ၸုမ်းၸဵင်ၼုမ်ႇလႄႈၸုမ်း ILO ႁူမ်ႈၵၼ် ၸတ်းႁဵတ်းပၢင်ယုၵ်ႉမုၼ်းၵူၼ်းၼုမ်ႇ ပိူဝ်ႈႁႂ်ႈၵူၼ်းၼုမ်ႇ ၵႆယၢၼ်ယႃႈ  မဝ်းၵမ်လႄႈ ႁႂ်ႈၵူၼ်းၼုမ်ႇပဵၼ်ဢဵၼ်ႁႅင်း ၼႂ်းဢိူင်ႇဝၢၼ်ႈမိူဝ်းၼႃႈ။

ဝၼ်းတီႈ 02 -04 /4/2018 ၸုမ်းၸဵင်ၼုမ်ႇလႄႈ ၸုမ်း ILO ဢိၵ်ႇၽူႈယႂ်ႇၵူၼ်းလူင်ၼႂ်းဢိူင်ႇဝၢၼ်ႈ ဢွၼ်ႁူဝ် ၵူၼ်းၼုမ်ႇ ၸတ်းႁဵတ်းပၢင်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇ တီႈပွၵ်ႉ 5 ဝၢၼ်ႈဢၢႆႇၼိူဝ် ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ မီးၵူၼ်းၼုမ်ႇ ဝၢၼ်ႈဢၢႆႇၼိူဝ်၊ ဝၢၼ်ႈႁူးမူၼ်ႈ၊ ဝၢၼ်ႈႁၢတ်ႇၵႃ၊ ဝၢၼ်ႈပုင်းထုၼ်၊ ဝၢၼ်ႈၼွင်မွၼ် လႄႈၵူၼ်းၼုမ်ႇ TYO ၸိူဝ်းၼႆႉၶဝ်ႈႁူမ်ႈ တင်းမူတ်းမီး 50 ပၢႆ။

လုင်းၸၢႆးထုၼ်းလႃႉ ၽူႈတူင်ႉၼိုင်ၼႂ်းဝၢၼ်ႈဢၢႆႇၼိူဝ် လၢတ်ႈဝႃႈ – “ တႃႇတေပဵၼ်မႃးပၢင်သွၼ်ၼႆႉ လႆႈဢုပ်ႇ   ဢူဝ်းၵၼ် ၸဵမ်မိူဝ်ႈလိူၼ်ၾႅပ်ႊၿိဝ်ႊရီႊ ၵူၺ်းၵႃႈ မီးပၢင်ပွႆးသၢင်ႇလွင်းလႄႈ ပၢင်ပွႆးလၢႆလၢႆတီႈသေ ၸင်ႇလႆႈမႃး  ႁဵတ်းၼႂ်းလိူၼ်ၼႆႉ၊ ပွၵ်ႈၼႆႉပဵၼ်ပွၵ်ႈဢွၼ်တၢင်းသုတ်းသေတႃႉ လႆႈႁၼ် ၵူၼ်ၼုမ်ႇဢွၼ်ၵၼ်တူင်ႉတိုၼ်ႇမႃးႁဵၼ်းၸိူင်ႉၼႆ ပဵၼ်ဢၼ်ယိၼ်းၸူမ်းတႄႉ ” ဝႃႈၼႆ။

ၼႂ်းပၢင်ၼႆႉ ၼၢင်းၶမ်းယိင်းၼွင်ႉ ၸုမ်း ILO ပူင်သွၼ်ပၼ် လွင်ႈၽေးယႃႈမဝ်းၵမ်၊ လွင်ႈဝၢင်းၽႅၼ်ၼႃႈႁိူၼ်းလႄႈ လွင်ႈႁႅင်းၵၢၼ်ၶၢမ်ႈမိူင်း၊ ၸၢႆးဢၢႆႈသိူဝ် ပူင်သွၼ်ပၼ် လွင်ႈၵႃႈၶၼ်ၸူဝ်ႈပၢၼ်ၵူၼ်း၊ တၢင်းႁူႉပၢႆးဢွၼ်ႁူဝ်လႄႈ လွင်ႈႁၵ်ႉသႃထိူၼ်ႇၶိူဝ်းပႃႇမႆႉ ၸိူဝ်းၼႆႉ။

ၸၢႆးမိၼ်ႉ ၵေႃႉမႃးၶိုၼ်ႈလဵပ်ႈႁဵၼ်း လၢတ်ႈဝႃႈ – “ ၶိုၼ်ႈပၢင်သွၼ်ၼႆႉ လႆႈပၢႆးႁူႉပၢႆးႁၼ်ၼမ်တႄႉတႄႉၶႃႈ ၊ လွင်ႈဝႆႉဝၢင်းၸႂ်တႃႇၸၢတ်ႈပၢၼ်ၵေႃႈလႅၵ်ႈလၢႆႈမႃး၊ ထၢတ်ႈၸႂ်ၵေႃႈႁႅင်းမႃး၊ သင်ၵူၼ်းၼုမ်ႇႁဝ်းၵႆႉလႆႈၶိုၼ်ႈ ပၢင်သွၼ် ၸိူင်ႉၼႆၸိုင်တေလီတႄႉၶႃႈ “ ဝႃႈၼႆ။

မိူဝ်ႈဝၼ်းတီႈ 01/03/2018 ၼၼ်ႉၵေႃႈ ၵူၼ်းၼုမ်ႇတႆး ၸႄႈဝဵင်းလႃႈသဵဝ်ႈ ႁူမ်ႈၵၼ်ၵႂႃႇလုမ်းလႃး တူၼ်ႈမွၵ်ႇ ၵွၼ် ဢၼ်လႆႈၽုၵ်ႇသွမ်ႈဝႆႉ မိူဝ်ႈပူၼ်ႉမႃးၸိူဝ်းၼၼ်ႉ ။ မိူၼ်ၼင်ႇတင်းထုင်ႉမိူင်းယေႃ၊ တႃႈယၢဝ်၊ ဝၢၼ်ႈၵုင်းသႃႇ၊ တႃႈပုင်ႇလႄႈ ဝတ်ႉမၢၼ်ႈသူႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၸိူဝ်းၼႆႉ။

သူင်ႇၶၢဝ်ႇ   – သႅင်သွမ်ႇ