Thursday, March 28, 2024

သင်ႇၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ သုတ်ႇမုၼ်း သူင်ႇမဵတ်ႉတႃႇထိုင် ၶူးဝႃးဝုၼ်းၸုမ်ႉ

Must read

မိူဝ်ႈၼႆႉ ဝၼ်းတီႈ 29/4/2022 ယၢမ်းၵၢင်ၼႂ် 8:30 မူင်း ယူႇတီႈ ၸုမ်းပွင်ၵၢၼ် သင်ႇၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ ၸိုင်ႈထႆး ၸုပ်ႈ (18) ႁူမ်ႈၵၼ် ၸတ်းႁဵတ်းပၢင်သုတ်ႇမုၼ်း သူင်ႇမဵတ်ႉတႃႇ ယွၼ်းသူးပၼ် ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ၺႃၼသံဝရ (သတ်ထမ်မၸေႃတိၵထ ၸ၊ ဢၵ်ၵမႁႃၵမ်မတ်ထႃၼႃ ၸရိယ) တီႈဝတ်ႉမႂ်ႇတႆး၊ သႃထုပရတဵတ်ႇ၊ ယၢၼ်းၼႃးဝႃး၊ ၵိဝ်ႇ 44/1 မိူင်းၵွၵ်ႇ (ၵုင်းထဵပ်ႈ) ၸိုင်ႈထႆး ၶဝ်ႈထမ်ႈ တိုဝ်းၵမ်သိလ် ၶွပ်ႈတဵမ် 3 ပီ ၼႆယဝ်ႉ။

Photo: Tai Sangha University Students’ Association, Bangkok/ ပၢင်သုတ်ႇမုၼ်း သူင်ႇမဵတ်ႉတႃႇထိုင် ၸဝ်ႈသိလ်ထမ်း ၶူးဝႃးဝုၼ်းၸုမ်ႉ တီႈဝတ်ႉမႂ်ႇတႆး မိူင်းၵွၵ်ႇ 29/4/2022

ၸဝ်ႈၶူး သူရိယ ႁူဝ်ၼႃႈ သင်ႇၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ ၸိုင်ႈထႆး ၸုပ်ႈ 18 လၢတ်ႈတီႈၽူႈတွႆႇႁွၵ်ႈဝႃႈ -“မိူဝ်ႈၼႆႉ ယၢမ်းၵၢင်ၼႂ် 8 မူင်းၶိုင်ႈ တႄႇဝၢၼ်းပရိတ်ႈသုတ်ႇမုၼ်း ယွၼ်းသူးပၼ် ၸဝ်ႈပေႃႈသိလ်ထမ်းဝုၼ်းၸုမ်ႉႁဝ်း ၶၢဝ်းတၢင်းၶဝ်ႈထမ်ႈတဵမ် 3 ပီ ။ ၸွမ်းၼင်ႇ ႁဝ်းၶႃႈ လုၵ်ႈၼွင်ႉပွင်ႈပၢႆ သင်ႇၶတႆး လုၵ်ႈႁဵၼ်းၸၼ်ႉၸွမ်သေ တိူင်ႇၵၢဝ်ႇယွၼ်းသူပၼ် ႁႂ်ႈၸဝ်ႈၶူးဝႃးဝုၼ်းၸုမ်ႉႁဝ်းၶႃႈ လႆႈႁဵတ်းၵၢၼ်လီ ၽႃႇဝၼႃႇၵႂႃႇ ၼႂ်းထမ်ႈ ယႃႇႁႂ်ႈမီးၽေးၶဵၼ် ၊ ႁႂ်ႈယူႇလီသုင်းဝၢၼ်၊ ႁႂ်ႈပဵၼ်တီႈပိုင်ႈဢိင်ၵိူဝ်းလီႁဝ်းၶႃႈ ပီႈၼွင်ႉတႆးၵႂႃႇထႅင်ႈမိူဝ်းၼႃႈၶၢဝ်းႁိုင် ယိူင်းဢၢၼ်း ၸိူင်ႉၼႆ သေ လႆႈၸတ်းႁဵတ်းၵႂႃႇ”- ဝႃႈၼႆ။

- Subscription -

ပၢင်သုတ်ႇမုၼ်း ယွၼ်းသူး သူင်ႇမဵတ်ႉတႃႇထိုင် ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ၺႃၼသံဝရ တီႈဝတ်ႉမႂ်ႇတႆး မိူင်းၵွၵ်ႇၼႆႉ ယူႇတီႈ ၼႂ်းၸုမ်း ပွင်ၵၢၼ် သင်ႇၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ၊ လုၵ်ႈႁဵၼ်းမႂ်ႇ၊ တင်းမူတ်းမွၵ်ႈ 30 တူၼ် လႆႈႁူမ်ႈၵၼ်ၸတ်းႁဵတ်းၵႂႃႇ၊ ယွၼ်ႉ တၢင်းပဵၼ်ၶူဝ်ႊဝိတ်ႉ 19 ၵေႃႈ တိုၵ်ႉၽႄႈလၢမ်းႁႅင်းလႄႈ ဢမ်ႇလႆႈၸတ်းႁဵတ်းပၢင်ယႂ်ႇလူင် – ၸဝ်ႈၶူး သူရိယ လၢတ်ႈ။

ၸဝ်ႈသိလ်ထမ်း ၶူးဝႃး ဝုၼ်းၸုမ်ႉၼႆႉ ဢတိတ်ႉထၢၼ်ႇဝႆႉ တေၶဝ်ႈထမ်ႈ တိုဝ်းၵမ်သိလ် တီႈထမ်ႈလူင်မိူင်းၵႅတ်ႇ ၸႄႈဝဵင်းမိူင်းသၢတ်ႇ ၸိုင်ႈတႆး ပွတ်းဢွၵ်ႇၶူင်း တႃႇၶၢဝ်းတၢင်း 3 ပီ 3 လိူၼ် ပၢႆ 3 ဝၼ်း။  တႄႇၶဝ်ႈတိုဝ်းၵမ် မိူဝ်ႈဝၼ်းတီႈ 29/4/2019 ၊ ဝၼ်းတီႈ 29/4/2022 ၼႆႉ ၶွပ်ႈတဵမ် 3 ပီယဝ်ႉ။ ပေႃးထိုင်မႃး ဝၼ်းတီႈ 1/8/2022 ၸိုင် တေၶွပ်ႈတဵမ် 3 ပီ 3 လိူၼ် ပၢႆ 3 ဝၼ်း ၼႆယဝ်ႉ။  

ၼွၵ်ႈလိူဝ်ၼၼ်ႉ ၸွမ်းၼင်ႇ ၾိင်ႈႁိၵ်ႈႁွႆး ပုတ်ႉထၽႃသႃမီးဝႆႉၼၼ်ႉသေ ပေႃးထိုင်ၶၢဝ်းလိူၼ်ႁႃႈၼႆႉမႃး ယူႇတီႈ သင်ႇၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ ၸိုင်ႈထႆး လႆႈႁူမ်ႈၵၼ် ၵၼ်ႇတေႃး ၽြႃး တြႃး သင်ႇၶၸဝ်ႈ ၽူႈၵွၼ်းဝတ်ႉမႂ်ႇတႆးၵႂႃႇ ၼႆယဝ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း