ၵူၼ်းဢိူင်ႇတူင်ႇလၢဝ်း မိူင်းၵိုင် ၵႂႃႇလႄႇထိူၼ်ႇ ယဵပ်ႇၺႃးမၢၵ်ႇမႅင်းၾင်လိၼ် တၢႆၵေႃႉၼိုင်ႈ မၢတ်ႇၸဵပ်းၵေႃႉၼိုင်ႈ ။
ၽူႈၸၢႆး 2 ၵေႃႉၼႆႉ ပဵၼ်လုင်းၸၢႆးသၢမ် လႄႈ လုင်းလမ် ဢႃယုမွၵ်ႈ 40 ပီ ၊ ၶႃၵႂႃႇလႄႇထိူၼ်ႇမိူဝ်ႈဝၼ်းတီႈ 16/4/2022 ဝၼ်းသၢင်းၵျၢၼ်ႇၶိုၼ်ႈ။ လုင်းၸၢႆးသၢမ် မၢတ်ႇၸဵပ်းလိူဝ်ႁႅင်းလႄႈ လူႉတၢႆပႅတ်ႈ၊ လုင်းလမ်တႄႉ မၢတ်ႇၸဵပ်းတီႈၶႃ၊ ယၢမ်းလဵဝ်ယူတ်းယႃတူဝ်ဝႆႉတီႈႁူင်းယႃ ၼမ်ႉလၼ်ႈ ဝႃႈၼႆ။
“ပဵၼ်မၢၵ်ႇၶွင်ၸုမ်းလႂ်ၵေႃႈဢမ်ႇႁူႉၶႃႈ။ တိုၵ်ႉပူၼ်ႉဝၢၼ်ႈဢိၼ်ႉၵူၺ်းယဵပ်ႇၺႃးယဝ်ႉၶႃႈလႄႇ။ ဢၼ်ၼႆႉၶႃလႅပ်ႈၵႂႃႇ 2 ၵေႃႉၵူၺ်းၶႃႈယူဝ်ႉ။ ၵူႈပွၵ်ႈတႄႉပေႃးႁဝ်းၶႃႈၵႂႃႇၼႆ ၸူဝ်းၵၼ်ၵႂႃႇမွၵ်ႈ 14-15 ၵေႃႉၼႆႉဢေႃႈ ” ၽူႈၸၢႆး ၵူၼ်းဝၢၼ်ႈတူၼ်ႈၵႅင်းၵေႃႉၼိုင်ႈလၢတ်ႈၼင်ႇၼႆ။
လုင်းလမ်ဢၼ်မၢတ်ႇၸဵပ်းတီႈၶႃသေ ၵႂႃႇယူတ်းယႃတူဝ်တီႈၼမ်ႉလၼ်ႈၼၼ်ႉ တၢင်းပဵၼ်ယင်းပႆႇႁၢႆ သမ်ႉပေႃးလူင်းႁူင်းယႃမႃးၶိုၼ်းယဝ်ႉ ဝႃႈၼႆ။
ၵူၼ်းတူၼ်ႈၵႅင်းထႅင်ႈၵေႃႉၼိုင်ႈလၢတ်ႈဝႃႈ -“မၼ်းမၢတ်ႇၸဵပ်းႁႅင်းဝႆႉဢေႃႈ ။ ႁဵတ်းသင်လႄႈၶိုၼ်းပွၵ်ႈမႃးႁိူၼ်းဢမ်ႇႁူႉ ။ ဢမ်ႇၼၼ်ၵူဝ်လႆႈတႅပ်းပႅတ်ႈၶႃ ႁိုဝ်ဢမ်ႇႁူႉ” – ဝႃႈၼႆ။
ဢိင်ၼိူဝ်ပိူင်ပဵၼ်ၼႆႉသေ ၵူၼ်းဝၢၼ်ႈတူၼ်ႈၵႅင်းတႄႉဢွၼ်ၵၼ်မႆႈၸႂ်ၵူဝ်ႁႄ တႃႇႁႃၵိၼ်လဵင်ႉဝၼ်းတႃမိူဝ်းၼႃႈ ၊တႃႇၶဝ်ႈထိူၼ်ႇ ၊ တႃႇၵႂႃႇႁႆႈ ၵႂႃႇသူၼ်၊ မၢၵ်ႇမႅင်းၾင်လိၼ်ၼႆႉမၼ်းတိုၼ်းတေမီးထႅင်ႈဢမ်ႇ ႁၢင်ႉ – ၵူၼ်းတူင်ႇလၢဝ်း လၢတ်ႈၼင်ႇၼႆ။
တီႈမိူင်းၵိုင်ၼႆႉ တင်ႈဢဝ်ႁၢင်ပီ ပီၵၢႆမႃးတေႃႇထိုင်ႁူဝ်ပီပီၼႆႉ သိုၵ်း RCSS လႄႈ SSPP လိုပ်ႈလမ်း ပိုတ်းယိုဝ်းတိုၵ်းတေႃးၵၼ် ။ ဝၢႆးလင် ပၢင်တိုၵ်းယဵၼ်သေ ၸုမ်းသိုၵ်းထွႆယဝ်ႉ ပိုၼ်ႉတီႈပၢင်တိုၵ်းၵမ်ႈၼမ် မီးမၢၵ်ႇမႅင်းၾင်လိၼ်၊ ၵူၼ်းမိူင်းၵႂႃႇႁႆႈၵႂႃႇသူၼ် ၵႂႃႇယဵပ်ႇၺႃးၶႂ်ႈဝႃႈၵူႈဝၼ်း။ တီႈတူင်ႇလၢဝ်းၼႆႉတႄႉ ဢၼ်ယဵပ်ႇၺႃးမၢၵ်ႇ ၵမ်းၼႆႉပဵၼ်ပွၵ်ႈၵမ်းဢွၼ်တၢင်းသုတ်း။