ၸဝ်ႈသိလ်ထမ်း ၶူးဝႃးဝုၼ်းၸုမ်ႉ တေဢွၵ်ႇထမ်ႈ မိူင်းၵႅတ်ႇ ၼႂ်းႁၢင်လိူၼ်ၵျူႊလၢႆႊ  

ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ဢတိတ်ႉထၢၼ်ႇ ၶဝ်ႈၵျၢင်ႉၵမ်တြႃး ၶွပ်ႈတဵမ် 3 ပီ 3 လိူၼ်ပၢႆ 3 ဝၼ်းယဝ်ႉ တေဢွၵ်ႇထမ်ႈမိူင်းၵႅတ်ႇသေ မႅတ်ႉတႃႇတြႃးပၼ် တၵ်ႉၵႃႇသတ်ႉထႃး တႃႇၶၢဝ်းတၢင်း မွၵ်ႈ 5 ဝၼ်း ၸဝ်ႈၶူးလူင် ၺႃႇၼသီႇရိ (ၸဝ်ႈမၢၼ်ႇတႃဢွၼ်ႇ) လၢတ်ႈ။

ပေႃးထိုင်မႃး ဝၼ်းတီႈ 31/7/2022 ယၢမ်းၵၢင်ၼႂ် 5 မူင်း ထိုင် 7 မူင်း  သင်ၶၸဝ်ႈ 23 တူၼ်လႄႈ ၵူၼ်းႁိူၼ်း 30 ၵေႃႉ တေၶဝ်ႈၵႂႃႇပၢင်းၶူးဝႃးဝုၼ်းၸုမ်ႉ ဢွၵ်ႇထမ်ႈမိူင်းၵႅတ်ႇ ဢိူင်ႇမိူင်းၵႅတ်ႇ ၸႄႈဝဵင်းမိူင်းသၢတ်ႇ ။

ၸဝ်ႈၶူးလူင် ၺႃႇၼသီႇရိ (ၸဝ်ႈမၢၼ်ႇတႃဢွၼ်ႇ) ႁူဝ်ပဝ်ႈ ၵိင်ႇၽႄငဝ်ႈငုၼ်း မုၵ်ႉၸုမ်းလူင်သင်ႇၶႃႇ ၸိုင်ႈတႆး ပွတ်းဢွၵ်ႇၶူင်း လၢတ်ႈတီႈၽူႈ တွႆႇႁွၵ်ႈဝႃႈ – “ပေႃးဝၼ်းတီႈ 31/7/2022 ၸိုင် သင်ၶၸဝ်ႈ 23 ပႃး၊ ၵူၼ်းႁိူၼ်း 30 ၵေႃႉ တေႁူမ်ႈၵၼ် မိူဝ်းပၢင်းၸဝ်ႈၶူးဝႃးပေႃႈ ၼႂ်းထမ်ႈ။ ယၢမ်းၵၢင်ၼႂ် 5 မူင်း ထိုင် 7 မူင်း ႁႂ်ႈႁွတ်ႈထိုင်ၼိူဝ်ထမ်းမူတ်းမူတ်း။ ပေႃးၶူးဝႃးပေႃႈ ၵျွလူင်းမႃးထိုင်တႂ်ႈလွႆယဝ်ႉ တႃႇတေၶုတ်ႇႁူဝ်/ ၶူၼ်ႁူဝ်ၼၼ်ႉ တေမီးလုၵ်ႈသိတ်ႇ(တပႄး) ၸုမ်းထႃႁူဝ်  တေဢဝ်ပုၼ်ႈၽွၼ်းဝႆႉ။  မိူဝ်ႈၽွင်းထႃႁူဝ်ၼၼ်ႉ  ႁၢမ်ႈၵူၼ်းတၢင်းၼွၵ်ႈၶဝ်ႈႁႃ။  ပေႃးယဝ်ႉ ၶူးဝႃးပေႃႈ တေသိုပ်ႇမႅတ်ႉတႃႇတြႃးၵႂႃႇ”- ဝႃႈၼႆ။

ဝၢႆးသေ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ထႃႁူဝ်ယဝ်ႉ ၼႂ်းဝၼ်းတီႈ 31 ယၢမ်းႁူဝ်ၶမ်ႈၼၼ်ႉ တေသိုပ်ႇမႅတ်ႉတႃႇ တြႃးပၼ်တၵ်ႉၵႃႇသတ်ႉထႃးၵႂႃႇ တီႈထမ်ႈတႂ်ႈ ဢိူင်ႇမိူင်းၵႅတ်ႇၵႂႃႇ ၼႆယဝ်ႉ။

