ၽူႈလၵ်ႉၵူၼ်းၸူၼ် လိူင်ႇၼမ် ၼႂ်းၸႄႈဝဵင်းတႃႈၶီႈလဵၵ်း ႁဵတ်းႁႂ်ႈ ၵူၼ်းမိူင်းပိုၼ်ႉတီႈ ဢမ်ႇမီးလွင်ႈႁူမ်ႇလူမ်ႈ ဢမ်ႇမီးလွင်ႈဢုၼ်ႇၸႂ် ဢမ်ႇႁတ်းၼွၼ်းလပ်းၼွၼ်းလီ။
ဝၼ်းတီႈ 16/5/2022 ယၢမ်းၵၢင်ၼႂ်ၸဝ်ႉ မွၵ်ႈ 4 မူင်း မီးၽူႈလၵ်ႉၵူၼ်းၸူၼ် ၽူႈၸၢႆး 2 ၵေႃႉ ၶိုင်ယႃႉၽၵ်းတူလဵၵ်း ႁိူၼ်းယေး ၵူၼ်းဝၢၼ်ႈ တီႈပွၵ်ႉမႄႈၶၢဝ် ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လင်ၼိုင်ႈ၊ ၵူၺ်းၵႃႈ ၽူႈလၵ်ႉ ဢမ်ႇၸၢင်ႈပိုတ်ႇၽၵ်းတူ ၵူၼ်းႁိမ်းႁိူၼ်းၼၼ်ႉၵေႃႈ သမ်ႉဢွၵ်ႇမႃးႁၼ်လႄႈ ၽူႈလၵ်ႉၵူၼ်းၸူၼ် တၼ်းပၢႆႈလွတ်ႈ ၵႂႃႇဝႃႈၼႆ။
ၸဝ်ႈၶွင်ႁိူၼ်း လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်းဝၼ်းၼၼ်ႉ မီးၽူႈၸၢႆးသွင်ၵေႃႉ ၶီႇရူတ်ႉၶိူင်ႈသွၼ်ႉၵၼ်မႃးသေ မႃး ပၼ်ႇလဵပ်ႈၸွမ်းႁိမ်းႁိူၼ်းႁဝ်း ၶႃႈသေ ဢၢၼ်းယႃႉသေႃးၽၵ်းတူႁိူၼ်း၊ သေႃးၽၵ်းတူတႄႉ ၶဝ်တတ်းလႆႈယဝ်ႉ ၵူၺ်းၵႃႈ ၽၵ်းတူၼႆႉသမ်ႉ မီးထႅင်ႈၵွၼ်ႇထူဝ်း (ရီႊမုတ်ႉ) ပိၵ်ႉဝႆႉလႄႈ ယႃႉဢမ်ႇလႆႈ။ မိူဝ်ႈ ၽွင်းၼၼ်ႉ ၵူၼ်းႁိမ်းပီႈၶဝ်ထႅင်ႈ ႁိူၼ်းသမ်ႉ ဢွၵ်ႇမႃးလႄႈ ၵူၼ်းလၵ်ႉၼၼ် လဵၼ်ႈပၢႆႈ ၶူဝ်းၶွင်တႄႉ ဢမ်ႇတၼ်းလႆႈသင်။ ၽိူဝ်ႇဝႃႈ လႆႈႁၼ်ၼႂ်း ၵွင်ႈ CCTV ၶိုၼ်းၼႆ ပဵၼ်ဢၼ်မႆႈၸႂ် ၼွၼ်းပေႃးဢမ်ႇလပ်းယဝ်ႉၶႃႈ ”- ဝႃႈၼႆ။
ၽူႈလၵ်ႉၵူၼ်းၸူၼ် ဢၼ်ၵႆႉဢႅဝ်ႇလၵ်ႉ ၸွမ်းၼႂ်းပွၵ်ႉ/ယွမ်ႇ ၼႂ်းႁိူၼ်းယေးၵူၼ်းပိုၼ်ႉတီႈ ၸႄႈဝဵင်းတႃႈၶီႈလဵၵ်းၼႆႉ ၵမ်ႈၼမ် တေၶဝ်ႈလၵ်ႉ ၶၢဝ်းမိူင်း ၸမ်လႅင်း ၽွင်းၵူၼ်းၼွၼ်းလပ်းလီ။ ၸုမ်းၵူၼ်းလၵ်ႉၼႆႉ မီးဝႆႉပဵၼ်မူႇပဵၼ်ၸုမ်း မၢင်ႁိူၼ်း ၶဝ်ႈလၵ်ႉထိုင်ၼႂ်းႁိူၼ်းယေး ၸိူဝ်းၼႆႉၵေႃႈ မီးမႃးတင်းၼမ် – ၵူၼ်းတႃႈၶီႈလဵၵ်းလၢတ်ႈ။
