ၵူၼ်းမိူင်းယၢင်းလႅင် ဢၼ်ပၢႆႈၽေးပၢင်တိုၵ်းသေ မႃးသွၼ်ႈယူႇဝႆႉတီႈ ဝဵင်းပၢင်းတရႃႉ ၸိုင်ႈတႆးပွတ်းၸၢၼ်း မီးႁူဝ်ၵူၼ်း 600 ပၢႆၼၼ်ႉ ၶိုၼ်းဢွၼ်ၵၼ် ပွၵ်ႈႁိူၼ်းယေးၽႂ်မၼ်းၽွင်ႈ တႃႇမွၵ်ႈႁူဝ်ၵူၼ်း 200 ။
ပူၼ်ႉမႃး မိူဝ်ႈဝၼ်းတီႈ 10-11/4/2022 ၼႆႉ ၸုမ်းၸွႆႈထႅမ်ပရႁိတ ၼႂ်းပိုၼ်ႉတီႈ ၸွႆႈဢဝ် ၵူၼ်းမိူင်းယၢင်းလႅင် ဢၼ်ပၢႆႈၽေးသိုၵ်းမႃးမီးတီႈဝဵင်း ပၢင်းတရႃႉ ၼၼ်ႉသူင်ႇပွၵ်ႈၶိုၼ်းႁိူၼ်းမွၵ်ႈ 200 ၵေႃႉ ၊ ပဵၼ်ၵူၼ်းဝၢၼ်ႈ သွင်းပျွင်းၵူၺ်း၊ ၼႂ်းပိုၼ်ႉတီႈ သဵင်ၵွင်ႈယဵၼ်ၽွင်ႈယဝ်ႉလႄႈ တၢင်းၵူဝ်တၢင်း ပွၵ်ႈ ၼႆယဝ်ႉ။
ၽူႈၶဝ်ႈၸုမ်း ၸွႆႈထႅမ် ပရႁိတ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းပၢႆႈၽေးၵမ်ႈၽွင်ႈ ဢွၼ်ၵၼ်ပွၵ်ႈၶိုၼ်းႁိူၼ်းယေးယဝ်ႉ။ ယူႇတီႈ ႁဝ်းၶႃႈ ၸုမ်းပရႁိတ ႁူမ်ႈၵၼ် တင်းတၢင်ႇၸုမ်းသေ သူင်ႇပွၵ်ႈမိူဝ်းၶႃႈဢေႃႈ။ ႁဝ်းၶႃႈ လႆႈသူင်ႇထိုင်တီႈဝၢၼ်ႈသွင်းပျွင်း(ဆောင်းပြောင်း) ဝဵင်းပၢင်လွင်း ၵူၺ်းၶႃႈ။ တႃႇသိုပ်ႇမိူဝ်းထိုင်ၼႂ်းမိူင်းယၢင်းလႅင်လႄႈသင်၊ ၸိူဝ်းၵိုတ်းဝႆႉယူႇၸိူဝ်းၼၼ်ႉလႄႈသင် ယူႇတီႈ တီႈၸုမ်းၸွႆႈထႅမ်ပရႁိတ ၼႂ်းပိုၼ်ႉတီႈၽႂ်မၼ်း တၢင်းဝဵင်းၾၢႆၶုၼ် မိူင်းပၢႆးၸိူဝ်းၼႆႉ တေမႃးႁပ်ႉပွၵ်ႈမိူဝ်းၶႃႈ”- ဝႃႈၼႆ။
ၵူၼ်းပၢႆႈၽေးသိုၵ်းဢၼ်ၸုမ်းပရႁိတ သူင်ႇပွၵ်ႈၶိုၼ်းႁိူၼ်းယေးၼၼ်ႉ ဢမ်ႇမီးၶူဝ်းၶွင်ၵိၼ်လွင်ႈယမ်ႉလႄႈ ယင်းလႆႈၸွႆႈထႅမ်ပၼ်ပႃး ၶဝ်ႈၼမ်ႉတၢင်းၵိၼ်ထႅင်ႈလူးၵွၼ်ႇ ဝႃႈၼႆ။
