ၵေႃပူၵ်းပွင်ၵူၼ်းၼုမ်ႇၸိုင်ႈတႆး (SSYCBC) ၸတ်းႁဵတ်း ပၢင်ယုၵ်ႉမုၼ်းၼမ်ႉၵတ်ႉ ၽူႈဢွၼ်ႁူဝ်သႅၼ်းႁုၼ်ႈမႂ်ႇ လႄႈ မေႃသွၼ် တီႈလုမ်းၵူၼ်းၼုမ်ႇ ၼႂ်းငဝ်ႈငုၼ်းဝၢၼ်ႈႁႆး ၸႄႈဝဵင်းၵေးသီး ၸိုင်ႈတႆးပွတ်းၸၢၼ်း။
ဝၼ်းတီႈ 14/03/2018 ၵၢင်ၼႂ်ၶၢဝ်းယၢမ်း 9 မူင်းၼၼ်ႉ ယူႇတီႈ ၵေႃပူၵ်းပွင်ၵူၼ်းၼုမ်ႇၸိုင်ႈတႆး (SSYCBC) ဢွၼ်ႁူဝ်ၸတ်းႁဵတ်း ပၢင်သွၼ် ၵဵဝ်ႇၵပ်းႁူဝ်ၶေႃႈဝႃႈ ပၢင်ယုၵ်ႉမုၼ်းၼမ်ႉၵတ်ႉ သႅၼ်းႁုၼ်ႈမႂ်ႇလႄႈ မေႃသွၼ်ၸုပ်ႈတီႈ 4 ၊ မီးၽူႈယႂ်ႇၵူၼ်းလူင် ၼႂ်းငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး မိူၼ်ၼင်ႇ ၵႅမ်ၽူႈၸတ်းၵၢၼ်ၽွင်းငမ်း ၸဝ်ႈသိုၵ်းလူင်ထိူၼ်ႇမိူင်း၊ ၽူႈဢွၼ်ႁူဝ်ၵူၼ်းၼုမ်ႇ ၸဝ်ႈႁၢၼ်တၢၼ်းဢွင်ႇလႄႈ ၽူႈတၢင်တူဝ်မုၵ်ႉၸုမ်းၼၢင်းယိင်းၸိုင်ႈတႆး မွၵ်ႇလၢတ်ႈၶေႃႈၵႂၢမ်းပၼ်ႁႅင်း။
ပၢင်သွၼ်ၼႆႉ တေၸတ်းၵႂႃႇၼႂ်းၶၢဝ်းတၢင်း 3 လိူၼ်၊ ဢွင်ႈတီႈလုမ်းၵူၼ်းၼုမ်ႇ၊ ၼႂ်းဝၼ်းပိုတ်ႇပၢင်သွၼ်ၼၼ်ႉ မီးၽူႈယႂ်ႇၵူၼ်းလူင်လႄႈလုၵ်ႈႁဵၼ်းၶိုၼ်ႈႁွတ်ႈၶဝ်ႈႁူမ်ႈ 67 ၵေႃႉ-ၼႆယဝ်ႉ။
ၸဝ်ႈသိုၵ်းလူင်ထိူၼ်ႇမိူင်း ၵႅမ်ၽူႈၸတ်းၵၢၼ်ၾၢႆႇၽွင်းငမ်း မွၵ်ႇလၢတ်ႈၶေႃႈၵႂၢမ်းပိုတ်ႇပၢင်သွၼ်ၵႂႃႇဝႃႈ- “ငဝ်းလၢႆးဝၢၼ်ႈမိူင်းႁဝ်းၶႃႈဝၼ်းမိူဝ်ႈၼႆႉ ပေႃးဢဝ်မၢၵ်ႇတႃၵၢၼ်သိုၵ်းသေတူၺ်းၸိုင် ဢမ်ႇဝႃႈၵၢၼ်သိုၵ်းၵေႃႈယဝ်ႉ၊ ၵၢၼ်ၽွင်းငမ်းၵေႃႈယဝ်ႉ၊ တီႈလမ်ႇလွင်ႈမၼ်းၼၼ်ႉ မၢၼ်ႈၶဝ်တိုၼ်း ဢဝ်တီႈယူႇဝႆႉယူႇယဝ်ႉ။ ၵွပ်ႈၼၼ် ၵူၼ်းၼုမ်ႇႁဝ်းၶႃႈဝၼ်းမိူဝ်ႈၼႆႉ ယႃႇပေၵူဝ်ႁႄ၊ ဝႆႉၸႂ်ၼိမ်ၼိမ် ဝႆႉၸႂ်ၶႅင်ၶႅင်၊ ႁႂ်ႈမုင်ႈႁၼ်မိူဝ်းၼႃႈသေ ႁတ်းဢဝ်တီႈယူႇၵႂႃႇ။ ယွၼ်ႉဝႃႈၵူၼ်းၼုမ်ႇဝၼ်းမိူဝ်ႈၼႆႉ တေပဵၼ်ၵူၼ်းလူင် ဝၼ်းမိူဝ်းၼႃႈၼႆလႄႈ ၼင်ႇႁိုဝ်ဝၢၼ်ႈမိူင်းႁဝ်းၶႃႈ ပေႃးတေၶိုၼ်ႈယႂ်ႇမႂ်ႇသုင်ၵႂႃႇၼၼ်ႉၵေႃႈ တၢင်းမုင်ႈမွင်းမီးၼိူဝ်ၵူၼ်းၼုမ်ႇႁဝ်းၶႃႈ ဝၼ်းမိူဝ်ႈၼႆႉယဝ်ႉ။ ၵွပ်ႈၸိူင်ႉၼၼ်လႄႈ လွင်ႈသင်ၵေႃႈယဝ်ႉ လူဝ်ႇလႆႈယိူၼ်ႉၵၼ်ႈ ယွမ်းတုၵ်ႉယၢပ်ႇၽိုတ်ႇ တေႃႇသူႈႁဵၼ်းဢဝ် ႁႂ်ႈပေႃးလႆႈၵႂႃႇလီငၢမ်းသေၵမ်း”- ဝႃႈၼႆ။
“ၵွပ်ႈပိူဝ်ႈငဝ်းလၢႆးမိူဝ်ႈလဵဝ် ႁဝ်းၶႃႈတိုၵ်ႉပဵၼ်ၶီႈၶႃႈ ပိူၼ်ႈဝႆႉယူႇလႄႈ လွၵ်းလၢႆးဢၼ်ပိူၼ်ႈၽႅၼ်တေႃႇႁဝ်း ၵူႈလၢႆးလၢႆးၼၼ်ႉ ၼင်ႇႁိုဝ်သမ်ႉပေႃးတေဢမ်ႇၵႂႃႇတူၵ်းလွၵ်းပိူၼ်ႈၼၼ်ႉ ႁဝ်းၶႃႈလူဝ်ႇလၵ်းလႅမ် ၽႂ်းၽၢႆ လဵပ်ႈႁဵၼ်း၊ ဝႆႉၼမ်ႉၸႂ်တူၼ်ႈၸႂ်သိုဝ်ႈယူဝ်း တေႃႇၵၢၼ်ၸိူဝ်ႉၸၢတ်ႈႁဝ်းလႄႈ ၸွမ်းလၵ်းမၢႆဢၼ်မီးၼၼ်ႉ ၵႂႃႇသေၵမ်း” ၸဝ်ႈႁၢၼ်တၢၼ်းဢွင်ႇ လၢတ်ႈ။
ၵေႃပူၵ်းပွင်ၵူၼ်းၼုမ်ႇၸိုင်ႈတႆး (SSYCBC) ၼႆႉ ၸတ်းပၢင်သွၼ်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇ၊ ၼမ်ႉၵတ်ႉၽူႈဢွၼ်ႁူဝ်သႅၼ်းႁုၼ်ႈမႂ်ႇလႄႈ မေႃသွၼ်။ ၸုပ်ႈၼႆႉၸတ်းႁဵတ်းပဵၼ်ၸုပ်ႈတီႈ 4 ယဝ်ႉ။ ၵူၺ်းၵႃႈ ပၢင်သွၼ်ၶၢဝ်းပွတ်းၵေႃႈ ၸတ်းႁဵတ်းမႃးယူႇတႃႇသေႇ၊ မိူဝ်းၼႃႈမႃးၵေႃႈ ၼင်ႇႁိုဝ်ၵူၼ်းၼုမ်ႇ ပေႃးတေမီးၼမ်ႉၵတ်ႉၵႂႃႇ ၼမ်ၼမ်ၼၼ်ႉ တေၶတ်းၸႂ်ၸတ်းၵႂႃႇထႅင်ႈ-ၼႆယဝ်ႉ။
