သိုၵ်းမၢၼ်ႈ ထႅမ်ႁႅင်းသိုၵ်း ၼႂ်းၸိုင်ႈတႆးပွတ်းၸၢၼ်းထႅင်ႈ တင်းၼမ်

ၶွင်ႇသီႇသိုၵ်းမၢၼ်ႈ ထႅမ်ႁႅင်းသိုၵ်း ၼႂ်းၸိုင်ႈတႆး ပွတ်းၸၢၼ်း တင်းၼမ်  ၵူၼ်းမိူင်း မႆႈၸႂ် ၵူဝ်ပဵၼ်ပၢင်တိုၵ်းယႂ်ႇလူင်။

ႁၢင်လိူၼ်မၢတ်ႊၶျ် 2022 ၼႆႉ ၶွင်ႇသီႇသိုၵ်းမၢၼ်ႈ သွင်တပ်ႉၵွင် ဢဵၼ်ႁႅင်း 100 ပၢႆ ၵႃး 10 လမ်းပၢႆ လုၵ်ႉတၢင်းၸႄႈဝဵင်းဢွင်ႇပၢၼ်း၊ ယွင်ႁူၺ်ႈ ၸိူဝ်းၼႆႉ မုင်ႈၼႃႈၸူး ၼႂ်းၸႄႈဝဵင်းလွၵ်ႉၸွၵ်ႇ ၸိုင်ႈတႆး ပွတ်းၸၢၼ်း ၵႂႃႇတူင်ႉၼိုင်ဝႆႉ တၢင်းဢိူင်ႇၼွင်ဝူဝ်း လႅၼ်ၶႅၼ်ႈ ၸိုင်ႈတႆးပွတ်းႁွင်ႇ ယၢၼ် ဝဵင်းလွၵ်ႉၸွၵ်ႇ 50 လၵ်းပၢႆ။

ၵူၼ်းပိုၼ်ႉတီႈ ပွတ်းဢိူင်ႇၼွင်ဝူင်း လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်မႃးပၵ်းယူႇဝႆႉ တၢင်းဢိူင်ႇၼွင်ဝူဝ်းၼႆႉ တေမီးဢဵၼ်ႁႅင်းတင်းၼမ်ၶႃႈ။ ယွၼ်ႉ ဝႃႈ တၢင်းၼႆႉ မီးဝႆႉ ၸုမ်းဢူၺ်းလီပွတ်းႁွင်ႇ တူင်ႉၼိုင်ယူႇဝႆလႄႈ ႁဝ်းၶႃႈ ၵူၼ်းမိူင်းတႄႉ ၵူဝ်ၶဝ်ပဵၼ်ပၢင်တိုၵ်းၵၼ်ႁၢဝ်ႈႁႅင်း ၶိုၼ်ႈမႃးၵူၺ်းယဝ်ႉ။ ယဝ်ႉၵေႃႈ လႆႈငိၼ်းထႅင်ႈဝႃႈ ဢၼ်မႃးၽိုၵ်းၵၢၼ်သိုၵ်းဝႆႉတီႈ ၼႂ်းတပ်ႉပထူးၶဝ်ၼၼ်ႉၵေႃႈမီးထႅင်ႈတင်းၼမ်ၼႆၶႃႈဢေႃႈ”- ဝႃႈၼႆ။

 မိူဝ်ႈဝၼ်းဢင်းၵၢၼ်း ဝၼ်းတီႈ 28 လိူၼ်မၢတ်ႊၶျ်ၼႆႉၵူၺ်းၼင်ႇၵဝ်ႇ ၵႃးသိုၵ်းမၢၼ်ႈလုၵ်ႉတၢင်း လွၵ်ႉၸွၵ်ႇ ၊ ၵၢတ်ႇလေႃႉ  ၶိုၼ်ႈမႃးတၢင်း ဝဵင်းတူၼ်ႈတီးမွၵ်ႈ 50 လမ်း ။ လူင်းၵႂႃႇတၢင်းမိူင်းတႆးပွတ်းၸၢၼ်းမွၵ်ႈ 20 လမ်း။ လူင်းၵႂႃႇတၢင်းယၢင်းလႅင်မွၵ်ႈ 30 လမ်း။ 

