ပွႆးလူႇတၢၼ်းသွမ်းသၢၼ် တီႈဝဵင်းမူႇၸေႊ ၽူႈၵွၼ်းၸႄႈတွၼ်ႈ တႂ်ႈၶွင်ႇသီႇသိုၵ်းမၢၼ်ႈ ၵုမ်းၵမ် ၸီႉသင်ႇ ၵူၼ်းမိူင်းႁႂ်ႈလူႇတၢၼ်းသႂ်ႇငိုၼ်း 1 ပွၵ်ႉတေဢမ်ႇလႆႈယွမ်း 10 သႅၼ်ပျႃး။
မိူဝ်ႈဝၼ်းတီႈ 9/4/2022 ယၢမ်းဝၢႆးဝၼ်း 1 မူင်းထိုင် 4 မူင်းပၢႆ ယူႇတီႈၽူႈၵွၼ်းၸႄႈတွၼ်ႈမူႇၸေႊ ဢွၼ်ႁူဝ် ၸတ်းႁဵတ်းပွႆးလူႇတၢၼ်း သွမ်းသၢၼ် တီႈပၢင်ႇႁိူဝ်းမိၼ်ၵဝ်ႇ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။ ၸီႉသင်ႇထိုင် ၵူႈပွၵ်ႉ/ ဢိူင်ႇလႄႈ ၸုမ်းၸွႆႈထႅမ်ပရႁိတ ႁႂ်ႈလႆႈသႂ်ႇငိုၼ်းၵွင်ၵၢင် တႃႇၸတ်းပွႆးလွင်းသွမ်းသၢၼ် 1 ပွၵ်ႉလႂ် တေလႆႈသႂ်ႇ 10 သႅၼ်ပျႃးၶိုၼ်ႈၼိူဝ် ။ တီႈပွႆးတုင်းသွမ်းၼၼ်ႉ မီးသင် ၶၸဝ်ႈလႄႈ ၼၢႆးၶၢဝ် ၶဝ်ႈႁူမ်ႈ တုင်းသွမ်း ႁဵင်ပၢႆ။
ၵူၼ်းပိုၼ်ႉတီႈ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “တႃႇတေပဵၼ်ပွႆးလူႇတၢၼ်းသွမ်းသၢၼ်ၼႆႉ ယူႇတီႈၽူႈၵွၼ်းၸႄႈတွၼ်ႈၸီႉသင်ႇလူင်းမႃး ။ ႁႂ်ႈၵဵပ်းငိုၼ်းၵၼ်သႂ်ႇ ၼိုင်ႈပွၵ်ႉတေဢမ်ႇလႆႈယွမ်း 10 သႅၼ်ပျႃးၶိုၼ်ႈၼိူဝ် ၵူႈပွၵ်ႉ/ ၵူႈဢိူင်ႇယဝ်ႉ ၼႂ်းၸႄႈဝဵင်းမူႇၸေႊ ။ ၸုမ်းပရႁိတ၊ ၶွမ်ႊပၼီႊ၊ ႁွင်ႈၵၢၼ်လူင်ပွင်ၸိုင်ႈၶဝ်၊ ၵူၼ်းၶဝ်ႈဢွၵ်ႇၸမ်ၸႂ်ၶဝ် ၸိူဝ်းၼၼ်ႉလႄႈ ၸုမ်းပျီႇတူႉၸိတ်ႉ ၸိူဝ်းၼႆႉ လႆႈသႂ်ႇမူတ်းၶႃႈ။ ”- ဝႃႈၼႆ။
ပၢင်ပွႆးလွင်းသွမ်းသၢၼ်တီႈမူႇၸေႊၼႆႉ ပေႃးပဵၼ်ၾိင်ႈၵူၼ်းမူႇၸေႊ တႄႉတႄႉၼႆ တေၸတ်းႁဵတ်းဝၢႆးဢွၵ်ႇဝႃႇ။
