ဝၼ်းတီႈ 16/6/2022 ယၢမ်းႁူဝ်ၶမ်ႈ မွၵ်ႈ 6 မူင်း ၵူၼ်းၼုမ်ႇတႆး ဝဵင်းၵဵင်းမႆႇ ၼႂ်းၸိုင်ႈထႆး ႁူမ်ႈၵၼ် တႆႈတဵၼ်းယွၼ်းသူးသူင်ႇမႅတ်ႉတႃႇထိုင် ဝိၺၢၼ်ႇၶႂၼ်ငဝ်း ၵူၼ်းမိူင်းတႆး ၸိူဝ်းထုၵ်ႇသိုၵ်းမၢၼ်ႈ ၶႃႈႁႅမ်တၢႆ မိူဝ်ႈပူၼ်ႉမႃး 24 ပီ 1996-1998 ပၢၼ်တႅပ်း 4 တႅပ်းၼၼ်ႉ ဝႃႈၼႆ။
ၸဝ်ႈၶိုၼ်းသႂ် ၸႂ်ယဵၼ် ၽူႈၸတ်းၵၢၼ် ပျီႇထွင်ႇသူႉ ဢိၼ်ႇတီႇၸူႉ (PI) မွၵ်ႇလၢတ်ႈၶေႃႈၵႂၢမ်း ၼႂ်းပၢင်ၼၼ်ႉဝႃႈ– “ပေႃးတေမႃးလၢတ်ႈၼႄ လွင်ႈသုၼ်ႇလႆႈၵူၼ်းမိူင်းတႆးၼႆႉ မၼ်းဢမ်ႇၸႂ်ႈဝႃႈ ၵိူတ်ႇၶိုၼ်ႈမႃး မိူဝ်ႈ 16 လိူၼ်ၵျုၼ်ႊ 1996-98 ၼၼ်ႉၵူၺ်း။ သုၼ်ႇလႆႈၵူၼ်းမိူင်းတႆး ႁဝ်း ၶႃႈ လႆႈလူႉသုမ်းမႃးၼႆႉ တႄႇဢဝ် ႁဝ်းလႆႈဝၢၼ်ႈမိူင်းမႃးၼၼ်ႉယဝ်ႉ။ သိုၵ်းမၢၼ်ႈၶဝ် မႃးပူၼ်ႉပႅၼ်ဝၢၼ်ႈမိူင်းႁဝ်းသေ ၶီႇၼဵၵ်းတဵၵ်းတဵင်ၼိူဝ် ၵူၼ်းမိူင်းႁဝ်း ၸဵမ်မိူဝ်ႈ 1952 ၼၼ်ႉယဝ်ႉ။ ၶဝ်ပိုၼ်ၽၢဝ်ႇ မိူဝ်ႈၼၼ်ႉတႄႉ မၢႆမီႈသိုၵ်း မႃႇသေႇလေႃး ၽွင်းငမ်းတင်ႈတႄႇၼၼ်ႉမႃး သုၼ်ႇလႆႈ ၵူၼ်းႁဝ်းၵေႃႈ လႆႈလူႉသုမ်းမႃးယဝ်ႉ ႁၢၼ်ႉတေႃႇထိုင်မိူဝ်ႈလဵဝ်”- ဝႃႈၼႆ။
ဢိင်ၼိူဝ် လွင်ႈသုၼ်ႇလႆႈၵူၼ်းမိူင်းတႆးၼႆႉသေ တေတိုၵ်းဢဝ်ၼႄႇ ဢမ်ႇၼၼ် တေယွၼ်းဢဝ်ၼႄႇ ၼႆၸိူဝ်းၼႆႉ ။ တေႃႇထိုင်ယၢမ်းလဵဝ်ၼႆႉ တိုၵ်း ဢဝ်/ ယွၼ်းဢဝ်ၵေႃႈ ပႆႇလႆႈ ၸဝ်ႈၶိုၼ်းသႂ် ၸႂ်ယဵၼ် သိုပ်ႇလၢတ်ႈၼႄၼင်ႇၼႆ။
“မၼ်းမီးတီႈဢၼ်ဝႃႈ ႁဝ်းၼႆႉ ယွၼ်းဢဝ်ၵေႃႈ ဢမ်ႇလႆႈ၊ တိုၵ်းဢဝ်ၵေႃႈ ဢမ်ႇလႆႈ။ ႁဝ်းလူဝ်ႇ ႁဵတ်းတၢင်ႇလၢႆးယူဝ်ႉ ဢမ်ႇၼၼ်ၵေႃႈ လၢႆးတိုၵ်း ႁဝ်းၼႆႉ ယင်းပႆႇၵုမ်ႇထူၼ်ႈယူဝ်ႉ ၼႆၵေႃႈ တေမီးမႃးလွင်ႈဝူၼ်ႉၶႆႈၸႂ်ၵၼ်မႃးယဝ်ႉ။ ၵူၺ်းၵႃႈ ဢၼ်ၼႄႉၼွၼ်းတႄႉ လွင်ႈယုမ်ႇယမ် ၸိူဝ်းဢၼ် ၸၢဝ်းပုတ်ႉထၽႃႇသႃႇတႄႉ ယွၼ်းဢဝ်လၢႆလၢႆ မၼ်းဢမ်ႇလႆႈ မၼ်းတေလႆႈႁဵတ်းဢဝ် ၸင်ႇတေလႆႈ။ ပေႃးဝႃႈ ယွၼ်းဢဝ်ၼႆတႄႉ ပိူၼ်ႈဢေး လူ ၵႃႈႁိုဝ်ၵေႃႈ ႁဝ်းတေလႆႈၵႃႈၼၼ်ႉၵူၺ်း။ ပေႃးပိူၼ်ႈဢမ်ႇဢေးလူဢမ်ႇပၼ်ၵေႃႈ ႁဝ်းၵေႃႈဢမ်ႇလႆႈသင် မၼ်းတေပဵၼ် ၸိူင်ႉၼၼ်။ ပုတ်ႉ ထၸဝ်ႈ သင်ႇသွၼ်ဝႆႉဝႃႈ သုၼ်ႇလႆႈၵူၼ်းၼႆႉ မၼ်းလူဝ်ႇလႆႈႁဵတ်းဢဝ်ႁင်းၵူၺ်း၊ ပေႃးႁဝ်းႁဵတ်းဢဝ်ႁင်းၵူၺ်းၼႆ ႁဝ်းၵေႃႈ တေၸၢင်ႈလႆႈ၊ ပေႃး လႆႈၵေႃႈ တေလႆႈၼမ်လိူဝ် ဢၼ်ႁဝ်းယွၼ်းဢဝ်ၼၼ်ႉဢိူဝ်ႈ” – ဝႃႈၼႆ။
တီႈပၢင်တႆႈတဵၼ်း ယွၼ်းသူး ၵူၼ်းၼုမ်ႇတႆး တီႈဝဵင်းၵဵင်းမႆႇၼၼ်ႉ ႁူမ်ႈၵၼ် ၸပ်းၾႆးတဵၼ်းသေ ၸုၵ်းၼိမ်တူဝ်ၸႂ်ၵၼ် ၵမ်ႉၼိုင်ႈ သူင်ႇမႅတ်ႉ တႃႇ ယိုၼ်ႈထိုင်ၵူၼ်းမိူင်းတႆး ၸိူဝ်းလူႉတၢႆႁၢႆၵႂႃႇ မိူဝ်ႈတႅပ်း 4 တႅပ်း 96-98 ၸိူဝ်းၼၼ်ႉ ၼႆယဝ်ႉ။
ၼွၵ်ႈလိူဝ်ၼၼ်ႉ မိူဝ်ႈဝႃး ဝၼ်းတီႈ 16 ယၢမ်းႁူဝ်ၶမ်ႈ ယူႇတီႈ ၵုၼ်ႁဵင်ၽွင်ႇတေသျိၼ်းလႄႈ တင်းၸၢဝ်းၶိူဝ်း ဢၼ်ယူႇႁိမ်းႁွမ်း ၽင်ႇၼမ်ႉပၢင် – ၼမ်ႉၶူင်း ႁူမ်ႈၵၼ် တႆႈတဵၼ်းယွၼ်းသူးပၼ် ၵူၼ်းမိူင်းတႆး ၸိူဝ်းထုၵ်ႇပူၼ်ႉပႅၼ်သုၼ်ႇလႆႈသေ လႆႈလူႉသဵင်ႈသုတ်းမုၼ်ၵႂႃႇ ယွၼ်ႉသိုၵ်းမၢၼ်ႈ ၶႃႈႁႅမ်တၢႆ မိူဝ်ႈပီ 1996-98 ၼၼ်ႉ တီႈဝၢၼ်ႈၽၢင်လၢင်း ဝဵင်းၵႃလီႉ ၸႄႈဝဵင်းၵုၼ်ႁဵင် ၸိုင်ႈတႆး ပွတ်းၸၢၼ်း။
ၽူႈၶဝ်ႈႁူမ်ႈ ပၢင်တႆႈတဵၼ်း လၢတ်ႈတီႈၽူႈတွႆႇႁွၵ်ႈဝႃႈ -“တီႈထုင်ႉ ၵုၼ်ပၢင်ၵုၼ်ၶူင်း ႁဝ်းၶႃႈၼႆႉ မိူဝ်ႈပူၼ်ႉမႃး 97-98 ၼၼ်ႉ ပိူၼ်ႈႁဵတ်းတႅပ်း 4 တႅပ်းသေ ပီႈၼွင်ႉၸၢဝ်းၶိူဝ်း ဢၼ်ႁဝ်းၶႃႈ မႃးႁူပ်ႉၵၼ်ၼႆႉ ၵူႈၸၢဝ်း ၶိူဝ်းၼႆႉ လႆႈၶၢမ်ႇပိူၼ်ႈ ၶီႇၼဵၵ်ႉတဵၵ်းတဵင်ၶႃႈႁႅမ်တၢႆ ပူၼ်ႉပႅၼ်သုၼ်ႇလႆႈၵူၼ်း သေ လႆႈလူႉႁၢႆတၢႆၵႂႃႇ မီးတင်းၼမ် ၵွပ်ႈၼႆလႄႈ ၸင်ႇၸတ်းႁဵတ်း ပၢင်သွၼ်းသူးသူင်ႇမႅတ်ႉတႃႇထိုင်ဝိၺၢၼ်ႇၶွၼ်ငဝ်းၸိူဝ်းလႆႈလူႉတၢႆၵႂႃႇၼၼ်ႉ ၶႃႈ”- ဝႃႈၼႆ။
ပၢင်တႆႈတဵၼ်းယွၼ်းသူးၼႆႉ တေမီးပီႈၼွင်ႉတႆး၊ လႃးႁူႇ၊ လီသူး၊ တဢၢင်း(ပလွင်ႈ)၊ ယၢင်းလၢႆးလႄႈ ယၢင်းလမ် ၸိူဝ်းၼႆႉ ၶဝ်ႈႁူမ်ႈ 70 ပၢႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