သိုၵ်းမၢၼ်ႈ ပိုၼ်ၽၢဝ်ႇ ႁႂ်ႈၵူၼ်းမိူင်းတူၼ်ႈတီး ၸႅင်ႈသဵၼ်ႈမၢႆၶႅၵ်ႇ သင်ဢမ်ႇၸႅင်ႈသေၵူတ်ႇထတ်းၺႃးၸိုင် တေထုၵ်ႇ ဢဝ်လိူင်ႈ ဝႃႈ ၼႆ။
တႄႇဢဝ် ဝၼ်းတီႈ 28/6/2022 ယၢမ်းဝၢႆးဝၼ်း 4 မူင်း – ၵၢင်ၶမ်ႈ 7 မူင်း ၵူၼ်းၼႂ်းပွၵ်ႉ/ ယွမ်ႇ ၼႂ်းၸႄႈဝဵင်းတူၼ်ႈတီး ၽႂ်မီးၶႅၵ်ႇ ၵူၼ်းၼွၵ်ႈႁိူၼ်းမႃးလိုဝ်ႈသဝ်း ႁဵတ်းၶႅၵ်ႇဝႆႉ တၵ်းတေလႆႈ တၢင်ႇသဵၼ်ႈသၢႆမၢႆၶႅၵ်ႇ၊ သင်ဝႃႈ ၽႂ်ဢမ်ႇ ပွင်ႇၶၢဝ်ႇၸႅင်ႈၸူး ၽူႈမီးပုၼ်ႈၽွၼ်းလုမ်း ၵွၼ်းပွၵ်ႉ/ ဢိူင်ႇၸိုင် သင်ဝႃႈသိုၵ်းမၢၼ်ႈၵူတ်ႇထတ်းၺႃး တေထုၵ်ႇဢဝ်လိူင်ႈၸွႆးတြႃးဝႃႈၼႆ ။
ၵူၼ်းတူၼ်ႈတီး ၽူႈယိင်း ဢႃယု 50 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၶဝ်ပိုၼ်ၽၢဝ်ႇဝႃႈ တေၸႅတ်ႈသဵၼ်ႈမၢႆၶႅၵ်ႇၼႆဝႃႇ။ တၢင်းပွၵ်ႉပီႈၶဝ်တႄႉ ပႆႇမႃးၵူတ်ႇထတ်း။ လွင်ႈၸႅတ်ႈသဵၼ်ႈမၢႆ ၶႅၵ်ႇၼႆႉပေႃးတေဝႃႈတႄႉမၼ်း လီမႆႈၸႂ်ဢေႃႈ။ ၵမ်ႉမႃး ၶဝ်ဢမ်ႇၸႅတ်ႈသဵၼ်ႈသၢႆမၢႆၶႅၵ်ႇသေ ၶဝ်ၸႅတ်ႈပႃးတၢင်ႇမဵဝ်း ၶဝ်ႁႃလိူင်ႈ ႁႃတၢင်းၽိတ်း ႁဵတ်းလွင်ႈသုၵ်ႉယုင်ႈတႄႉ ယၢပ်ႇယဝ်ႉၶႃႈဢိူဝ်ႈ ။ ”- ဝႃႈၼႆ။
သိုၵ်းမၢၼ်ႈၼႆႉပိုၼ်ၽၢဝ်ႇဝႃႈ တေထတ်းသဵၼ်ႈမၢႆၶႅၵ်ႇၵူႈႁိူၼ်းဝႃႈၼႆသေတႃႉ ၾၢႆႇၼိုင်ႈၵေႃႈ ၶဝ်ဢဝ်တိုဝ်ႉတၢင်း ၵူတ်ႇထတ်းႁိူၼ်းယေးၵူၼ်းမိူင်း ဢၼ်ၶဝ်ထၢင်ႇထိူမ် ၶႂ်ႈထတ်း ၸဵမ်လႂ်ၼၼ်ႉပႃး ၵူၼ်းတူၼ်ႈတီးၼၼ်ႉလၢတ်ႈၼင်ႇၼႆ။
ၽူႈၸၢႆး ဢႃယု 40 ပၢႆ ၵေႃႉၼိုင်ႈ ဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈၸႅတ်ႈသဵၼ်ႈမၢႆၶႅၵ်ႇ တီႈပွၵ်ႉႁဝ်းတႄႉ ပႆႇႁၼ်မႃး။ ၶဝ်ထၢင်ႇထိူမ်ၽႂ် ၵေႃႈ ၶဝ်တေၵႂႃႇၸႅတ်ႈ ႁိူၼ်းၼၼ်ႉၵမ်းလဵဝ် ႁဵတ်းၼႆၶႃႈၵႂႃႈ။ ”- ဝႃႈၼႆ။
ယၢမ်းလဵဝ် ၸွမ်းသဵၼ်ႈတၢင်းလူင် ဝဵင်းတူၼ်ႈတီးၼႆႉ ပလိၵ်ႈမၢၼ်ႈ (မေႃႇတေႃႇပီႇၵေႇ) ပႂ်ႉၵူတ်ႇထတ်း ၵႃး/ ရူတ်ႉၶိူင်ႈ ႁၢဝ်ႈႁႅင်း ။ ၾၢႆႇၼိုင်ႈၵေႃႈ မၢၵ်ႇၸင်ႇႁႃတႅၵ်ႇ ၵၢင်ဝဵင်းတူၼ်ႈတီးမိူဝ်ႈဝူင်ႈပူၼ်ႉမႃး။ ၾၢႆႇၼိုင်ႈ မီးၵူၼ်းၼႂ်းလူင်ပွင်ၸိုင်ႈမိူင်းထႆးမႃးႁူပ်ႉထူပ်းဢုပ်ႇၵုမ်တင်း သိုၵ်းမၢၼ်ႈဝႆႉတီႈဝဵင်းလူင်တူၼ်ႈတီး။
ၵူၼ်းၼုမ်ႇ တူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ – “PDF ၶဝ်ၵေႃႈ ပိုၼ်ၽၢဝ်ႇဝႆႉဝႃႈ ၶဝ်တေပွႆႇမၢၵ်ႇ ၼႂ်းဝဵင်းတူၼ်ႈတီး ထႅင်ႈ 2 ပွၵ်ႈ ၊ ၶဝ်ၾၢင်ႉထိုင် ၵူၼ်းမိူင်းဝႃႈ ယႃႇပေၵပ်းၵၢႆႇၸွမ်းသိုၵ်းမၢၼ်ႈ ပလိၵ်ႈမၢၼ်ႈ၊ ယႃႇပေယူႇႁိမ်းၸမ်ၸိူဝ်းၶဝ် ၊ ပေႃးပဵၼ်လွင်ႈပဵၼ်တၢင်းမႃး ၵူဝ်ၵူၼ်းမိူင်းတိူဝ်ႉၺႃးၸွမ်းပႃး ဝႃႈၼႆဝႆႉဢေႃႈ ။ ၵွပ်ႈၼႆလႄႈသိုၵ်းမၢၼ်ႈ ၵေႃႈပိုၼ်ၽၢဝ်ႇလွင်ႈထတ်းသဵၼ်ႈသၢႆမၢႆၶႅၵ်ႇ ၼႆႉၶႃႈၵႂႃႈ”- ဝႃႈၼႆ။
မၢၵ်ႇတႅၵ်ႇၵၢင်ဝဵင်းတူၼ်ႈတီး ဝၼ်းသုၵ်းဝူင်ႈပူၼ်ႉမႃးၼႆႉ ၸုမ်းသိုၵ်းမုတ်းၵူၼ်းၼုမ်ႇ SYM.UG ပိုၼ်ၽၢဝ်ႇဝႃႈ ပဵၼ်ၼမ်ႉမိုဝ်းၶဝ်ႁၢင်ႈၵၢင်တေႃႇ ထႅဝ်ၵႃးသိုၵ်းမၢၼ်ႈသေတႃႉ တႅၵ်ႇၸဝ်ႉၵႂႃႇဢိတ်းၼိုင်ႈ ဝႃႈၼႆ။ တီႈမၢၵ်ႇတႅၵ်ႇၼၼ်ႉ ပလိၵ်ႈမၢၼ်ႈတိူဝ်ႉၸၢၵ်ႇမၢၵ်ႇတၢႆ 2 ၵေႃႉ မၢတ်ႇၸဵပ်း 2 ၵေႃႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