“ၵူၼ်းပၢႆႈၽေးသိုၵ်း ဢၼ်သူင်ႇပွၵ်ႈမိူဝ်းၼၼ်ႉ ၵမ်ႈၽွင်ႈ ၶဝ်ႈသၢၼ်ၵေႃႈ ဢမ်ႇမီး လႆႈသူင်ႇပႃး ၶဝ်ႈသၢၼ် ၸွႆႈထႅမ်ၵႂႃႇၸွမ်းၶႃႈဢေႃႈ။ ယဝ်ႉ ၵေႃႈ ၼင်ႇႁိုဝ် ၵူၼ်းပၢႆႈၽေးသိုၵ်း ဢၼ်ပၢႆႈသွၼ်ႈဝႆႉ တီႈၵျွင်းမုၼ်ၸဝ်ႈ ၾၢႆၶုၼ်ၼၼ်ႉၵေႃႈ လႆႈၵမ်ႉၸွႆႈၶဝ်ႈၼမ်ႉတၢင်းၵိၼ်ယႅမ်ႉ ပႃးထႅင်ႈၶႃႈ။ ၵူၼ်းပၢႆႈၽေးသိုၵ်း ဢၼ်ပွၵ်ႈမိူဝ်းၼႆႉ ၵမ်ႈၼမ် ပဵၼ်ၵူၼ်းၾၢႆၶုၼ်လႄႈ မိူင်းပၢႆး”- ၽူႈၶဝ်ႈၸုမ်း ပရႁိတ သိုပ်ႇလၢတ်ႈၼင်ႇၼႆ။
တၢင်းပိုၼ်ႉ တီႈငဝ်းလၢႆးပၢင်တိုၵ်း ယင်းပႆႇၼိမ် လီ ၊ ၵူၼ်းဝၢၼ်ႈသမ်ႉလူဝ်ႇၶဝ်ႈသူၼ်ႁဵတ်းၼႃးယဝ်ႉလႄႈ တင်းၵူဝ်တင်းပွၵ်ႈဝႃႈၼႆ။
“မၢင်ဢွင်ႈတီႈပၢင်တိုၵ်းယဵၼ်လူင်းယဝ်ႉ ။ မၢင်ဢွင်ႈတီႈ ပၢင်တိုၵ်းဢမ်ႇပဵၼ်သေတႃႉ ႁိမ်းႁွမ်းဝၢၼ်ႈၶဝ်သမ်ႉတိုၵ်ႉမီးပၢင်တိုၵ်း။ ၵူၼ်းပၢႆႈၽေးသိုၵ်းတႄႉ ၶႂ်ႈပွၵ်ႈႁိူၼ်း၊ ၶႂ်ႈႁဵတ်းၵၢၼ်ၼႃႇယဝ်ႉလႄႈ တၢင်းၵူဝ် တၢင်းပွၵ်ႈၵၼ် ၶႃႈဢေႃႈ။ ယၢမ်းလဵဝ် ဢွၼ်ၵၼ်ပွၵ်ႈမိူဝ်း မွၵ်ႈ 200 ၼႆႉယဝ်ႉၶႃႈ”- ၽူႈၸွႆႈထႅမ် ၵူၼ်းပၢႆႈၽေးသိုၵ်းလၢတ်ႈ။
တၢင်းလႅၼ်လိၼ်တႆး – ယၢင်းလႅင် သိုၵ်းမၢၼ်ႈႁႅၼ်းသိုၵ်းပိုတ်းယိုဝ်း သိုၵ်းၵႅတ်ႇၶႄၵူၼ်းမိူင်း PDF ၊ ယိုဝ်းပႃးႁိူၼ်းယေးၵူၼ်းဝၢၼ်ႈလႄႈ လႆႈဢွၼ်ၵၼ်ပၢႆႈၽေးသိုၵ်း။ ယၢမ်းလဵဝ် ငဝ်းလၢႆးပၢင်တိုၵ်း တၢင်းမိူင်းပၢႆးလႄႈ ၾၢႆၶုၼ်ၼၼ်ႉတႄႉ ယဵၼ် ယဝ်ႉသေတႃႉ တၢင်းၾၢႆႇ သိုၵ်း မၢၼ်ႈသမ်ႉ တိုၵ်ႉထႅမ်ႁႅင်းသိုၵ်းယူႇ ၶိူဝ်းယႂ်း။
