယေႇ ၸိူဝ်းၼႆႉ။ ယွၼ်ႉပၢင်တေႃႇလွင်းၼႆႉသေ ၸင်ႇမီးၽူႈလၵ်ႉၸၵ်ႉၶုတ်ႈလိူင်ႇၼမ်ႁႅင်းၵူၼ်းၼႂ်းပွၵ်ႉယွမ်ႇဢွၼ်ၵၼ်လၢတ်ႈၼင်ႇၼႆ။

ၼွၵ်ႈလိူဝ်ၼၼ်ႉ တီႈဝဵင်းၵျွၵ်ႉမႄးၵေႃႈ ပၢင်တေႃႇလွင်းလိူင်ႇ ၼမ်  တေႃႇလွင်းၼိုင်ႈပွၵ်ႈၵေးလၢင်း 40-50 သႅၼ်ပျႃး ၸိူဝ်းၼႆႉလူးၵွၼ်ႇလႆႈႁူႉၼင်ႇၼႆ။