ၼႂ်းၸႄႈဝဵင်းၼမ်ႉၶမ်း ၽူႈလၵ်ႉၵူၼ်းၸူၼ် လိူင်ႇၼမ် တေႃႈၼင်ႇ သၢႆၾႆးၾႃႉတီႈသဝ်လၵ်းၾႆးၵေႃႈ ဢမ်ႇဝႆႉ ၵႅတ်း(တတ်း) ၶၢတ်ႇသေ ၵႄႈဢဝ် သဵၼ်ႈတွင်းတၢင်းၼႂ်းမၼ်း ၵႂႃႇၶၢႆ။
တႄႇဢဝ် ၼႂ်းလိူၼ်ဢေႊပရိူဝ်ႊ 2022 မႃးတေႃႇထိုင်ယၢမ်းလဵဝ် ၼႂ်းၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ မီးၵူၼ်းလၵ်ႉ ၵႅတ်း သၢႆၾႆးၾႃႉ ၵူၼ်းမိူင်း ၸွမ်းၼႂ်းပွၵ်ႉ/ ယွမ်ႇ ။ ႁိူၼ်းၺႃးလၵ်ႉသၢႆၾႆး ဢမ်ႇယွမ်း 10 လင်ယဝ်ႉ။ မၢင်ပွၵ်ႈ ပၢႆလၵ်ႉတတ်းပႃး လဵၵ်းၼၢမ်ႁူဝ်ႉ ၸိူဝ်းၼႆႉ ၵႂႃႇပႃးထႅင်ႈ လူးၵွၼ်ႇ ၵူၼ်းၼမ်ႉၶမ်းလၢတ်ႈ။
ၵူၼ်းၼမ်ႉၶမ်း ဢႃယု 40 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မီးၵူၼ်းလၵ်ႉၶိုၼ်ႈသဝ်ၾႆးၾႃႉသေ တတ်းသၢႆၾႆး ဢၼ်လုၵ်ႉ တီႈသဝ်ၾႆးၶဝ်ႈမႃးၸူး တီႈႁိူၼ်းၼၼ်ႉ ၶဝ်ၵႅတ်းလူင်းသေ ၵႅတ်းဢဝ် သၢႆၾႆးမၼ်းၵႂႃႇ။ ပေႃးယဝ်ႉ ၶဝ်လွၵ်ႈၵွၵ်းဢဝ် သၢႆတွင်းတၢင်းၼႂ်းမၼ်းၵႂႃႇ ၸၢင်ႈၶၢႆ တီႈႁၢၼ်ႉႁပ်ႉသိုဝ်ႉလဵၵ်ႉ (ယွၵ်း/ ၵဝ်ႇ) ၸိူဝ်းၼၼ်ႉ။ ၵမ်ႈၼမ် ၶဝ်တေလၵ်ႉၵႅတ်းယၢမ်းၵၢင်ၶိုၼ်းလိုၵ်း ၽွင်းၵူၼ်းၼွၼ်းလပ်းယဵၼ်”- ဝႃႈ ၼႆ။
သၢႆၾႆးဢၼ်ၺႃးတတ်းၼၼ်ႉသမ်ႉ လႆႈ ၵႂႃႇႁွင်ႉၾၢႆႇၾႆးၾႃႉ EPC မႃးသိုပ်ႇပၼ်ၶိုၼ်း ၼိုင်ႈပွၵ်ႈ လႆႈ ပၼ်ၵႃႈတေႃႇ သၢႆၾႆး ဢမ်ႇယွမ်းသႅၼ်ပျႃးဝႃႈၼႆ။
“သင်ဝႃႈ သၢႆၾႆးႁိူၼ်းႁဝ်း ထုၵ်ႇတတ်းၶၢတ်ႇၵႂႃႇယဝ်ႉ ၵမ်းၼႆႉ ပေႃးၵႂႃႇႁွင်ႉၾၢႆႇၾႆးၾႃႉ EPC မႃးသႂ်ႇပၼ် ပႃးသၢႆၾႆး၊ ၵႃႈႁႅင်းၶဝ် လႆႈပၼ် ၼိုင်ႈ ပွၵ်ႈ သႅၼ်ပၢႆ။ ၵူၼ်းလၵ်ႉၸိူဝ်းၼၼ်ႉၵေႃႈ ၶဝ်လႅတ်းၼႃႇ ၵမ်ႉၵႂႃႇတတ်းပွၵ်ႉၼိုင်ႈယဝ်ႉ ပွၵ်ႉၼိုင်ႈ ႁဵတ်းၼႆ ၶႂ်ႈဝႃႈၸွတ်ႇၵူႈပွၵ်ႉယဝ်ႉၶႃႈယူဝ်ႉ။ ဢၼ် ၶႃႈႁူႉၼႆႉ ႁိူၼ်းယေးၵူၼ်းဝၢၼ်ႈ ၺႃးတတ်းသၢႆၾႆးၸိူင်ႉၼႆ ဢမ်ႇယွမ်း 10 လင်ယဝ်ႉ”- ၵူၼ်းၼမ်ႉၶမ်း သိုပ်ႇလၢတ်ႈၼႄၼင်ႇၼႆ။