“ပူၼ်ႉမႃး မွၵ်ႈ 2 ဝူင်ႈ တီႈႁိူၼ်းလႅၵ်ႈငိုၼ်း လင်ၼိုင်ႈ တီႈတႃႈၶီႈလဵၵ်းၼႆႉ ၵူၼ်းႁၢႆႉ လၵ်ႉၶဝ်ႈသွၵ်ႈတဝ်ၽႅဝ်ၼႂ်းႁိူၼ်းၶဝ်။ သင်ဝႃႈ မီးၵေႃႉလဵဝ်တႄႉ ဢမ်ႇၶႂ်ႈႁတ်းယူႇယဝ်ႉ။ တေႃႈၼင်ႇၵၢင်ဝၼ်းၶဝ်ယင်း လၵ်ႉၶဝ်ႈႁိူၼ်းဢေႃႈ။ ပေႃးပဵၼ်ၼၢင်းယိင်း ၶီႇရူတ်ႉၶိူင်ႈၵႂႃႇၵေႃႉလဵဝ်တႄႉ ၺႃးႁုၵ်ႉၸၼ်ၵမ်းလဵဝ်ယဝ်ႉၶႃႈ။ ”- ဝႃႈၼႆ။
ဝၢႆးလင်သိုၵ်းမၢၼ်ႈယိုတ်းမိူင်းမႃးၼႆႉ ၼႂ်းၸႄႈဝဵင်းတႃႈၶီႈလဵၵ်း ၼွၵ်ႈလိူဝ်ၽူႈလၵ်ႉ ၵူၼ်းၸူၼ်လိူင်ႇၼမ်ယဝ်ႉ ၵူၼ်းယွင်ႇမႃႈ၊ ၵူၼ်း ပႅၵ်ႇၼႃႈ၊ ၵူၼ်းဢမ်ႇမီးတီႈယူႇၵေႃႈ မီးၼမ် ။
ၵူၼ်းၼုမ်ႇတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်း ယွင်ႇတႄႉႁႃႉ ယွင်ႇလဵၼ်ႈႁႃႉဢမ်ႇႁူႉ ၼမ်ဝႃႈၼမ်၊ ၵူၼ်းပႅၵ်ႇၼႃႈပႅၵ်ႇတႃ လုၵ်ႉတၢင်းမိူင်းမၢၼ်ႈမႃးၵေႃႈၼမ် ။ ဢၼ်ဢမ်ႇမီးတီႈယူႇသေ ၵႂႃႇမႃးယူႇသဝ်းၸွမ်းတၢင်းၵေႃႈၼမ်။ ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ သင်သေဢိတ်းယဝ်ႉ လႆႈမႆႈၸႂ် လိူဝ်ၵူႈပွၵ်ႈဢေႃႈ”- ဝႃႈၼႆ။
ၼွၵ်ႈလိူဝ်ၼႆႉ တီႈၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇၵေႃႈ ၼႂ်းလိူၼ်မေႊၼႆႉၵူၼ်း ၵူၼ်းႁၢႆႉၶဝ်ႈၸူၼ် ႁူၼ်းယေးၵူၼ်းဝၢၼ်ႈလင်ၼိုင်ႈ၊ ယဝ်ႉၵေႃႈ တီႈၸႄႈဝဵင်းလႃႈသဵဝ်ႈသမ်ႉ ႁၢၼ်ႉၶၢႆၶူဝ်းပၢၼ်မႂ်ႇ ထုၵ်ႇလၵ်ႉၽွတ်ႈႁၢၼ်ႉ 3 ႁၢၼ်ႉ ၼႂ်းဝၼ်းလဵဝ်။