မိူဝ်ႈၼႆႉ ဝၼ်းတီႈ 18/7/2022 ၶွင်ႇသီႇသိုၵ်းမၢၼ်ႈ ယိုတ်းမိူင်း ယိုတ်းၵွင်ႈလူင်သႂ်ႇ ဝဵင်းမိူင်းပၢႆး ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း မၢၵ်ႇလူင်တူၵ်းသႂ်ႇႁိူၼ်းယေးၵူၼ်းဝၢၼ်ႈ လင်ၼိုင်ႈ ၾႆးမႆႈ၊ တူၵ်းသႂ်ႇႁူင်းထမ်း ထမ်ႇမႃႇယူင်ႇ လင်ၶႃးပွင်ႇၵွႆ။
ၵူၼ်းမိူင်းပၢႆး ၽူႈၸၢႆး ဢႃယု 30 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ လႄႈသိုၵ်း PDF ယိုဝ်းၵၼ်၊ သိုၵ်းမၢၼ်ႈယိုဝ်းၵွင်ႈလူင်/ ဢွၼ်ႇသႂ်ႇၼႂ်း ဝၢၼ်ႈ ၊ မၢၵ်ႇလူင်တူၵ်းထိုင်ၼႂ်းဝဵင်း ။ တူၵ်းသႂ်ႇႁိူၼ်းၵူၼ်းဝၢၼ်ႈ ၾႆးမႆႈၵႂႃႇလင်ၼိုင်ႈၶႃႈ။ ၵူၼ်းမိူင်းၵေႃႉၼိုင်ႈမၢတ်ႇၸဵပ်းဢေႃႈ”- ဝႃႈၼႆ။
ပၢင်တိုၵ်းၼႆႉသိုပ်ႇပဵၼ်ထိုင်ယၢမ်းၵၢင်ဝၼ်း။ မၢၵ်ႇလူင်သိုၵ်းမၢၼ်ႈတူၵ်းသႂ်ႇလင်ၶႃးၵျွင်းထမ်ႇမႃႇယူင်ႇ လင်ၶႃးပွင်ႇ၊ ၵူၼ်းမၢတ်ႇၸဵပ်းထႅင်ႈၵေႃႉၼိုင်ႈ။ ၸုမ်း Mobye Rescue Team ပိုၼ်ၽၢဝ်ႇဝႃႈ ၵူၼ်းမိူင်းၵူၼ်းဝၢၼ်ႈ မိူင်းပၢႆး ပေႃးဢမ်ႇလမ်ႇလွင်ႈႁႅင်းၼႃႇဢႃးလႃး ယႃႇပေဢွၵ်ႇႁိူၼ်းဢွၵ်ႇဝၢၼ်ႈလႃးလႃး ဝႃႈၼႆဝႆႉ။
သိုၵ်းမၢၼ်ႈတင်း PDF မိူင်းပၢႆးၼႆႉ ၶဵင်ႈၶႅင်ႈၵၢၼ်သိုၵ်းၵၼ်ဝႆႉ မႃးၶၢဝ်းတၢင်းႁိုင်ၼၢၼ်း။ ၵူၼ်းဝၢၼ်ႈၺႃးၽေးသိုၵ်း ဢၼ်ႁွတ်ႈထိုင်ၼႂ်းဝဵင်းမိူင်းပၢႆးဝႆႉၵေႃႈမီးတင်းၼမ်။