ၽူႈတူင်ႉၼိုင် ၼႂ်းၵေႃလိၵ်ႈလၢႆးတႆး မိူင်းယၢင်းၽိူၵ်ႇ ၺႃးယိုဝ်းတၢႆ ၵေႃႉၼိုင်ႈ

လုင်းၸၢႆးဝုၼ်းဢွင်ႇ  ၽူႈဢွၼ်ႁူဝ်ၼႂ်းၸုမ်း ၵေႃလိၵ်ႈလၢႆးတႆး ၺႃးငွႆးယိုဝ်းတၢႆ တီႈႁိူၼ်းမၼ်းၸၢႆး တီႈဝၢၼ်ႈငႃးဢဵင်ႇၸု ဝၢၼ်ႈတႆး ဝဵင်းၽႃပုၼ် ၸႄႈမိူင်းယၢင်းၽိူၵ်ႇ။

ဝၼ်းတီႈ 31/5/2022 ယၢမ်းႁူဝ်ၶမ်ႈ မွၵ်ႈ 5 မူင်း လုင်းၸၢႆးဝုၼ်းဢွင်ႇ ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းၽႃပုၼ် ၸႄႈမိူင်းယၢင်းၽိူၵ်ႇ ထုၵ်ႇၵူၼ်းဢမ်ႇႁူႉၾၢႆႇ ဢဝ်ၵွင်ႈယိုဝ်းမႅၼ်ႈ (သၼၢႆႇပႃႇ) ယိုဝ်းသႂ်ႇတီႈၵွၵ်းႁူဝ်မၼ်းၸၢႆးသေ လႆႈလူႉတၢႆထင်တီႈ ၼႂ်းႁိူၼ်း။

ၵူၼ်းဝဵင်းၽႃပုၼ် လၢတ်ႈတီႈၽူႈတွႆႇႁွၵ်ႈဝႃႈ – “ၽွင်းမၼ်းၸၢႆး တိုၵ်ႉလၢင်ႉဢၢင်ႇၵဵပ်းၼမ်ႉ တီႈႁိူၼ်းမၼ်းၸၢႆးၼၼ်ႉ မီးၵူၼ်းယူႇ တီႈၵႆၵႆသေ ဢဝ်ၵွင်ႈသၼၢႆႇပႃႇယိုဝ်းသႂ်ႇ တီႈၵွၵ်းႁူဝ်မၼ်းၸၢႆး လႆႈလူႉတၢႆထင်တီႈၵမ်းလဵဝ်။  လုင်းၸၢႆးဝုၼ်းဢွင်ႇၼႆႉ ပဵၼ်ၵူၼ်းလီ တူင်ႉၼိုင်ႁဵတ်းၵၢၼ်တႃႇတူင်ႇဝူင်းၵူၼ်း ၵႂႃႇမႃးၶဝ်ႈဢွၵ်ႇလႆႈ ၵူၼ်းတင်းၼမ်။ ယဝ်ႉၵေႃႈ ဢမ်ႇမီးၽူႈၶဵၼ် လႄႈ ဢမ်ႇတွၼ်ႉမီးလွင်ႈၽိတ်းၽႅၵ်ႇၵၼ်တင်းၽႂ်သေပွၵ်ႈ  ” – ဝႃႈၼႆ။

ဢိင်ၼိူဝ် လွင်ႈၼႆႉ ယူႇတီႈ ၵူၼ်းႁိူၼ်းလႄႈၵူၼ်းၼႂ်းဝၢၼ်ႈ ဢွၼ်ၵၼ်တူၵ်းၸႂ်လႄႈ ဢမ်ႇမီးလွင်ႈႁူမ်ႇလူမ်ႈ၊ လွမ်ၵူဝ်ႁႄဝႃႈ တေၺႃးၵမ်း ၵဝ်မိူဝ်ႈလႂ်ၼႆသေ ပဵၼ်ဢၼ် လွၵ်ႇငိုတ်ႈၸႂ် ဝႆႉယူႇ ၵူႈၶၢဝ်းယၢမ်း ၵူၼ်း ဝဵင်းၽႃပုၼ်လၢတ်ႈ။  