“ၼႂ်းဝၼ်းတီႈ 31 ယၢမ်းႁူဝ်ၶမ်ႈ 5 မူင်းၼၼ်ႉ ၸဝ်ႈၶူးဝႃး တေမႅတ်ႉတႃႇတြႃးၵႂႃႇ တီႈထမ်ႈမိူင်းၵႅတ်ႇ (ထမ်ႈတႂ်ႈ)။ ယၢမ်းလဵဝ် ၸဝ်ႈၶူးဝႃးပေႃႈ ၶဝ်ႈထမ်ႈၵျၢင်ႉၵမ်တြႃးဝႆႉ ပဵၼ်ထမ်ႈၼိူဝ်။ ဢၼ်တေမႃးမႅတ်ႉတႃႇတြႃး ပၼ်သမ်ႉ တေပဵၼ်ထမ်ႈတႂ်ႈ။ ၸဝ်ႈႁဝ်း တေယူႇတီႈထမ်ႈမိူင်းၵႅတ်ႇ မွၵ်ႈ 5 ဝၼ်းသေ မႅတ်ႉတႃႇတြႃးၵႂႃႇ ဝၢႆးၼၼ်ႉ တေသိုပ်ႇဢွၵ်ႇၶၢဝ်းတၢင်းပွၵ်ႈမိူဝ်းမိူင်းၽူင်း တႃႈၶီႈလဵၵ်းၶိုၼ်းယဝ်ႉ”- ၸဝ်ႈၶူးလူင် ၺႃႇၼသီႇရိ သိုပ်ႇလၢတ်ႈၼႄၼင်ႇၼႆ။

 တႃႇႁပ်ႉတွၼ်ႈၸဝ်ႈသိလ်ထမ်း ၶူးဝႃးဝုၼ်းၸုမ်ႉ တေဢွၵ်ႇထမ်ႈၼၼ်ႉ  ယူႇတီႈသင်ၶၸဝ်ႈလႄႈ လုၵ်ႈၼွင်ႉတပႄးလုၵ်ႈသိတ်ႇ ဢွၼ် ၵၼ် ႁၢင်ႈႁႅၼ်းဢွင်ႈတီႈယူႇ တၼ်းသဝ်း သင်ၶၸဝ်ႈ တႃႇတၵ်ႇၵႃႇသတ်းထႃး တီႈၸမ်ၵႆ တေမႃးဝႆႈသႃ။  

“ယၢမ်းလဵဝ်တႄႉ တိုၵ်ႉဢွၼ်ၵၼ်ႁၢင်ႈႁႅၼ်းယူႇတိၵ်းတိၵ်းယဝ်ႉ ဢွင်ႈတီႈဝႆႉရူတ်ႉၵႃးၼႆႉ မွၵ်ႈ 3,000 လမ်းၼႆႉ ႁၢင်ႈႁႅၼ်းယဝ်ႉ။ ဢွင်ႈတီႈထွမ်ႇတြႃး ထမ်ႈတႂ်ႈၵေႃႈ ႁၢင်ႈႁႅၼ်းဝႆႉၶႅမ်ႉလႅပ်ႈယဝ်ႉ။ ဢွင်ႈတီႈ လွင်ႈလဵင်ႉလူ ၸိူဝ်းၼႆႉၵေႃႈ ႁၢင်ႈႁႅၼ်းဝႆႉ ၶႅမ်ႉလႅပ်ႈယဝ်ႉ။ ၵူၺ်းၵႃႈ ဢွင်ႈတီႈၼွၼ်းယူႇသဝ်း ၸိူဝ်းၼႆႉတႄႉ ၸဵမ်သင်ၶၸဝ်ႈလႄႈ ၵူၼ်းႁိူၼ်း ႁႂ်ႈဢွၼ်ၵၼ်ႁၢင်ႈႁႅၼ်းပႃးမႃးႁင်းၽႂ်မၼ်း ၸဵမ်သုမ်ႉၼွၼ်း၊ ၽႃႈႁူမ်ႇၶူဝ်းၼွၼ်း ၸိူဝ်းၼႆႉ။ ယဝ်ႉ ၵေႃႈ ႁွင်ႈၼမ်ႉ ႁွင်ႈၽၢႆႈ ၸိူဝ်းၼႆႉၵေႃႈ တေမီးတီႈယူပ်ႈယွမ်းယူႇ ယွၼ်ႉၵူၼ်းတေမႃးၵၼ်ၼမ်လၢႆလႄႈ ၼင်ႇႁိုဝ် တေၶႅမ်ႉလႅပ်ႈလီလူမ်ၸႂ် လီ ငၢမ်းၼၼ်ႉ ႁဝ်းၸဝ်ႈၶဝ် တေၶတ်းၸႂ်ပၼ်ငၢႆႈလူမ်ၸႂ်ၵႂႃႇယူႇ”- ၸဝ်ႈၶူးလူင် ၺႃႇၼသီႇရိ သပ်းလႅင်းလၢတ်ႈၼႄၼင်ႇၼႆ။

