ၽူႈယႂ်ႇဝၢၼ်ႈ (ယႃႇဢဵင်ႇမူး) ပွၵ်ႉမင်ႇၵလႃႇဢွင်ႇမျေႇ 1 ဝဵင်းသူၺ်ႇယွင်ႇ ၺႃးၸုမ်းယိပ်းၵွင်ႈယိုဝ်းတၢႆ ။
မိူဝ်ႈဝႃး ဝၼ်းတီႈ 6/6/2022 ယၢမ်းဝၢႆးဝၼ်း 2 မူင်း မီးၸုမ်းဢမ်ႇႁူႉၾၢႆႇ ၶဝ်ႈမႃးယိုဝ်း ဢူးၵူဝ်ႇၵူဝ်ႇမိၼ်ႉ (ႁွင်ႉ) ၵူဝ်ၵျူဝ်း (ကိုဂျိုး) ၽူႈယႂ်ႇဝၢၼ်ႈ တီႈၼႂ်းလုမ်းၽူႈယႂ်ႇဝၢၼ်ႈ တီႈ ပွၵ်ႉမင်ႇၵလႃႇဢွင်ႇမျေႇ ဝဵင်းသူၺ်ႇယွင်ႇ ၸႄႈဝဵင်းတူၼ်ႈတီး ၸိုင်ႈတႆး ပွတ်းၸၢၼ်း လူႉတၢႆထင်တီႈ။
ၵူၼ်းဝဵင်းသူၺ်ႇၺွင်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မီးၵူၼ်းၶဝ်ႈမႃးယိုဝ်းမၼ်းထိုင်ၼႂ်းလုမ်း။ ပဵၼ် ၼမ်ႉမိုဝ်း ၽႂ်တႄႉ ဢမ်ႇႁူႉ။ ၵူၼ်းမႃးယိုဝ်းၼၼ်ႉ ပဵၼ်ၵူၼ်းၼုမ်ႇၼႆၶႃႈဢေႃႈ။ ၵူၼ်းလူင်ဝၢၼ်ႈၺႃးမၢၵ်ႇၵွင်ႇ 3 လုၵ်ႈသေ လူႉတၢႆၵႂႃႇ”- ဝႃႈၼႆ။
ဢူးၵူဝ်ႇၵူဝ်ႇမိၼ်ႉၼႆႉ မိူဝ်ႈပူၼ်ႉမႃး ပဵၼ်ၽူႈၶဝ်ႈၸုမ်းၵေႃႇမတီႇၵဝ်ႇ ပႃႇတီႇသၢင်ႇသီႈ (USDP) ၸႄႈဝဵင်းတူၼ်းတီႈ ။
ၼွၵ်ႈလိူဝ်ၼၼ်ႉ မိူဝ်ႈဝႃး ဝၼ်းတီႈ 6/6/2022 တီႈပွၵ်ႉႁွင်ႈလိုၵ်ႉ ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်းၵေႃႈ ထူပ်းႁၼ် တူဝ်တၢႆၽူႈၸၢႆး ၵေႃႉၼိုင်ႈ ဢႃယုမွၵ်ႈ 30 ပီ။ မၼ်းၸၢႆး တိူဝ်ႉၺႃး မၢၵ်ႇၵွင်ႈ 8 လုၵ်ႈ၊ ၶႃၵေႃႈႁၢၵ်း ၸွမ်းတူဝ် ၵေႃႈမီးဝႆႉႁွႆးပေႃႉထုပ်ႉ ။
ဢိင်ၼိူဝ် လွင်ႈၼႆႉ ယူႇတီႈ ၸုမ်းပရႁိတ ဝဵင်းတႃႈၶီႈလဵၵ်း လႆႈဢဝ်တူဝ်တၢႆၵႂႃႇဝႆႉတီႈႁူင်းယႃ ။ ယၢမ်းလဵဝ် ယူႇတီႈ ပလိၵ်ႈမၢၼ်ႈၶဝ် တိုၵ်ႉ ၵူတ်ႇထတ်းၸွပ်ႇတူၺ်း လွင်ႈပိူင်ပဵၼ်မၼ်းဝႆႉယူႇ ဝႃႈၼႆ။