 တူဝ်တၢႆမၼ်းၸၢႆးၵေႃႈ ၵူၼ်းႁိူၼ်းလႄႈၵူၼ်းဝၢၼ်ႈ ဢမ်ႇႁတ်းၵႂႃႇၽဝ်/ၾင်တီႈပႃႇႁဵဝ်ႈလီလီ၊ လႆႈလၵ်ႉလွမ်ဢဝ်ၵႂႃႇၾင်ဝႆႉတီႈဢမ်ႇၵႆဝၢၼ်ႈၼၼ်ႉၵူၺ်း။ လွင်ႈႁၢင်ႈႁႅၼ်းလူႇ တၢၼ်းၸိူဝ်းၼႆႉၵေႃႈ ၵူၼ်းႁိူၼ်းတင်း ၵူၼ်းဝၢၼ်ႈ ပႆႇႁတ်းႁဵတ်းပၼ် ဝႃႈၼႆ။

“ယွၼ်ႉပိူဝ်ႈႁဝ်းၶႃႈၵူၼ်းဝၢၼ်ႈတင်းသဵင်ႈတိုၵ်ႉလႆႈယူႇၼႂ်းငဝ်းလၢႆး ဢၼ်လီၵူဝ် ဢၼ်ဢမ်ႇမီးလွင်ႈႁူမ်ႇလူမ်ႈသင်သေဢိတ်းၼၼ်ႉယဝ်ႉၶႃႈ။”- ၵူၼ်းၽႃပုၼ်လၢတ်ႈၼင်ႇၼႆ။

ၵူၼ်းယိပ်းၵွင်ႈၼၼ်ႉ ပဵၼ်ၸုမ်းလႂ် ၼမ်ႉမိုဝ်းၽႂ် ၼႆၸိူဝ်းၼႆႉ ၵူၼ်းဝၢၼ်ႈ လႅပ်ႈလၢမ်းႁူႉလႆႈယူႇသေတႃႉ ယၢမ်းလဵဝ် တိုၵ်ႉပဵၼ်ငဝ်းလၢႆး ဢမ်ႇမီး လွင်ႈႁူမ်ႇလူမ်ႈ ယွၼ်ႉၼၼ်ႉ ပႆႇထိုင်ၶၢဝ်းလႄႈ ပႆႇၸၢင်ႈလၢတ်ႈၼႄၵၼ် ၵူၼ်း ဝဵင်းၽႃပုၼ်လၢတ်ႈ။

တီႈဝဵင်းၽႃပုၼ် ပွတ်းဝၢၼ်ႈ ငႃးဢဵင်ႇၸု (ဝၢၼ်ႈတႆး) ဢၼ်ၸၢႆးဝုၼ်းဢွင်ႇၶဝ်ယူႇသဝ်းၼႆႉ မီးသိုၵ်း KNU/KNLA တပ်ႉၸုမ်း 5 တူင်ႉၼိုင်ၵႂႃႇမႃး။ ၵူၺ်းၵႃႈ ၸၢႆးဝုၼ်းဢွင်ႇၼႆႉ ဢမ်ႇၸႂ်ႈၵူၼ်းၵမ်ႉထႅမ်သိုၵ်းမၢၼ်ႈ ၊ ဢမ်ႇၸႂ်ႈၵူၼ်းႁဵတ်းၵေႃႉၸုမ်းသိုၵ်းၸုမ်းလႂ်  ယွၼ်ႉသင်လႄႈၺႃးၶႃႈတၢႆ ဢမ်ႇႁူႉ ၵူၼ်းဝၢၼ်ႈလၢတ်ႈၼင်ႇၼႆ။

 တီႈဝဵင်းၽႃပုၼ်ၼႆႉမီးႁူဝ်ၼပ်ႉၵူၼ်းတႆး 8474 ၵေႃႉ။ တီႈဝၢၼ်ႈ ငႃးဢဵင်ႇၸု ဝၢၼ်ႈတႆးၼႆႉႁူဝ်ၵူၼ်းတႆး မီး 300 ပၢႆ။

 လွင်ႈၼႆႉ ၾၢႆႇၽူႈတွႆႇႁွၵ်ႈၶတ်းၸႂ်ၵပ်းသိုပ်ႇတူၺ်းတီႈ သိုၵ်း KNU/KNLA ယူႇၵေႃႈ ၵပ်းသိုပ်ႇဢမ်ႇလႆႈလႄႈဢမ်ႇၸၢင်ႈတွင်ႈထၢမ်လွင်ႈတၢင်းပိူင်ပဵၼ်။