ၵူၼ်းမိူင်းတႆး ပွတ်းၸၢၼ်း 3-4 ၸႄႈဝဵင်း တုၵ်းယွၼ်း ႁႂ်ႈၸုမ်းယိပ်းၵွင်ႈၵၢင်ႇၸၢဝ်းၶိူဝ်းၸိူဝ်းတူင်ႉၼိုင်ၼႂ်းပိုၼ်ႉတီႈ ႁႂ်ႈပူတ်းထွၼ်ပၼ် မၢၵ်ႇမႅင်းၾင်လိၼ် ယွၼ်ႉယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉ ဝႃႈၼႆ။

ယၢမ်းလဵဝ် ပဵၼ်ၶၢဝ်း  ၶဝ်ႈထိူၼ်ႇႁႃၵိၼ်ၽၵ်းထိူၼ်ႇသေတႃႉ ဝၢႆးလင်ပၢင်တိုၵ်းသိုၵ်းသိူဝ် ၵူၼ်းမိူင်းႁူပ်ႉထူပ်း ပၼ်ႁႃမၢၵ်ႇမႅင်းၾင်လိၼ်လႄႈဢမ်ႇၸၢင်ႈၶဝ်ႈထိူၼ်ႇ။

 ၵူၼ်းမိူင်းပိုၼ်ႉတီႈ ၸွမ်းဝၢၼ်ႈၼွၵ်ႈၼႃးပၢင်ႇ မိူၼ်ၼင်ႇ ၸႄႈဝဵင်းၵေးသီး၊ မိူင်းၵိုင်၊ လၢႆးၶႃႈ ပၢင်လူင် လွႆလႅမ်ၸိူဝ်းၼႆႉ   ယၢပ်ႇၽိုတ်ႇတႃႇႁႃႁဵပ်း၊ ႁႃၼေႃႇ၊ ႁႃၽၵ်းၶဵဝ် ၼႂ်းထိူၼ်ႇ။ ဢမ်ႇမီးၽႂ်ႁတ်းၵႂႃႇသွၵ်ႈတဝ်ထိူၼ်ႇ  ယွၼ်ႉမီးလွင်ႈႁၢင်ႈၵၢင် မၢၵ်ႇမႅင်းဝႆႉၼမ်လႄႈ ၵူဝ်ယဵပ်ႇၺႃးမၢၵ်ႇ  ။

ၽူႈယိင်း ဢႃယု 30 ပၢႆ ပွတ်းၸၢၼ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တင်ႈတႄႇ သိုၵ်းႁွင်ႇ – သိုၵ်းၸၢၼ်း ၶဝ်ယိုဝ်းၵၼ်မႃးၼႆႉ တေႃႇ ထိုင်ယၢမ်းလဵဝ် ႁဝ်းၶႃႈ ဢမ်ႇႁတ်းၵႂႃႇသွၵ်ႈတဝ်ႁႃႁဵပ်း၊ ၼေႃႇ၊ ၽၵ်းၶဵဝ် မႃးၶၢႆၵၼ်ယဝ်ႉ။ ၵူဝ်ယဵပ်ႇၺႃးမၢၵ်ႇၶႃႈဢေႃႈ။ ယၢပ်ႇၽိုတ်ႇတႃႇႁႃၵိၼ် လဵင်ႉတွင်ႉတႄႉၶႃႈ။ ယၢမ်းလဵဝ် ပဵၼ်ၽွင်းႁႃၵိၼ်ယႅမ်ႉ ၸွမ်းၼႂ်းထိူၼ်ႈၶႃႈလႄႈ ၵူၼ်းလေႇထိူၼ်ႇၶဝ်ၵေႃႈ ဢမ်ႇႁတ်းၵႂႃႇၵၼ်ၶႃႈ ယၢပ်ႇၽိုတ်ႇ ၵၼ်မူတ်းၶႃႈဢေႃႈ”- ဝႃႈၼႆ။

ထႅင်ႈၾၢႆႇၼိုင်ႈ ဢွင်ႈတီႈတႃႇပွႆႇဝူဝ်းၵႂၢႆး ၸိူဝ်းၼႆႉၵေႃႈ ဢမ်ႇပေႃးမီးတီႈပွႆႇလဵင်ႉ လိူင်ႇၼမ် မိူၼ်မိူဝ်ႈၵူႈပွၵ်ႈယဝ်ႉ ၵူၼ်းပိုၼ်ႉတီႈမႆႈၸႂ် ၵူဝ်ဝူဝ်းၵႂၢႆး ၵႂႃႇၽႃႇယဵပ်ႇၺႃးမၢၵ်ႇ ။

