ၸဝ်ႈသိလ်ထမ်း ဝုၼ်းၸုမ်ႉ ဢၼ်ၶဝ်ႈထမ်ႈ ဢတိတ်ႉထၢၼ်ႇတိုဝ်းၵမ်သိၼ်ထမ်း 3 ပီ 3 လိူၼ် ပၢႆ 3 ဝၼ်း ၼၼ်ႉ တေဢွၵ်ႇထမ်ႈလူင် မိူင်းၵႅတ်ႇ ဢိူင်ႇမိူင်းၵႅတ်ႇ ၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း ၼႂ်းဝၼ်းတီႈ 1/8/2022 တေ ထိုင်ၼႆႉ ဝႃႈၼႆ။
ၸဝ်ႈၶူးလူင် ၺႃႇၼသီႇရိ (ၸဝ်ႈမၢၼ်ႇတႃဢွၼ်ႇ) ႁူဝ်ပဝ်ႈၵိင်ႇၽႄငဝ်ႈငုၼ်းမုၵ်ႉ ၸုမ်းလူင် သင်ႇၶႃႇၸိုင်ႈတႆး ပွတ်းဢွၵ်ႇ ၶူင်း လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈယဝ်ႉတၵ်ႉၵႃႇ ဝၼ်းတီႈ 1/8/2022 တေထိုင်ၼႆႉ ၶူးဝႃးပေႃႈ ၸင်ႇတေဢွၵ်ႇထမ်ႈလူင်သေ လူင်းမႃးတၢင်းတႂ်ႈၼႆႉၼေႈ”- ဝႃႈၼႆ။
မိူဝ်ႈဝၼ်းတီႈ 20/6/2022 ၼၼ်ႉ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ တႅမ်ႈလိၵ်ႈမႃးဝႃႈ – ဝၼ်းတီႈ 31/7/2022 ၼႆႉ တေဢွၵ်ႇၵမ်ပႃးလဵဝ်၊ ၵၼ်ႇတေႃးၽြႃး။ ပေႃးဝၼ်းတီႈ 1/8/2022 ယၢမ်းၸဝ်ႉ 7 မူင်းသမ်ႉ ႁႂ်ႈသင်ႇၶ 33 တူၼ်၊ တၵ်ႉၵႃႇလုၵ်ႉသိတ်ႇတပႄး 23 ၵေႃႉလႄႈ ၽူႈယႂ်ႇၵူၼ်းလူင် ပီႈၼွင်ႉမၢၼ်ႈတႃႇ 9 ၵေႃႉ ႁႂ်ႈဢွၼ်ၵၼ်မႃးပၢင်း လူင်းထမ်ႈဝႃႈၼႆ။
လိူဝ်ၼၼ်ႉ သင်ဝႃႈ ၽူႈလႂ်ၽႂ်ၶႂ်ႈလၢၵ်ႈၸၼ်လေႃႉၼႆၸိုင် ဢမ်ႇဝႃႈၽႂ် ၽႃႇသႃႇလႂ်ၵေႃႈယဝ်ႉ ပၼ်ၶႂၢင်ႉ လၢၵ်ႈၸၼ်ယူႇ – လၢၵ်ႈၸၼ်လေႃႉ လႆႈၵူႈၵေႃႉ ဝႃႈၼႆ။
ထိုင်မႃး ဝၼ်းတီႈ 1/8/2022 ယၢမ်းဝၢႆးဝၼ်း 3 မူင်းပၢႆ ၸဝ်ႈသိလ်ထမ်းၶူးဝႃးဝုၼ်းၸုမ်ႉ တေၵႂႃႇတီႈထမ်ႈလူင်သေ လူႇ တၢၼ်းသင်ႇၶႃႇၸေႉ။ တေယၢတ်ႇၼမ်ႉလႄႈ တင်ႈထမ်းသုၸဝၼ်းၼ ဝူဝ်းလူင် တီႈၵုၼ်ၼမ်ႉႁူး ၸမ်ၶူဝ်ၼမ်ႉသိမ်။ လိူဝ်ၼၼ်ႉ တေၵိင်းလိုဝ်ႈတီႈၵုတိ သႃလႃးဢွၼ်ႇ ၾၢႆႇၼိူဝ်ၼမ်ႉသိမ် 2 ၶိုၼ်း၊ တေၵႂႃႇၵိင်းတီႈမိူင်းသၢတ်ႇ 1 ၶိုၼ်းယဝ်ႉ ၸင်ႇတေၵႂႃႇ ဝဵင်းတႃႈၶီႈလဵၵ်း၊ မိူင်းၽူင်း။
ၸဝ်ႈသိလ်ထမ်းၶူးဝႃး ဝုၼ်းၸုမ်ႉ ၶဝ်ႈတိုဝ်းၵမ်သိလ် တီႈထမ်ႈလူင် မိူင်းၵႅတ်ႇ ဢတိတ်ႉထၢၼ်ႇဝႆႉ တႃႇၶၢဝ်းတၢင်း 3 ပီ 3 လိူၼ်ပၢႆ 3 ဝၼ်း ၸဝ်ႈတႄႇၶဝ်ႈထမ်ႈ မိူဝ်ႈဝၼ်းတီႈ 28/4/2019 ၼၼ်ႉမႃး ၼႆယဝ်ႉ။
