ၵူၼ်းၾၢႆၶုၼ်  ပၢႆႈၽေးသိုၵ်း ႁွတ်ႈထိုင်ၸႄႈဝဵင်းသီႇသႅင်ႇ ၼပ်ႉႁူဝ်ႁဵင် ယၢမ်းလဵဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်  ႁၢဝ်ႈႁႅင်း။

တႄႇဢဝ် ၵၢင်လိူၼ်မေႊ 2022 ၼႆႉမႃး ၶွင်ႇသီႇသိုၵ်းမၢၼ်ႈ ယိုတ်းမၢၼ်ႈတင်း ၸုမ်းၵႅတ်ႇၶႄၵူၼ်းမိူင်း PDF ပဵၼ်ပၢင်တိုၵ်းၵၼ် ႁၢဝ်ႈႁႅင်း ၵူၼ်းမိူင်း ၸႄႈဝဵင်းၾၢႆၶုၼ်  ပၢႆႈၽေးသိုၵ်း မႃးသွၼ်ႈဝႆႉတီႈ ၸႄႈဝဵင်းသီႇသႅင်ႇ ၸိုင်ႈတႆး ပွတ်းၸၢၼ်း ႁူဝ်ၵူၼ်းဢမ်ႇယွမ်း 5 ႁဵင်  ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းသီႇသႅင်ႇ လၢတ်ႈတီႈၽူႈတွႆႇႁွၵ်ႈဝႃႈ -“ၼႂ်းဝူင်ႈၼႆႉမႃး ၵူၼ်းမိူင်းၾၢႆၶုၼ် – မိူင်းပၢႆး ၵမ်ႈၽွင်ႈ ဢွၼ်ၵၼ် ပၢႆႈမႃး တီႈသီႇသႅင်ႇၼႆႉ ဢမ်ႇယွမ်း 5 ႁဵင်ၼႆႉၶႃႈ။ ၵမ်ႈၼမ် ပၢႆႈမႃးသွၼ်ႈဝႆႉ တၢင်းဢိူင်ႇတၢမ်ၽၢၵ်ႇ ယၢမ်းလဵဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်း ၵိၼ်ႁႅင်းၶႃႈဢေႃႈ။ တေႃႈလဵဝ်တႄႉ တိုၵ်ႉၵဵပ်းသဵၼ်ႈမၢႆ ႁူဝ်ၵူၼ်းဝႆႉယူႇ”-  ဝႃႈၼႆ။

ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈ ၸႄႈဝဵင်းသီႇသႅင်ႇၼႆႉ  မႃးသွၼ်ႈဝႆႉ တီႈၼႂ်းဢိူင်ႇတၢမ်ၽၢၵ်ႇ ၸွမ်းႁိူၼ်းယေးပီႈ ၼွင်ႉၽႂ်မၼ်း ၊ ၸွမ်းဝတ်ႉဝႃးၽႃသိူဝ်ႇ ၸလွပ်ႈ ၸိူဝ်းၼႆႉ။  

ၼွၵ်ႈလိူဝ်ၼၼ်ႉ ၵူၼ်းမိူင်းယၢင်းလႅင် ဢၼ်ပၢႆႈမႃးသွၼ်ႈဝႆႉ တီႈဝဵင်းသီႇသႅင်ႇ တင်ႈတႄႇ ႁူဝ်ပီၼႆႉမႃးၵေႃႈ တေႃႇထိုင်ယၢမ်းလဵဝ် ပႆႇၸၢင်ႈပွၵ်ႈ ႁိူၼ်းၵၼ် တိုၵ်ႉမီးယူႇ ပေႃးႁူမ်ႈၵၼ် တင်းၵူၼ်းပၢႆႈၽေးသိုၵ်းၵဝ်ႇလႄႈမႂ်ႇၸိုင် တေမီးမွၵ်ႈ ၼိုင်ႈမိုၼ်ႇၼႆႉ ဝႃႈၼႆ။  

“ၵူၼ်းပၢႆႈၽေးၼႆႉ ပေႃးႁူမ်ႈၵၼ် ၵူၼ်းၵဝ်ႇ ၵူၼ်းမႂ်ႇၼႆႉတႄႉ တေမီးမွၵ်ႈ မိုၼ်ႇၼႆႉၶႃႈ။ ၵူၼ်းမိူင်းယၢင်းလႅင်ၵေႃႈ ပႆႇၸၢင်ႈပွၵ်ႈ တိုၵ်ႉၵိုတ်းတင်း ၼမ်ယူႇ။ တၢင်းၼၼ်ႉၵေႃႈ မၢင်ၵေႃႉ ဢမ်ႇၸၢင်ႈ ပွၵ်ႈႁိူၼ်းယဝ်ႉ ယွၼ်ႉႁိူၼ်းယေးၶဝ် ထုၵ်ႇၾႆးၽဝ်၊ ထုၵ်ႇယႃႉၵွႆလႄႈ ယဝ်ႉၵေႃႈ မၢၵ်ႇလူင်ၶမ်ဝႆႉ ၼႂ်းဝၢင်းႁိူၼ်း ၸိူဝ်းၼႆႉၵေႃႈမီး ၼႆၶႃႈဢေႃႈ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄၼင်ႇၼႆ။

ၵၢင်လိူၼ်မေႊ 2022 ၼႆႉၵူၺ်း ၵူၼ်းမိူင်းၾၢႆၶုၼ် ႁူဝ်ၵူၼ်းႁဵင်းပၢႆ ပၢႆႈၽေးသိုၵ်း ႁွတ်ႈထိုင်ဝဵင်းလွႆၶေႃ ၸႄႈမိူင်းယၢင်းလႅင် ၼၼ်ႉၵေႃႈ လူဝ်ႇ တၢင်းၸွႆႈထႅမ် ၶဝ်ႈၼမ်ႉတၢင်းၵိၼ် ၶွင်ၵိၼ်ယႅမ်ႉႁၢဝ်ႈႁႅင်း မိူၼ်ၵၼ် ၼႆယဝ်ႉ။

ၼွၵ်ႈလိူဝ်ၼၼ်ႉ ၵၢင်လိူၼ်မေႊ 2022 ၼႆႉၵေႃႈ ၵူၼ်းမိူင်းၾၢႆၶုၼ် ႁူဝ်ၵူၼ်းႁဵင်ပၢႆ ပၢႆႈၽေးသိုၵ်း ႁွတ်ႈထိုင် ဝဵင်းလွႆၶေႃႈ ၸႄႈမိူင်းယၢင်းလႅင် ၼၼ်ႉၵေႃႈ လူဝ်ႇတၢင်းၸွႆႈထႅမ် ၶွင်ၵိၼ်ယႅမ်ႉ ႁၢဝ်ႈႁႅင်း မိူၼ်ၵၼ် ၼႆယဝ်ႉ။