ၵေႃပူၵ်းပွင်ၵူၼ်းၼုမ်ႇၸိုင်ႈတႆး ၸတ်းႁဵတ်းပၢင်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇပၢၼ်မႂ်ႇ တႃႇႁႂ်ႈပဵၼ်ၼေႃႇတႅၼ်းၶိူဝ်းမိူဝ်းၼႃႈ ၽူႈၶဝ်ႈႁူမ်ႈ လဵပ်ႈႁဵၼ်း 200 ပၢႆ။
ဝၼ်းတီႈ 21-23/09/2018 ၵေႃပူၵ်းပွင်ၵူၼ်းၼုမ်ႇၸိုင်ႈတႆး (SSYCBC) ၸတ်းႁဵတ်းပၢင်ပူၵ်းပွင်ၼမ်ႉၵတ်ႉၵူၼ်းၼုမ်ႇ လၢႆးပၢၼ်မႂ်ႇလႄႈ တၢင်းႁူႉတၢင်းႁၼ်လၢႆလၢႆလွင်ႈ မိူၼ်ၼင်ႇ ပိူင်ၵၢၼ်ၸၢႆးယိင်းပၢၼ်မႂ်ႇ၊ ၵၢၼ်ၸႂ်ႉၾုၼ်ႇသၽႃႇဝ၊ လၢႆး ၽုၵ်ႇသွမ်ႈ၊ ပိုၼ်းၶိူဝ်းတႆး ၊လွင်ႈသိင်ႇဝႅတ်ႉလွမ်ႉ၊ လၢႆးၵႄႈလိတ်ႈပၼ်ႁႃ ၸိူဝ်းၼႆႉ ၶူးပူင်သွၼ်ပဵၼ် ၸၢႆးဢၢႆႈႁိၼ်သႅင်လႄႈ ၼၢင်းသႅင်ဢွင်ႇ ။
ပၢင်ပူၵ်းပွင် ၸတ်းႁဵတ်းတီႈဝတ်ႉလူင်မူႉ ဢိူင်ႇႁူဝ်မၢင်း ၸႄႈဝဵင်းတၢင်ႉယၢၼ်း ၸႄႈတွၼ်ႈလႃႈသဵဝ်ႈ။ မီးၵူၼ်းဝၢၼ်ႈၼႂ်းဢိူင်ႇလူင်မူႉ၊ ႁူဝ်မၢင်း၊ လွႆၸေး ၸိူဝ်းၼႆႉ ၶဝ်ႈႁူမ်ႈထွမ်ႇငိၼ်းမီး 200 ပၢႆ။
ၼၢင်းသႅင်ဢွင်ႇ ၽူႈပၼ်ပၢင်သွၼ် လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ယိူင်းဢၢၼ်းဢၼ်ႁဝ်းၶႃႈၸတ်းႁဵတ်းၼႆႉ ပိူဝ်ႈ ႁႂ်ႈၵူၼ်းၼုမ်ႇမီးၼမ်ႉၵတ်ႉၶိုတ်းၵၢပ်ႈပၢၼ်၊ ၼႂ်းၵူၼ်းၼုမ်ႇ တီႈၼိုင်ႈလႄႈတီႈၼိုင်ႈ လႆႈႁူႉၸၵ်းၵၼ်၊ မေႃၶဝ်ႈဢွၵ်ႇၵၼ်၊ မေႃႁပ်ႉၼႃႈၵၢၼ်တွၼ်ႈတႃႇၵူၼ်းတင်းၼမ်ၵႂႃႇမိူဝ်းၼႃႈ ၸိူဝ်းၼႆႉ။
မိူဝ်ႈဝၼ်းတီႈ 19/09/2018 ၼၼ်ႉၵေႃႈ ၵေႃပူၵ်းပွင်ၵူၼ်းၼုမ်ႇၸိုင်ႈတႆး ၸတ်းပၢင်ႁူပ်ႉထူပ်းၵူၼ်းမိူင်း တီႈဝတ်ႉပႃႇသႃ ဢိူင်ႇႁူဝ်မၢင်း ၸႄႈဝဵင်းတၢင်ႉယၢၼ်း မီးၵူၼ်းပႃႇသႃလႄႈ ႁိမ်းႁွမ်း ၶဝ်ႈႁူမ်ႈထွမ်ႇငိၼ်း။ ၼႂ်းပၢင်ၼၼ်ႉ ပၼ်တၢင်းႁူႉလွင်ႈတူၺ်းထိုင်ပၢႆးယူႇလီ၊ လၢႆးႁႄႉၵင်ႈတၢင်းပဵၼ်၊ တၢင်းပဵၼ်ၸၢင်ႈၸပ်း ၵၼ်လႆႈၸိူင်ႉႁိုဝ်၊ လွင်ႈၽွၼ်းၸႃႉယႃႈမဝ်းၵမ်လႄႈ ၵၢၼ်ဝၢင်း ၽႅၼ်ၼႃႈႁိူၼ်းၸိူဝ်းၼႆႉ။
ၵေႃပူၵ်းပွင်ၵူၼ်းၼုမ်ႇၸိုင်ႈတႆး (SSYCBC) ၼႆႉ ၸတ်းပၢင်သွၼ်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇ၊ ၼမ်ႉၵတ်ႉၽူႈဢွၼ်ႁူဝ်သႅၼ်းႁုၼ်ႈမႂ်ႇလႄႈ မေႃသွၼ် ၊ တူင်ႉၼိုင်ပၼ်တၢင်းႁူႉ လွင်ႈပၢႆးယူႇလီၵူၼ်း ဝၢၼ်ႈၸွမ်းဝၢၼ်ႈၼွၵ်ႈၼႃးပၢင်ႇၸိူဝ်းၼႆႉ။ SSYCBC ၼႆႉပူၵ်းတင်ႈတီႈ ငဝ်ႈငုၼ်းဝၢၼ်ႈႁႆး ၸဵမ်မိူဝ်ႈပီ 2013။