ထႅင်ႈလွင်ႈၼိုင်ႈ တုၵ်းယွၼ်းပွင်ႇလႅင်းၼႄထႅင်ႈ တမ်ႈတီႈတၵ်ႇၵႃႇသတ်းထႃး တီႈၸမ်/ ၵႆ ၸိူဝ်းတေမႃးဝႆႈသႃ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ၼႆႉ ႁႂ်ႈဢွၼ်ၵၼ်ငိူင်ႉဝႄႈ လွင်ႈသူႇရႃႇၼမ်ႉလဝ်ႈ ၶိူင်ႈမဝ်းၵၼ် တင်ႈတႄႇဢွၵ်ႇႁိူၼ်းမႃး လိူဝ်ၼၼ်ႉ ၸွမ်းသဵၼ်ႈတႃႇသၢႆတၢင်း ၸိူဝ်းၼႆႉ ၼင်ႇႁိုဝ် ပေႃးတေလႆႈလွတ်ႈၽႄးၸွမ်းတၢင်းၵၼ်။ ယဝ်ႉၵေႃႈ ဢွၼ်ၵၼ်ၵိၼ်သၢၵ်ႈလွတ်ႈ။ လိူဝ်ၼၼ်ႉ ယွၼ်ႉပဵၼ်ၶၢဝ်းၾူၼ်လႄႈ သင်ဝႃႈ ဢဝ်ရူတ်ႉၵႃး သႅၼ်းသုင်မႃးၼႆ တေတိူဝ်းလီ ၼင်ႇႁိုဝ် တေၵႂႃႇမႃးငၢႆႈလူမ်ၸႂ်ၵၼ် ၸဝ်ႈၶူးလူင် ၺႃႇၼသီႇရိ သင်ႇလၢတ်ႈၼႄဝႆႉၼင်ႇၼႆထႅင်ႈ။

ၼွၵ်ႈလိူဝ်ၼၼ်ႉ ၸွမ်းၼင်ႇ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ တႅမ်ႈလိၵ်ႈမႅတ်ႉတႃႇဢွၵ်ႇမႃးၼၼ်ႉ ၶူဝ်းတၢၼ်း ဢၼ်တေၸႅၵ်ႈပၼ်သင်ၶၸဝ်ႈ လႄႈ တၵ်ႉၵႃႇသတ်းထႃးၼၼ်ႉ တေၶတ်းၸႂ် ၸႅၵ်ႇပၼ် ၼႂ်းဝၼ်းဢွၵ်ႇထမ်ႈၼၼ်ႉ ႁႂ်ႈၸေးၵၼ်ၵူႈၸဝ်ႈၵူႈၵေႃႉၵႂႃႇ ၸဝ်ႈၶူးလူင် ၺႃႇၼသီႇရိ လၢတ်ႈ။

ၸဝ်ႈသိလ်ထမ်းၶူးဝႃး ဝုၼ်းၸုမ်ႉ ၶဝ်ႈတိုဝ်းၵမ်သိလ် တီႈထမ်ႈလူင် မိူင်းၵႅတ်ႇ ဢတိတ်ႉထၢၼ်ႇဝႆႉ တႃႇၶၢဝ်းတၢင်း 3 ပီ 3 လိူၼ်ပၢႆ 3 ဝၼ်း ၸဝ်ႈ တႄႇၶဝ်ႈထမ်ႈ မိူဝ်ႈဝၼ်းတီႈ 28/4/2019 ၼၼ်ႉမႃး ၼႆယဝ်ႉ။