ပၢင်သွၼ်လိၵ်ႈတႆး တီႈဝတ်ႉသူၼ်ၻွၵ်ႇ ၸႄႈဝဵင်းၵဵင်းမႆႇ ၸိုင်ႈထႆး တေပိုတ်ႇႁပ်ႉလုၵ်ႈႁဵၼ်းမႂ်ႇ တေပူင်သွၼ်ပၼ်ၵႂႃႇ ၼႂ်းဝၼ်းတိတ်ႉ ၵူႈဝူင်ႈ ဝႃႈၼႆ။
တႄႇဢဝ်လိူၼ်ၵျုၼ်ႊ 2022 တေထိုင်မႃးၼႆႉ ယူႇတီႈ ၸုမ်းႁူမ်ႈတုမ်ပီႈၼွင်ႉၸၢဝ်းၶိူဝ်းတႆး ၸၼ်ႉၸွမ် မႁႃႇၸူးလႃးလူင်းၵွၼ်း ဝဵင်းၵဵင်းမႆႇ ၸိုင်ႈ ထႆး ဢွၼ်ႁူဝ်သေ ပိုတ်ႇသွၼ်ၽႃႇသႃႇလိၵ်ႈလၢႆး မိူၼ်ၼင်ႇ လိၵ်ႈတႆး၊ လိၵ်ႈထႆး၊ လိၵ်ႈဢိင်းၵလဵတ်း၊ လိၵ်ႈၶႄႇ၊ လိၵ်ႈမၢၼ်ႈလႄႈ လိၵ်ႈတႆး ထမ်း ၸိူဝ်းၼႆႉ တီႈဝတ်ႉသူၼ်လွၵ်ႇ ၸႄႈဝဵင်းၵဵင်းမႆႇ ၸိုင်ႈထႆး ၼႆယဝ်ႉ။
ၸဝ်ႈၶူး လၢဝ်ႁႅင်း ႁူဝ်ပဝ်ႈ ၸုမ်းႁူမ်ႈတုမ်ပီႈၼွင်ႉၸၢဝ်းၶိူဝ်းတႆး ၸၼ်ႉၸွမ် မႁႃႇၸူလႃးလူင်းၵွၼ်း ၵဵင်းမႆႇ လၢတ်ႈတီႈၽူႈတွႆႇႁွၵ်ႈဝႃႈ – “လိူၼ် ၼႃႈ ႁဝ်းၸဝ်ႈၶဝ် တေပိုတ်ႇပၢင်သွၼ်လိၵ်ႈလၢႆၵႂႃႇ။ ၼိုင်ႈဝူင်းလႂ် ၼိုင်ႈဝၼ်း တေပဵၼ်ဝၼ်းဢႃးတိတ်ႉဝၼ်းလဵဝ်။ ယိူင်းဢၢၼ်းတႃႇပီႈၼွင်ႉႁႅင်း ၵၢၼ်ႁဝ်း ၸိူဝ်းၶႂ်ႈႁဵၼ်းႁူႉၶႂ်ႈမေႃ မိူၼ်ၼင်ႇ ၵၢၼ်တႅမ်ႈ၊ ၵၢၼ်လူ၊ ၵၢၼ်ဢၢၼ်ႇ ဢမ်ႇဝႃႈ လိၵ်ႈတႆး၊ လိၵ်ႈထႆး၊ ဢင်းၵိတ်း၊ ၶႄႇလႄႈ မၢၼ်ႈ ၸိူဝ်း ၼႆႉ။ ပေႃးႁဵၼ်းယဝ်ႉ ၶႂ်ႈသိုပ်ႇတေႃႇထႅင်ႈ ႁူင်းႁဵၼ်းတၢင်းၵႆ(ၵေႃးသေႃၼေႃး) လႄႈ ၸၼ်ႉၸွမ် ၸိူဝ်းၼႆႉ ၵႂႃႇၵေႃႈလႆႈၶႃႈ” – ဝႃႈၼႆ။
ပၢင်သွၼ်လိၵ်ႈလိၵ်ႈလၢႆးၼႆႉ တေပူင်သွၼ်ပၼ်ၼႂ်းဝၼ်းတိတ်ႉ ဝၼ်းလဵဝ် တႄႇဢဝ် ၶၢဝ်းယၢမ်း 9 မူင်း ၵၢင်ၼႂ် တေႃႇထိုင် 4 မူင်းဝၢႆးဝၼ်း။ သင် မီးပီႈၼွင်ႉႁႅင်းၵၢၼ် ၽူႈလႂ်မီးလုၵ်ႈလၢင်း ဢမ်ႇၼၼ် ၸဝ်ႈၵဝ်ႇ ၶႂ်ႈႁဵၼ်းႁူႉၼႆၸိုင် မႃးလူင်းသဵၼ်ႈမၢႆလႆႈတီႈ သုၼ်ၽႃသႃ တီႈဝတ်ႉသူၼ်လွၵ်ႇ ဝႃႈၼႆ။
ပၢင်သွၼ်လိၵ်ႈလၢႆး တီႈဝတ်ႉသူၼ်လွၵ်ႇၼႆႉ တႄႇပိုတ်ႇမႃး မီးၶၢဝ်းတၢင်း 15 ပီ (15) ၸုပ်ႈယဝ်ႉ ၼိုင်ႈပီ မီးလုၵ်ႈႁဵၼ်း ဢမ်ႇယွမ်း 100 တေၸႂ်ႉ ၶၢဝ်းယၢမ်းပူင်သွၼ်ၵႂႃႇ တႃႇၶၢဝ်းတၢင်း 7-8 လိူၼ် တေသွၼ်ပၼ်လၢႆလၢႆ ဢမ်ႇလႆႈသဵင်ႈၵႃႈသွၼ်ႁဵၼ်းသင် ၸဝ်ႈၶူး လၢဝ်လႅင်း လၢတ်ႈၼႄ ၼင်ႇၼႆ။
