ၵေႃပူၵ်းပွင်ၵူၼ်းၼုမ်ႇၸိုင်ႈတႆး လူင်းပိုၼ်ႉတီႈ ပၼ်တၢင်းႁူႉၵူၼ်းဝၢၼ်ႈၵူၼ်းမိူင်း ၼႂ်းၸႄႈဝဵင်းတၢင်ႉယၢၼ်း ၽူႈၶဝ်ႈႁူမ်ႈ ႁဵၼ်းႁူႉၸမ်ပၢၵ်ႇ။
ဝၼ်းတီႈ 19/09/2018 ၵေႃပူၵ်းပွင်ၵူၼ်းၼုမ်ႇၸိုင်ႈတႆး ၸတ်းပၢင်ႁူပ်ႉထူပ်းၵူၼ်းမိူင်း တီႈဝတ်ႉပႃႇသႃ ဢိူင်ႇႁူဝ်မၢင်း ၸႄႈဝဵင်းတၢင်ႉယၢၼ်း မီးၵူၼ်းပႃႇသႃလႄႈ ႁိမ်းႁွမ်း ၶဝ်ႈႁူမ်ႈထွမ်ႇငိၼ်း။ ၼႂ်းပၢင်ၼၼ်ႉ ပၼ်တၢင်းႁူႉလွင်ႈတူၺ်းထိုင်ပၢႆးယူႇလီ၊ လၢႆးႁႄႉၵင်ႈတၢင်းပဵၼ်၊ ၊တၢင်းပဵၼ်ၸၢင်ႈၸပ်းၵၼ်လႆႈၸိူင်ႉႁိုဝ်၊ လွင်ႈၽွၼ်းၸႃႉယႃႈမဝ်းၵမ်လႄႈ ၵၢၼ်ဝၢင်း ၽႅၼ်ၼႃႈႁိူၼ်းၸိူဝ်းၼႆႉ။
ၼၢင်းသႅင်ဢုင်ႇ ၽူႈပၼ်ပၢင်သွၼ်လၢတ်ႈဝႃႈ – “ ယူႇတီႈၸုမ်းႁဝ်းၶႃႈသေ လူင်းပိုၼ်ႉတီႈ ပၼ်တၢင်းႁူႉၵူၼ်းဝၢၼ်ႈႁဝ်း ၸွမ်းဝၢၼ်ႈၼွၵ်ႈၼႃးပၢင်ႇ ၸိူဝ်းယူႇၵႆဝၢၼ်ႈၵႆဝဵင်းၼၼ်ႉၶႃႈဢေႃႈ ဝၢၼ်ႈၼိုင်ႈယဝ်ႉ ဝၢၼ်ႈၼိုင်ႈပၼ်ႇပုတ်ႈၵၼ်သေလူင်းပိုၼ်ႉတီႈၵႂႃႇဢေႃႈ ” ဝႃႈၼႆ။
ၸဝ်ႈပုၼ်ႇၺဝမ်သ ဝတ်ႉပႃႇသႃ တၢင်ႉယၢၼ်း လၢတ်ႈဝႃႈ “ တွၼ်ႈတႃႇၵူၼ်းဝၢၼ်ႈႁဝ်းတႄႉ ပဵၼ်ဢၼ်ယိၼ်းၸူမ်းတႄႉၶႃႈ ဢေႃႈ ဢၼ်မီးၸုမ်းမႃးပၼ်တၢင်းႁူႉတၢင်းႁၼ်လွင်ႈပၢႆးယူႇလီၸိူင်ႉၼႆ ယွၼ်ႉဝၢၼ်ႈႁဝ်းၼႆႉ မၼ်းၵႆဝဵင်းမွၵ်ႈ 8 လၵ်းၸိူဝ်း ၼႆႉ ႁူင်းယႃတီႈဝၢၼ်ႈႁဝ်းၵေႃႈဢမ်ႇမီး ၵူၼ်းဝၢၼ်ႈၵေႃႈမီးတၢင်းယၢပ်ႇတႃႇတေၵႂႃႇႁူင်းယႃ ။ ဢၼ်မႃးပၼ်တၢင်းႁူႉတၢင်း ႁၼ်ၼႆႉ မီးၽွၼ်းလီ တွၼ်ႈတႃႇ ၵူၼ်းဝၢၼ်ႈႁဝ်းတႄႉတႄႉၶႃႈဢေႃႈ ” ဝႃႈၼႆ ။
ၵေႃပူၵ်းပွင်ၵူၼ်းၼုမ်ႇၸိုင်ႈတႆး (SSYCBC) ၼႆႉ ၸတ်းပၢင်သွၼ်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇ၊ ၼမ်ႉၵတ်ႉၽူႈဢွၼ်ႁူဝ်သႅၼ်းႁုၼ်ႈမႂ်ႇလႄႈ မေႃသွၼ် ၊ တူင်ႉၼိုင်ပၼ်တၢင်းႁူႉ လွင်ႈပၢႆးယူႇလီၵူၼ်း ဝၢၼ်ႈၸွမ်းဝၢၼ်ႈၼွၵ်ႈၼႃးပၢင်ႇၸိူဝ်းၼႆႉ။ SSYCBC ၼႆႉပူၵ်းတင်ႈတီႈ ငဝ်ႈငုၼ်းဝၢၼ်ႈႁႆႈ ၸဵမ်မိူဝ်ႈပီ 2013။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