ဢၼ်သိုၵ်းမၢၼ်ႈၸီႉသင်ႇႁႂ်ႈႁူမ်ႈၵၼ်ႁဵတ်းၸိူင်ႉၼႆ ၼႆႉပဵၼ်ပွၵ်ႈၵမ်းႁႅၵ်ႈ(ဢွၼ်တၢင်းသုတ်း)။ ၵူၼ်းမိူင်းမူႇၸေႊတႄႉလၢတ်ႈဝႃႈ မိူၼ်လွႆးၶေႃႉလွႆးၵဵဝ်ႇ ပၼ်သိုၵ်းမၢၼ်ႈၵူၺ်း ဝႃႈၼႆ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈၸတ်းႁဵတ်းပွႆးလွင်းသွမ်းသၢၼ်ၼႆႉ ပေႃးဢဝ်ၸွမ်းထုင်း ၼႂ်းပိုၼ်ႉ တီႈဝႃႈၸိုင် ပႆႇၸႂ်ႈၶိင်ႇၸႂ်ႈၶၢဝ်းမၼ်းၶႃႈလူး။ ဢၼ်ၶဝ်ႁဵတ်းၼႆႉ တႃႇလွႆႉၶေႃႉ/ မေးၵဵဝ်ႇ ၽွင်းဝၢၼ်ႈမိူင်းသုၵ်ႉယုင်ႈၼႆႉၵူၺ်း ႁဝ်းၶႃႈ ႁၼ်ထိုင် တႄႉ။ ပွႆးသွမ်းသၢၼ်တီႈမူႇၸေႊၼႆႉ ၶဝ်တိုၵ်ႉႁဵတ်းမႃး ပဵၼ်ပွၵ်ႉၵမ်းႁႅၵ်ႈၼႆႉၵူၺ်း။ သမ်ႉဝႃႈတၢင်းလူႇဝႃႇ သမ်ႉမႃးမၵ်းၶၢၼ်းဢဝ်ၸိူင်ႉၼႆ”- ဝႃႈၼႆ။
ပၢင်လူႇတၢၼ်း သွမ်းသၢၼ်ၼႆႉ ပၢင်းသင်ၶၸဝ်ႈ ၶဝ်ႈႁူမ်ႈတုင်းသွမ်း တင်းမူတ်း 102 ဝတ်ႉ ၼႂ်းၸႄႈတွၼ်ႈမူႇၸေႊ မိူၼ်ၼင်ႇ ၸႄႈဝဵင်း ၼမ်ႉၶမ်း၊ မူႇၸေႊ၊ ၵူတ်ႉၶၢႆ၊ မိူင်းၵူဝ်း၊ မၢၼ်ႇႁဵဝ်း၊ ပၢင်ႇသၢႆး၊ မိူင်းပေႃႈ တင်းမူတ်းသင်ၶၸဝ်ႈ တေမီး 1,000 တူၼ်၊ ၼၢႆးၶၢဝ်သမ်ႉ 3 ၵျွင်း/ ဝတ်ႉ မိူၼ်ၼင်ႇ ၵျွင်းၵမ်ႇမထၢၼ်း၊ ၵျွင်း 105 လၵ်းလႄႈ ၵျွင်းၵွင်းဝႅတ်ႉ ဝဵင်းမူႇၸေႊ ။
တီႈပၢင်လူႇတၢၼ်း သွမ်းသၢၼ်ၼၼ်ႉ မီးႁွင်ႈၵၢၼ်လူင်ပွင်ၸိုင်ႈ ၵူၼ်းမိူင်းပိုၼ်ႉတီႈ ၶဝ်ႈႁူမ်ႈတင်းၼမ်လၢႆ ယူႇဢႅပ်ႉၸမ်ၵၼ်ႁႅင်း။ ယဝ်ႉၵေႃႈ မၢင်ၵေႃႉဢမ်ႇသႂ်ႇၽႃႈတူမ်းသူပ်း (Mask) ၵေႃႈမီးၼမ် ။ ပေႃးဢဝ်ပိူင်ၶူဝ်ႊဝိတ်ႉ 19 ဝႃႈၼႆၸိုင် ဢမ်ႇမႅၼ်ႈၸွမ်းပိူင်သေဢိတ်း ၵူၼ်းၼုမ်ႇပိုၼ်ႉတီႈမူႇၸေႊလၢတ်ႈ။
။ ၵူၼ်းမိူင်းမူႇၸေႊတႄႉလၢတ်ႈဝႃႈ မိူၼ်လွႆးၶေႃႉလွႆးၵဵဝ်ႇ ပၼ်သိုၵ်းမၢၼ်ႈၵူၺ်း ဝႃႈၼႆ။){kind=link}