ထူဝ်ႈတၢင်ႇၵူၼ်းမႃးဝႆႈၽြႃး တီႈထၢတ်ႈမူၺ်ႇတေႃႇ ဝဵင်းမိူင်းၵိုင် လမ်းၼိုင်ႈ ပဵၼ်ၽေးၵိုင်ႉၵၢင်သေ ပိၼ်ႈၶႂမ်ႈ ထဝ်ႈယိင်းဢႃယု 80 ပၢႆ ၵေႃႉၼိုင်ႈ လူႉတၢႆ လိူဝ်ၼၼ်ႉ မၢတ်ႇၸဵပ်း 10 ပၢႆ။
မိူဝ်ႈဝႃး ဝၼ်းတီႈ 15/3/2022 ယၢမ်းဝၢႆးဝၼ်းမွၵ်ႈ 4 မူင်း ထူဝ်ႈတၢင်ႇၵူၼ်းမႃးဝႆႈၽြႃး ထၢတ်ႈမူၺ်ႇတေႃႇ လမ်းၼိုင်ႈ ပွၵ်ႈမိူဝ်းသေ လႆႈပဵၼ် ၽေးၵိုင်ႉၵၢင်ႇ ပိၼ်ႈၶႂမ်ႈၵႂႃႇ တီႈႁိမ်းၵွင်းမူးတၼ် ယၢၼ်ဝဵင်းမွၵ်ႈ 6 လၵ်း ၼႂ်းဢိူင်ႇႁူဝ်ၼႃး ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း။
ၵူၼ်းပိုၼ်ႉတီႈ မိူင်းၵိုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်မိူဝ်ႈဝႃးၶႃႈ။ မႃးဝႆႈၽြႃး တီႈထၢတ်ႈမူၺ်ႇတေႃႇသေ ပွၵ်ႈမိူဝ်း။ ထဝ်ႈယိင်း ဢႃယု 80 ပၢႆ လူႉတၢႆ ၵေႃႉၼိုင်ႈ တိူဝ်ႉၺႃးတီႈၵွၵ်ႈႁူဝ်ၼႆၶႃႈ။ လိူဝ်ၼၼ်ႉ မၢတ်ႇၸဵပ်း 10 ပၢႆၶႃႈဢေႃႈ။ ပဵၼ်ပီႈၼွင်ႉတဢၢင်း ၵူၼ်း ဝၢၼ်ႈပၢင်ၼိမ်ၶႃႈ”- ဝႃႈၼႆ။
ၼႂ်းၵူၼ်းမၢတ်ႇၸဵပ်း 10 ပၢႆၼၼ်ႉ တႃႇ 3 ၵေႃႉ လႆႈမၢတ်ႇၸဵပ်းႁၢဝ်ႈႁႅင်းသေ ယူႇတီႈၸုမ်းၸွႆႈထႅမ်ပရႁိတ ဝဵင်းမိူင်းၵိုင် လႆႈသူင်ႇၵႂႃႇ ယူတ်းယႃ ဝႆႉတီႈႁူင်းယႃလွႆလႅမ်ယဝ်ႉ ဝႃႈၼႆ။
ပွႆးလိူၼ်သီႇ ထၢတ်ႈမူၺ်ႇတေႃႇ မိူင်းၵိုင် 2 ပီပူၼ်ႉမႃး တၢင်းပဵၼ်ၶူဝ်ႊ ဝိတ်ႉလႄႈ ငဝ်းလၢႆးၵၢၼ်မိူင်း၊ ၵၢၼ်သိုၵ်း ဢမ်ႇၼိမ်သဝ်းလႄႈဢမ်ႇပဵၼ်ၸတ်းႁဵတ်း။ ပီၼႆႉၵေႃႈ ၼွၵ်ႈလိူဝ်သေ တၢင်ႇသွမ်းတေႃႇဝၼ်းလိူၼ်မူၼ်း ဢမ်ႇပၼ်ႁဵတ်းပွႆးမူၼ်ႇၵျေႃႇၵႃႈဝႅၼ်။ ဢမ်ႇမီးပၢင်ၵၢတ်ႇၶၢႆၶူဝ်း ။ ၵွပ်ႈၼႆလႄႈ ပွႆးလိူၼ်သီႇ မူၺ်ႇတေႃႇမိူင်းၵိုင်ၼႆႉ ဢမ်ႇလႆႈၸတ်းႁဵတ်းမႃး လႆႈ 3 ပီ ယဝ်ႉ။
တီႈၽြႃးၵၢင်ႉမေႃႇ သီႇပေႃႉတႄႉ ပီၼႆႉပဵၼ်ပွႆးယႂ်ႇၵိုၼ်းလူင်။ မီးၶႅၵ်ႇတီႈၸမ်တီႈၵႆမႃးဝႆႈသႃ လူႇတၢၼ်းၵိုၼ်းၶွၼ်ႈသတ်ႉၼႅၼ်ႈ။ ရူတ်ႉၵႃးၶပ်ႉယႆ ၵိုတ်းဝႆႉသွင်ၾၢၵ်ႇၶၢင်ႈတၢင်းသမ်ႉပေႃးသုတ်းသၢႆတၢင်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