ၵူၼ်းဝၢၼ်ႈတႄႉလၢတ်ႈဝႃႈ သင်ဝႃႈ ႁၢၼ်ႉႁပ်ႉသိုဝ်ႉလဵၵ်း ဢမ်ႇႁပ်ႉသိုဝ်ႉ လဵၵ်းဢၼ်ၽူႈလၵ်ႉဢဝ်မႃးၶၢႆၼၼ်ႉတႄႉ ၽူႈလၵ်ႉၸိူဝ်းၼႆႉ တေၸၢင်ႈလူတ်း လွင်ႈၵၢၼ်လၵ်ႉ လဵၵ်းယွၵ်း/ ၵဝ်ႇ သၢႆၾႆး ၸိူဝ်းၼႆႉမႃးတင်းၼမ်ယူႇ ဝႃႈၼႆ။
ၵူၼ်းၼမ်ႉၶမ်း ၽူႈယိင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူၼ်ၵူၼ်းလၵ်ႉလႄႈ ၵူၼ်းႁပ်ႉသိုဝ်ႉၼႆႉ ၶဝ်တေႁူႉၵၼ်ႁိုဝ်ၵေႃႈ ဢမ်ႇႁူႉ ယဝ်ႉ ၵေႃႈ ၾၢႆႇၾႆးၾႃႉသေ ႁၢၼ်ႉႁပ်ႉသိုဝ်ႉလဵၵ်းသမ်ႉ ႁပ်ႉသိုဝ်ႉတိၵ်းတိၵ်း ၶႂ်ႈဝႃႈတႄႉ ဢမ်ႇထုၵ်ႇလီၵဵပ်းသိုဝ်ႉ ပေႃးႁူႉဝႃႈ ၶဝ်လၵ်ႉမႃးၶၢႆပၼ်ၸိူင်ႉၼႆ မိူၼ် ပၼ်ႁႅင်းၵူၼ်းလၵ်ႉ ႁႂ်ႈၶဝ်လၵ်ႉတိၵ်းတိၵ်းၼၼ်ႉၵူၺ်း၊ ၼႂ်းၼမ်ႉၶမ်းၼႆႉ ႁၢၼ်ႉဢၼ်ႁပ်ႉသိုဝ်ႉၼႆႉ တေမီး 5-6 တီႈ မိူၼ်ၼင်ႇ ပွၵ်ႉဢွင်ႇသျၢမ်းသႃႇ၊ ၵွင်းၵလႃးလႄႈ ပွၵ်ႉၼိူဝ် ၸိူဝ်းၼႆႉ”- ဝႃႈၼႆ။
ၽူႈလၵ်ႉၼႆႉ ဢမ်ႇၵႃး လၵ်ႉတတ်းဢဝ်သၢႆၾႆးၾႃႉ ၶွင်ၵူၼ်းမိူင်းၵူၺ်း တေႃႇၼင်ႇ လဵၵ်းႁူဝ်ႉၼၢမ်၊ လဵၵ်းႁွင်ႈၼမ်ႉ။ လဵၵ်းယွၵ်း/ ၵဝ်ႇ ဢၼ်ဢဝ် ႁႄႉဝႆႉ ၸွမ်းႁူဝ်ႉ/ ၸွမ်းသူၼ် ၸိူဝ်းၼႆႉ ဢမ်ႇဝႆႉ/ ဢမ်ႇၵိုတ်း လၵ်ႉဢဝ်ၵႂႃႇၶၢႆမူတ်း ၵူၼ်းၼမ်ႉၶမ်းလၢတ်ႈ။
မိူဝ်ႈဝၼ်းတီႈ 27/3/2022 ပူၼ်ႉမႃးၼၼ်ႉ ၽူႈလၵ်ႉ ၶဝ်ႈလၵ်ႉထုပ်ႉၵွႆ ၶုမ်ၵူၼ်းတၢႆ ပႃႇႁဵဝ်ႈ မွၵ်ႈ 10 ၶုမ် တီႈဝဵင်းၼမ်ႉၶမ်း ဢဝ်လဵၵ်းတၢင်းၼႂ်း မၼ်းၼၼ်ႉ ၵႂႃႇၶၢႆ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