ၶႄႇၶိုၼ်းႁပ်ႉသိုဝ်ႉဢွႆႈ တီႈၽၵ်းတူလႅၼ်လိၼ် တႆး – ၶႄႇ ဝဵင်းၼမ်ႉၽႃႈ (သျိၼ်းသူၺ်ႇႁေႃႇ)  ႁဵတ်းႁႂ်ႈ ၸဝ်ႈသူၼ်ဢွႆႈ ဢွၼ်ၵၼ်ႁိပ်ႈၼႅတ်ႈတေႃႉသူင်ႇၶၢႆ  ။

တႄႇဢဝ် ႁူဝ်လိူၼ်ဢေႊပရိူဝ်ႊ 2022 ၼႆႉမႃး ၸဝ်ႈသူၼ်ဢွႆႈ ၼႂ်းမိူင်းတႆးပွတ်းႁွင်ႇ လၢႆၸႄႈဝဵင်း ဢွၼ်ၵၼ် တေႃႉသူင်ႇဢွႆႈၶၢႆၸူးတၢင်း မိူင်း ၶႄႇ တီႈၽၵ်းတူလႅၼ်လိၼ်တႆး – ၶႄႇ ဝဵင်းၼမ်ႉၽႃႈ ၸိုင်ႈတႆးပွတ်းႁွင်ႇ။  

ၸဝ်ႈသူၼ်ဢွႆႈ ၸႄႈဝဵင်းသႅၼ်ဝီ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ တႄႇဢဝ်ႁူဝ်လိူၼ်ၼႆႉမႃး ၶၼ်ဢွႆႈပဵၼ်ၵၢၼ်ၶိုၼ်းယဝ်ႉ တၢင်းမိူင်းၶႄႇႁပ်ႉသိုဝ်ႉယဝ်ႉ။ တေလႆႈတေႃႉသူင်ႇၶဝ်ႈ တၢင်းၽၵ်းတူဝဵင်းၼမ်ႉၽႃႈ (ၶျိၼ်းသူၺ်ႇႁေႃႇ) ၼၼ်ႉၵူၺ်းၶႃႈ။ ယၢမ်းလဵဝ် ဢွႆႈၼႆႉလႆႈၶၢႆ  1 တၼ်ႊ  8 မိုၼ်ႇပျႃးၶႃႈ။ မိူဝ်ႈၵူႈပွၵ်ႈတႄႉ 1 တၼ်ႊလႆႈၶၢႆထိုင် သႅၼ်ပျႃးပၢႆၶႃႈဢေႃႈ။ ၶၼ်ဢွႆႈၼႆႉ တိုၵ်ႉႁႃပဵၼ်ၵၢၼ်မႃး ၼႂ်းၶၢဝ်းတၢင်း 3-4 ဝၼ်းၼႆႉ ၵူၺ်း”- ဝႃႈၼႆ။

မိူင်းၶႄႇပိၵ်ႉဢိုတ်းၽၵ်းတူမိူင်းမႃး တႄႇဢဝ် ဝၼ်းတီႈ 1/4/2020  မႃး တေႃႇထိုင် 1/4/2022 ၼႆႉ မီးၶၢဝ်းတၢင်း 2 ပီယဝ်ႉ ။ ထိုင်မႃး 1/2/2021 သိုၵ်းမၢၼ်ႈသမ်ႉ ယိုတ်းမိူင်းထႅင်ႈလႄႈ ႁဵတ်းႁႂ်ႈဝၢၼ်ႈမိူင်းသုၵ်ႉယုင်ႈထႅင်ႈ  ၶၼ်ဢွႆႈဢမ်ႇၼိမ်၊ ၸဝ်ႈသူၼ်ဢွႆႈ ဢွၼ်ၵၼ်သုမ်းတင်းၼမ် ထူပ်းတၢင်းယၢပ်ႇၽိုတ်ႇမႃး။