ၵူၼ်းတူၼ်ႈတီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “  ႁဝ်းၶႃႈတိုၵ်ႉလုၵ်ႉၼႂ်းဝဵင်းမႃး၊ ထႅဝ်ၵႃးၶဝ်မႃးၼႆလႄႈ သိုၵ်းၸိူဝ်းပႂ်ႉဝႆႉၸွမ်းတၢင်းၼၼ်ႉ ၸႂ်ႉႁဝ်းၶႃႈ ဢွၵ်ႇတၢင်းသေ ၵိုတ်းဝႆႉပၼ်ႁိမ်းတၢင်း။ ဢၼ်သိုပ်ႇၵႂႃႇတၢင်းမိူင်းတႆးမီးမွၵ်ႈ 20 လမ်း။ 1 လမ်းပႃးၵူၼ်းသိုၵ်းမွၵ်ႈ 30 ၵေႃႉ ။ ၵူၼ်းသိုၵ်းၶဝ်ပဵၼ်လုၵ်ႈဢွၼ်ႇလၢႆလၢႆ။မွၵ်ႈဢႃႇယု 20 လႄႈပႃႈတႂ်ႈလွၼ်ႉလွၼ်ႉ။ ၸိူဝ်းလိူဝ်တႄႉ လႅပ်ႈတေသိုပ်ႇၵႂႃႇတၢင်းယၢင်းလႅင်ၶႃႈၼေႈ   ”- ဝႃႈၼႆ။  

ဢၼ်သိုၵ်းမၢၼ်ႈမႃးမိူင်းတႆးၼမ်ၼႆႉ ၵူၼ်းမိူင်းတႆးဢွၼ်ၵၼ်မႆႈၸႂ်ၵူဝ်မီးပၢင်တိုၵ်းသိုၵ်းသိူဝ်ထႅင်ႈ ။ၾၢႆႇၼိုင်ႈ ၼႂ်းဝၼ်းမိူဝ်ႈၼႆႉ မီးၶၢဝ်ႇၽႄႈၼိူဝ်သိုဝ်ႇၼႅင်ႈသၢၼ်ဝႃႈ –   SSPP ဝၢၼ်ႈႁႆး သူင်ႇတူဝ်တႅၼ်း ၵႂႃႇႁူပ်ႉ သိုၵ်းမၢၼ်ႈ တီႈၼေႇပျီႇတေႃႇ။ သိုၵ်းမၢၼ်ႈႁႂ်ႈသိုၵ်း SSPP ဢၼ်ပၵ်းဝႆႉၼႂ်းၸိုင်ႈတႆးပွတ်းၸၢၼ်း ထွႆထွၼ်ပွၵ်ႈၶိုၼ်း ငဝ်ႈငုၼ်းဝၢၼ်ႈႁႆး။ သင်ဢမ်ႇထွႆထွၼ် သိုၵ်းမၢၼ်ႈ တေႁႅၼ်းသိုၵ်းလေႃႇ တိုၵ်း- ၼႆလႄႈ ယိင်ႈၶႅၼ်းႁဵတ်းႁႂ်ႈၵူၼ်းမိူင်းတႆးပွတ်းၸၢၼ်း တူၵ်းၸႂ်။

ၵဵဝ်ႇၵပ်းလွင်ႈၼႆႉ ယူႇတီႈၽူႈတွႆႇႁွၵ်ႈ ၶတ်းၸႂ်တိတ်းတေႃႇၸူးၽူႈၶၢၼ်ပၢၵ်ႇလႄႈၽူႈမီးပုၼ်ႈၽွၼ်း SSPP တႃႇတွင်ႈထၢမ်ဢဝ်ၶေႃႈယိုၼ်ယၼ်   ယူႇလၢႆၵမ်းယဝ်ႉၵေႃႈ တိတ်းတေႃႇယင်းပႆႇလႆႈ။

သိုၵ်းမၢၼ်ႈၼႆႉ ယၢမ်းလဵဝ် ထႅမ်ႁႅင်းသိုၵ်းမႃး ဢမ်ႇၵႃးၼႂ်းမိူင်းတႆး မိူင်းယၢင်းလႅင်ၵူၺ်း ။ တၢင်ႇၸႄႈမိူင်းလႄႈတိူင်း ၸိူဝ်းမီးသိုၵ်းၵႅတ်ႇၶႄၵူၼ်းမိူင်း PDF ၼၼ်ႉၵေႃႈ ထႅမ်ႁႅင်းသိုၵ်းၶိုၼ်ႈၸူးတင်းၼမ် ႁွင်ႈၵၢၼ်ၶၢဝ်ႇမၢၼ်ႈလၢႆလၢႆဢၼ်ၵေႃႈဢွၵ်ႇဝႆႉၼင်ႇၼႆ။