ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ၶဝ်ႈထမ်ႈ ဢတိတ်ႉထၢၼ်ႇ တိုဝ်းၵမ်သိလ်ထမ်း 3 ပီ 3 လိူၼ်ပၢႆ 3 ဝၼ်း တီႈထမ်ႈမိူင်းၵႅတ်ႇ တေတဵမ်ယဝ်ႉ ဝႃႈၼႆႉသေ တေဢွၵ်ႇထမ်ႈဝၼ်းလႂ်တႄႉ ပႆႇႁူႉတႅတ်ႈတေႃး ႁူဝ်ပဝ်ႈၵိင်ႇၽႄငဝ်ႈငုၼ်း မုၵ်ႉၸုမ်းလူင်သင်ႇၶႃႇ ၸိုင်ႈတႆးပွတ်းဢွၵ်ႇၶူင်းလၢတ်ႈ။  

ၸဝ်ႈၶူးလူင် ၺႃႇၼသီႇရိ (ၸဝ်ႈမၢၼ်ႇတႃဢွၼ်ႇ) ႁူဝ်ပဝ်ႈၵိင်ႇၽႄငဝ်ႈငုၼ်း မုၵ်ႉၸုမ်းလူင် သင်ႇၶႃႇ ၸိုင်ႈတႆး ပွတ်းဢွၵ်ႇၶူင်း လၢတ်ႈတီႈၽူႈ တွႆႇႁွၵ်ႈဝႃႈ – “တွၼ်ႈတႃႇ ၸဝ်ႈၶူးဝႃးပေႃႈႁဝ်း တေဢွၵ်ႇထမ်ႈတႄႉ တႅတ်ႈတေႃးယဝ်ႉ။ ၵူၺ်းၵႃႈ ဝၼ်းတေဢွၵ်ႇထမ်ႈၼၼ်ႉ တေပဵၼ်ဝၼ်းလႂ် တႄႉ ဢၼ်ဝႃႈၼၼ်ႉ ပႆႇႁူႉ။ ယွၼ်ႉဝႃႈ ၸဝ်ႈႁဝ်း တႅမ်ႈလိၵ်ႈဢွၵ်ႇမႃး မိူဝ်ႈဝၼ်းလိူၼ် 6 လပ်းၼၼ်ႉ ၸဝ်ႈႁဝ်းဝႃႈ ဝၼ်းၸဝ်ႈႁဝ်း ၶဝ်ႈထမ်ႈ ၼၼ်ႉ ဢမ်ႇပေႃးတွင်းလီ ပဵၼ်ဝၼ်းလႂ်တႄႉတႄႉ ၵွပ်ႈၼႆ ပဵၼ်ဝၼ်းလႂ်ၼႆ ႁႂ်ႈတႅမ်ႈလိၵ်ႈပွင်ႇၶၢဝ်ႇၶိုၼ်ႈမႃးလူးၼႆသေ မိူဝ်ႈလဵဝ် လႆႈတႅမ်ႈလိၵ်ႈ ပွင်ႇၶၢဝ်ႇၸူးၶိုၼ်းယဝ်ႉ။ ပွင်ႇဝႃႈ ဝၼ်းလႂ် တေဢွၵ်ႇထမ်ႈတႅတ်ႈတေႃးၼၼ်ႉ ယူႇတီႈၶူးဝႃးပေႃႈ တေတႅမ်ႈလိၵ်ႈမႃးထႅင်ႈၽိုၼ်ၼိုင်ႈသေ ၸင်ႇ တေႁူႉဝၼ်းဢွၵ်ႇမၼ်းယဝ်ႉ”- ဝႃႈၼႆ။

ဢိင်ၼိူဝ် လွင်ႈၼႆႉ ယူႇတီႈ သင်ၶၸဝ်ႈ လုၵ်ႈၼွင်ႉတပႄးလုၵ်ႈသိတ်ႇ တႅမ်ႈလိၵ်ႈသေ ပွင်ႇလႅင်း သူင်ႇၶိုၼ်ႈၵႂႃႇဝႃႈ ၸဝ်ႈသိလ်ထမ်း ၶူးဝႃးဝုၼ်း ၸုမ်ႉ တႄႇၶဝ်ႈထမ်ႈ ၼႂ်းဝၼ်းတီႈ 28/4/2019 ယူႇတီႈ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ တေၼပ်ႉသွၼ်ႇသေ ၸင်ႇတေပွင်ႇၶၢဝ်ႇ မႃးၸူးၶိုၼ်း ။  မိူဝ်ႈၽွင်းၼၼ်ႉ ၸင်ႇတေႁူႉ ဝၼ်းဢွၵ်ႇထမ်ႈတႅပ်ႈတေႃးလီယဝ်ႉ ၸဝ်ႈၶူးလူင် ၺႃႇၼသီႇရိလၢတ်ႈ။

မိူဝ်ႈဝၼ်းလိူၼ် 6 လပ်းၼၼ်ႉ ယူႇတီႈ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ တႅမ်ႈလိၵ်ႈဢွၵ်ႇမႃး တီႈထမ်ႈမိူင်းၵႅတ်ႇၼၼ်ႉသေ သင်ႇလၢတ်ႈဝႆႉ ႁႂ်ႈ လုၵ်ႈၼွင်ႉတပေး လုၵ်ႈသိတ်ႇ ႁၢင်ႈႁႅၼ်း ၸတ်းၶူဝ်းလူႇတၢၼ်းဝႆႉ တႃႇတေပႂ်ႉလူႇ ၽွင်းဢွၵ်ႇထမ်ႈ ဝႃႈၼႆ။

ၸဝ်ႈသိလ်ထမ်းၶူးဝႃး ဝုၼ်းၸုမ်ႉ ၶဝ်ႈတိုဝ်းၵမ်သိလ် တီႈထမ်ႈလူင် မိူင်းၵႅတ်ႇ ဢတိတ်ႉထၢၼ်ႇဝႆႉ တႃႇၶၢဝ်းတၢင်း 3 ပီ 3 လိူၼ်ပၢႆ 3 ဝၼ်း ၸဝ်ႈ တႄႇၶဝ်ႈထမ်ႈ မိူဝ်ႈဝၼ်းတီႈ 28/4/2019 သေ ပေႃးထိုင်မႃး ဝၼ်းတီႈ 1/8/2022 ၼႆႉ တေၶွပ်ႈတဵမ် 3 ပီ 3 လိူၼ် 3 ဝၼ်းယဝ်ႉ။