ၵဵၵ်ႉ/လၢၼ်ႇ သိုၵ်းမၢၼ်ႈလႄႈပၢႆးယူႇလီႁူမ်ႈၵၼ်တင်ႈဝႆႉတင်းၶဝ်ႈ/ဢွၵ်ႇ ဝဵင်းလွၵ်ႉၸွၵ်ႇၼၼ်ႉ ႁဵတ်းႁႂ်ႈၵူၼ်းမိူင်းၵႂႃႇမႃးႁႃၵိၼ်လဵင်ႉတွင်ႉယၢပ်ႇ၊ ၸိူင်ႉၵၢတ်ႈၶၢဝ်းယၢမ်းၼႃႇလႄႈ ၶႂ်ႈႁႂ်ႈပူတ်းထွၼ်ဝႆးဝႆးဝႃႈၼႆ။

 လၢၼ်ႇၼႆႉ တင်ႈတၢင်းၶဝ်ႈဝဵင်းလွၵ်ႉၸွၵ်ႇ – ယွင်ႁူၺ်ႈ၊ လွၵ်ႉၸွၵ်ႇ – တူၼ်ႈတီးလႄႈ တၢင်းၼႃႈတပ်ႉသိုၵ်းမၢၼ်ႈပထူး လွၵ်ႉၸွၵ်ႇ – ၼမ်ႉလၼ်ႈ၊ တႄႇတင်ႈ ၸဵမ်မိူဝ်ႈ  ဝၼ်းတီႈ 1/4/2022  မႃး တေႃႇထိုင်ယၢမ်းလဵဝ် ၊ ၸမ် 2 လိူၼ်ယဝ်ႉ ၊ ၵူၼ်းဝၢၼ်ႈၵူၼ်းသူၼ် ၶဝ်ႈ/ဢွၵ်ႇ ၺႃးထတ်းၵူႈၵမ်းလႄႈ ပဵၼ်ဢၼ်သုၵ်ႉၸႂ် ၶွင်ႈၶမ်ၼႂ်းၼႃႈၵၢၼ်တႃငၢၼ်းတႄႉတႄႉဝႃႈၼႆ။

ၵူၼ်းလွၵ်ႉၸွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ – “တၢင်ႇဝဵင်းတႄႉ ပိူၼ်ႈပေႃး ဢမ်ႇတင်ႈၵဵၵ်ႇ/ လၢၼ်ႇ ၵူတ်ႇထတ်း ဝႂ်ၶူဝ်ႊဝိတ်ႉၵၼ်ယဝ်ႉ။ ႁဵတ်းသင် တီႈလွၵ်ႉၸွၵ်ႇၼႆႉ တိုၵ်ႉၵူတ်ႇထတ်းယူႇ တေႃႇထိုင်ယၢမ်းလဵဝ်ၵေႃႈ ပႆႇပူတ်း ႁဵတ်းႁႂ်ႈၵူၼ်းမိူင်းၵႂႃႇမႃး ဢမ်ႇလွတ်ႈလႅဝ်း တေလႆႈပႃးဝႂ်ၶူဝ်ႊဝိတ်ႉ မၢႆၾၢင် တင်းသွင်ဢၼ်ၼႆႉ ၸင်ႇတေၵႂႃႇမႃးလႆႈ သင်ဢမ်ႇပႃးၸိုင် တိုၼ်းဢမ်ႇပၼ်ၵႂႃႇမႃးၶႃႈ” – ဝႃႈၼႆ။

  လၢၼ်ႇ ၵူတ်ႇထတ်းၼႆႉ တႄႇၵၢင်ၼႂ် 7 မူင်း ထိုင် 12 မူင်းၵၢင်ဝၼ်း  ။ ပိူင်လူင်ပေႃးပဵၼ်ၵူၼ်းၼုမ်ႇ ၽူႈၸၢႆးၼႆ ႁႄႉသေၵူတ်ႇထတ်းထဵတ်ႈထၢမ်ႁၢဝ်ႈႁႅင်း။ သိုၵ်းမၢၼ်ႈၵူဝ်ပဵၼ်လုၵ်ႈဢွၼ်ႇသိုၵ်း PDF ၵူၼ်းပိုၼ်ႉတီႈလၢတ်ႈ။

“  ပေႃးပဵၼ်ရူတ်ႉၶိူင်ႈသမ်ႉ တေၵူတ်ႇထတ်းပႃးတႂ်ႈၵွပ်းၼင်ႈ ၸိူဝ်းၼႆႉ။ ယဝ်ႉၵေႃႈ ပေႃးပဵၼ်ၵႃးသမ်ႉ တေၵူတ်ႇထတ်း ၼႂ်းၵႃး ၼႆၸိူဝ်းၼႆႉ။   မိူင်းႁဝ်းၶႃႈၼႆႉ ပဵၼ်ဝဵင်းသိုၵ်းႁိုဝ်ၵေႃႈ ဢမ်ႇႁူႉ ပေႉၵႂႃႇမႃးယၢပ်ႇၽိုတ်ႇပဵၼ်တၢၼ်ႇၼႆႉ ။ မၢင်ဝဵင်းတႄႉ ပိူၼ်ႈပေႃးပူတ်းယဝ်ႉ လၢၼ်ႇၸိူဝ်းၼႆႉ။ မိူင်းႁဝ်းၵေႃႈ လူဝ်ႇပူတ်းယဝ်ႉ လၢၼ်ႇၼႆႉ” – ၵူၼ်းလွၵ်ႉၸွၵ်ႇ ပိုတ်ႇဢူၵ်းပိုတ်ႇၸႂ်ဝႆႉၼင်ႇၼႆ။

 ဝဵင်းလွၵ်ႉၸွၵ်ႇၼႆႉ ပဵၼ်ဝဵင်းဢၼ်တိတ်းၸပ်းလႅၼ်လိၼ် မိူင်းတႆးပွတ်းၸၢၼ်းလႄႈပွတ်းႁွင်ႇ။ ပဵၼ်ဝဵင်းဢၼ်မီးတီႈၼႃႈလိၼ်လမ်ႇလွင်ႈသေဢမ်ႇၵႃး မီးပႃႇထိူၼ်ႇလိုၵ်ႉ၊  ၶူဝ်းၶွင်သၽႃႇဝ ၶႅမ်ႉ။   

သိုၵ်းမၢၼ်ႈၸင်ႇဢဝ်ၶေႃႈဢၢင်ႈဝႃႈ တႃႇၵေႃႇသၢင်ႈႁူင်းႁဵၼ်းသွၼ်ၵၢၼ်သိုၵ်းၼႂ်းၸိုင်ႈတႆးပွတ်းၸၢၼ်း ၼႆသေ မႃးတင်ႈတပ်ႉဝႆႉ မိူဝ်ႈပီ 1953 တီႈ ၾၢႆႇႁွင်ႇဝဵင်းလွၵ်ႉၸွၵ်ႇ မွၵ်ႈ 2 လၵ်း။ ယၢမ်းလဵဝ်တႄႉ မီးၵူႈႁွင်ႈၵၢၼ် ဢၼ်ၵဵဝ်ႇၵပ်းတပ်ႉသိုၵ်းမၢၼ်ႈ ၊ လုၵ်ႈမေးၵူၼ်းသိုၵ်းလႄႈ သိုၵ်းၸိူဝ်းလိုဝ်ႈၵၢၼ်ၸိူဝ်းၼႆႉၵေႃႈယူႇသဝ်းတီႈ ဝဵင်းပႃႉထူးဝႆႉ။