“ၸူဝ်ႈၶႄႇပိၵ်ႉၽၵ်းတူမိူင်းမႃး၊ ဝၢၼ်ႈမိူင်းၵေႃႈ သုၵ်ႉသၵ်ႉ ၽွင်းသိုၵ်းမၢၼ်ႈယိုတ်းမိူင်းၼႆႉသေ ၸဝ်ႈသူၼ်ဢွႆႈၼႆႉ ဢွၼ်ၵၼ်သုမ်းလူင်သုမ်းလၢင်။ ၸိူဝ်းလႆႈ ၽၼ်းပႅတ်ႈပဵၼ်ၵေႃႇပဵၼ်ၵွင်ၵေႃႈမီး၊ မၢင်ၵေႃႉ ဢဝ်ၵႂႃႇဢိတ်ႇၼမ်ႉဢွႆႈ။ မၢင်ၵေႃႉ ပွႆႇပႅတ်ႈဝႆႉၸိူင်ႉၼႆ တင်းသူၼ်။ မၢင်ၵေႃႉ တၢင်ႇၵႂႃႇတၢင်း သူင်ႇၶၢႆတီႈႁူင်းၸၢၵ်ႈဢိတ်ႇဢွႆႈ တၢင်းမိူင်းယႆ ၸိူဝ်းၼႆႉၵေႃႈမီး”- ၸဝ်ႈသူၼ်ဢွႆႈ သိုပ်ႇလၢတ်ႈၼႄ ၼင်ႇၼႆ။

ၵူႈပွၵ်ႈ ၽွင်းဝၢၼ်ႈမိူင်းလီၼၼ်ႉ ၶၼ်ဢွႆႈ ဢၼ်တေႃႉသူင်ႇၶၢႆတၢင်းမိူင်းၶႄႇၼၼ်ႉ 1 တၼ်ႊ  1 သႅၼ်ပျႃးပၢႆ။ ၵႃးလူင် 12 လေႃႉၼႆႉ လႆႈၶႂၢင်ႉတၢင်ႇထိုင် 15 တၼ်ႊ တေႃႇလမ်း ၼႆယဝ်ႉ။

ၼႂ်းၶၢဝ်းတၢင်း 3-4 ဝၼ်းမႃးၼႆႉ ၸဝ်ႈသူၼ်ဢွႆႈ တၢင်းမူႇၸေႊ၊ ၼမ်ႉၶမ်း၊ ၵူတ်ႉၶၢႆ၊ သႅၼ်ဝီ လႄႈ ဢိၵ်ႇထႅင်ႈလၢႆ ၸႄႈဝဵင်း ဢွၼ်ၵၼ် တေႃႉ ဢွၵ်ႇသူင်ႇ ၶၢႆၸူးတၢင်းမိူင်းၶႄႇ တီႈၽၵ်းတူဝဵင်းၼမ်ႉၽႃႈ မႃးၶိူဝ်းယႂ်း။

ယၢမ်းလဵဝ် ၸဵမ်ၵႃးလူင်၊ ၵႃးဢွၼ်ႇ၊ လႅင်းၵႃး ၸိူဝ်းၼႆႉ ၶိုၼ်းဢွၼ်ၵၼ် လႅၼ်ႈၵႂႃႇမႃးၶိုၼ်းတင်းၼမ်  တၢင်းသၢႆသႅၼ်ဝီ – ၵုၼ်လူင်-ႁူဝ် ပၢင်ႇလႄႈ ဝဵင်းၼမ်ႉၽႃႈ ၸိူဝ်းၼႆႉ။  ၵူၼ်းမိူင်းတႆး – မိူင်းမၢၼ်ႈ ဢွၼ်ၵၼ်ၶိုၼ်ႈၵႂႃႇႁႃႁဵတ်းၵၢၼ်ၵၼ်ၵေႃႈ မီးမႃးတင်းၼမ် ။