ၵူၼ်းမိူင်း ၼႂ်းၸႄႈဝဵင်းမိူင်းမွၵ်ႇ ၸႄႈတွၼ်ႈ မၢၼ်ႈမေႃႇ မိူင်းၶၢင် ပၢႆႈၽေးပၢင်တိုၵ်း လႆႈမႃးၶၢဝ်းတၢင်း ပီပၢႆယဝ်ႉၵေႃႈ တေႃႇထိုင်ယၢမ်းလဵဝ် ပႆႇၸၢင်ပွၵ်ႈၶိုၼ်းႁိူၼ်းယေး ၵွပ်ႈပိူဝ်ႈဝႃႈ သိုၵ်းမၢၼ်ႈတိုၵ်ႉပၵ်းပၢင်သဝ်းယူႇဝႆႉၼႂ်းဝၢၼ်ႈယူႇ။
သိုၵ်းၶၢင် KIA လႄႈသိုၵ်းမၢၼ်ႈပိုတ်းယိုဝ်းၵၼ်၊ ဢဝ်ၶိူင်ႈမိၼ်ယိုဝ်းသိုၵ်း ယိုဝ်းလူင်းၼႂ်းဝၢၼ်ႈလႄႈ ၵူၼ်းဝၢၼ်ႈတႃႇမွၵ်ႈ 50 ဝၢၼ်ႈၼႆႉ ဢွၼ်ၵၼ်ပၢႆႈ ၸဵမ်မိူဝ်ႈပီၵၢႆ လိူၼ်မၢတ်ႉၶျ်။ ၵူၼ်းပၢႆႈၽေးသိုၵ်း ၸိူဝ်းၼႆႉၵမ်ႈၼမ်ပဵၼ်ပီႈၼွင်ႉတႆး။
“ပဵၼ်ၵူၼ်းဝၢၼ်ႈ တၢင်းဝၢၼ်ႈၵုင်းလေႃႉ၊ သီႇႁႅၵ်ႉ၊ ဝဵင်းမႂ်ႇ ၸိူဝ်းၼႆႉဢေႃႈ။ ယၢမ်းလဵဝ်ၵေႃႈ ၼႂ်းဝၢၼ်ႈၸိူဝ်းၼၼ်ႉ တိုၵ်ႉပဵၼ်မိူၼ်ၼင်ႇ ၼႃႈလိၼ်သိုၵ်းယူႇ။ လႆႈမႆႈၸႂ်ယူႇ။ မၢင်ဝၢၼ်ႈမီး သိုၵ်းၶၢင်လႄႈ PDF မႃးယူႇ။ မၢင်ဝၢၼ်ႈသမ်ႉသိုၵ်းမၢၼ်ႈၶဝ်ႈယူႇဝႆႉ။ ၵွပ်ႈၼႆ ပေႃးပွၵ်ႈၶိုၼ်းၵေႃႈ ၸၢင်ႈမီးၽေးလႄႈ ၸင်ႇဝႃႈ ဢမ်ႇႁတ်းပွၵ်ႈဢေႃႈ” – ၵူၼ်းၼႂ်းဝဵင်းမိူင်းမွၵ်ႇၵေႃႉၼိုင်ႈလၢတ်ႈၼင်ႇၼႆ။
တီႈဢၼ်သိုၵ်းသွင်ၾၢႆႇ ၶဝ်ႈယူႇသဝ်းဝႆႉၼႆႉပဵၼ်ဝၢၼ်ႈပီႈၼွင်ႉတႆးယူႇသဝ်းလွၼ်ႉလွၼ်ႉ။ လႆႈဢွၼ်ၵၼ်ပၢႆႈၽေးသိုၵ်းယူႇသဝ်းၸွမ်းၵျွင်းမုၼ်ၸဝ်ႈ ၊ ႁိူၼ်းယေးပီႈၼွင်ႉ ၵူၼ်းမိုတ်ႈၵိုဝ်းၸမ်ၸႂ် ၸိူဝ်းၼႆႉ ။ ဢိင်ၼိူဝ်ငဝ်းလၢႆးၵၢၼ်မိူင်းဢမ်ႇၼိမ်၊ တၢင်းပဵၼ်ၶူဝ်ႊဝိတ်ႉ ၽႄႈလၢမ်းသေ ဝၢႆးမႃး လႆႈဢွၼ်ၵၼ်ၵႂႃႇတင်ႈပၢင်သဝ်း သေ ယူႇ။ သမ်ႉယၢပ်ႇၽိုတ်ႇလွင်ႈႁႃၵိၼ်လဵင်ႉတွင်ႉ။
ယၢမ်းလဵဝ် တီႈတၢင်းထုင်ႉဝၢၼ်ႈဢိူင်ႇ ဢမ်ႇမီးသဵင်ၵွင်ႈတႅၵ်ႇသေတႃႉ ၸုမ်းသိုၵ်း တိုၵ်ႉယူႇသဝ်းၼႂ်းဝၢၼ်ႈဝႆႉလႄႈ ၵူၼ်းဝၢၼ်ႈဢမ်ႇႁတ်းပွၵ်ႈၶိုၼ်းႁိူၼ်း။ သိုၵ်းမၢၼ်ႈၸိူဝ်းၼႆႉ သွၵ်ႈတဝ်ႁိူၼ်းယေးၵူၼ်းဝၢၼ်ႈ ဢဝ်ၵိၼ်မူမႃၵႃၵႆႇ ၵူၼ်းဝၢၼ်ႈသမ်ႉပေႃးၶႂ်ႉမူၺ်ႉမူတ်းယဝ်ႉၼႆ ၵူၼ်းပၢႆႈၽေးသိုၵ်း ဢၼ်ပွၵ်ႈတူၺ်းၶိုၼ်းဝၢၼ်ႈၵဝ်ႇၼၼ်ႉ လၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