ထဝ်ႈယိင်း ဢႃယု 60 ပၢႆ ပွတ်းၸၢၼ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တီႈလဵင်ႉဝူဝ်းၵႂၢႆး ၸိူဝ်းၼႆႉ ဢမ်ႇမီးတီႈမၼ်းၼမ် မိူၼ်မိူဝ်ႈၵူႈပွၵ်ႈယဝ်ႉ ၸွမ်းႁူၺ်ႈလွႆ ၸိူဝ်းၼႆႉ။ ယွၼ်ႉၵူဝ်ၵႂႃႇယဵပ်ႇၺႃးမၢၵ်ႇ။ ယိူဝ်ႈသမ်ႉ ဢမ်ႇမီးတီႈလဵဝ် ဝူဝ်းၵႂၢႆးသမ်ႉ ၵႂႃႇၵိၼ်တီႈၼိုင်ႈယဝ်ႉ တီႈၼိုင်ႈ။  ဢွင်ႈတီႈတႃႇပွႆႇဝူဝ်းၵႂၢႆးတႄႉ ၵႅပ်ႈႁႅင်းလူင်းၼႃႇယဝ်ႉ။ ပေႃးၵႂႃႇယဵပ်ႇၺႃး လူႉတၢႆသမ်ႉ လႆႈၵႃႈသၢႆႈတႅၼ်းၶိုၼ်း ယူႇ သေတႃႉ ၼိုင်ႈတူဝ် တၢၼ်ႇလႆႈ 3-4 သႅၼ်။  ၵူၺ်းလႆႈ 1 သႅၼ် ၾၢႆႇသိုၵ်း ဢၼ်ယူႇၼႂ်းပိုၼ်ႉတီႈၶဝ်သၢႆႈတႅၼ်းပၼ် ၸိူင်ႉၼႆ”- ဝႃႈၼႆ။

ဢိင်ၼိူဝ် လွင်ႈၼႆႉ ၵူၼ်းမိူင်းပိုၼ်ႉတီႈ 3-4 ၸႄႈဝဵင်း ဢွၼ်ၵၼ်တုၵ်းယွၼ်း ထိုင်ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼႂ်းပိုၼ်ႉတီႈ ဢမ်ႇဝႃႈ ၸုမ်းလႂ် ႁႂ်ႈပူတ်းထွၼ်ပၼ် လွင်ႈမၢၵ်ႇမႅင်း ၾင်လိၼ် ၵမ်ႈၼမ် ပဵၼ်ၸုမ်းဢူၺ်းလီပွတ်းႁွင်ႇ တူင်ႉၼိုင်ဝႆႉ။

“ႁဝ်းၶႃႈ ၵူၼ်းမိူင်း တုၵ်းယွၼ်းထိုင် ၸုမ်းယိပ်းၵွင်ႈၵၢင်ႇ ဢမ်ႇဝႃႈ ၸုမ်းပွတ်းၸၢၼ်း ပွတ်းႁွင်ႇ ၸုမ်းဢူၺ်းလီၶဝ် ဢၼ်မီးပုၼ်ႈၽွၼ်းတူင်ႉ ၼိုင်ယူႇဝႆႉ ၼႂ်းပိုၼ်ႉတီႈ ၸိူဝ်းၼႆႉ ၶႅၼ်းတေႃႈ ႁႂ်ႈပူတ်းပၼ် မၢၵ်ႇမႅင်းၾင်လိၼ်ယႂ်ႇယႂ်ႇၼမ်ၼမ်သေၵမ်း ယွၼ်ႉႁဝ်းၶႃႈ လူဝ်ႇႁႃၵိၼ်လဵင်ႉတွင်ႉ ၵူဝ်ယဵပ်ႇၺႃးမၢၵ်ႇၶႃႈဢေႃႈ”- ၵူၼ်းပိုၼ်ႉတီႈပွတ်းၸၢၼ်း ဢႃယု 30 ပၢႆ ၵေႃႉၼိုင်ႈ တုၵ်းယွၼ်းလၢတ်ႈၼႄ ၼင်ႇၼႆ။

ဝၢႆး RCSS တင်း SSPP လႄႈ ၸုမ်းဢူၺ်းလီပွတ်းႁွင်ႇ ပဵၼ်ပၢင်တိုၵ်းၵၼ်မႃးႁၢဝ်ႈႁႅင်း ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ တၢင်းၸႄႈဝဵင်းၵေး သီး၊ မိူင်းၵိုင်၊ လၢႆးၶႃႈ၊ လွႆလႅမ်လႄႈ လွၵ်ႉၸွၵ်ႇ ၸိူဝ်းၼႆႉ ႁဵတ်းႁႂ်ႈၵူၼ်းမိူင်းပွတ်းၸၢၼ်း ဢွၼ်ၵၼ်ထူပ်းတၢင်းယၢပ်ႇၽိုတ်ႇႁႅင်း ပၢႆႈၽေးသိုၵ်း  ၼပ်ႉႁူဝ်ႁဵင် ၼႆယဝ်ႉ။