ၶွင်ႇသီႇသိုၵ်းမၢၼ်ႈ ပိုၼ်ၽၢဝ်ႇဝႃႈ ၽွင်းၶၢဝ်းသွၼ်းၼမ်ႉ/ သၢင်းၵျၢၼ်ႇၼႆႉ ပၼ်ၶႂၢင်ႉၵူၼ်းမိူင်း ၶွၼ်ႈတုမ်ၵၼ်လႆႈ ထိုင် 400 ၵေႃႉ ၵူၼ်းၼုမ်ႇမိူင်းတႆး ႁၼ်ထိုင်ဝႃႈ သိုၵ်းမၢၼ်ႈၶႂ်ႈဢဝ်ၼႃႈဢဝ်တႃ ၼႄၼွၵ်ႈမိူင်းဝႃႈ ဝၢၼ်ႈမိူင်းၵတ်းယဵၼ် ၸတ်းပွႆးယႂ်ႇလၢမ်းလူင်၊ ၵုမ်းၵူၼ်းမိူင်းလႆႈလီငၢမ်း ၼႆၼၼ်ႉၵူၺ်း ဝႃႈၼႆ။
သိုၵ်းမၢၼ်ႈပိုၼ်ၽၢဝ်ႇဝႃႈ တႄႇဢဝ် မိူဝ်ႈၼႆႉ ဝၼ်းတီႈ 16/3/2022 ၵႂႃႇ ပၼ်ၶႂၢင်ႉၵူၼ်းမိူင်း ၶွၼ်ႈတုမ်ၵၼ်လႆႈထိုင် 400 ၵေႃႉ ယွၼ်ႉဝႃႈ တၢင်းပဵၼ်ၶူဝ်ႊဝိတ်ႉ 19 ၼႂ်းမိူင်းႁူမ်ႈတုမ် လူတ်းယွမ်းလူင်းၼမ်မႃးယဝ်ႉဝႃႈၼႆ။
ၽူႈတူင်ႉၼိုင် ၼႂ်းတူင်ႇဝူင်းတႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“လႆႈႁူႉဝႃႈ သိုၵ်းမၢၼ်ႈၼႆႉ ၶႂ်ႈၸတ်းႁဵတ်း ပွႆးသွၼ်းၼမ်ႉယႂ်ႇလူင်။ မၼ်းပဵၼ် ၽႅၼ်ၶဝ် ႁႂ်ႈႁဝ်းတူၵ်းလွၵ်းၵၢၼ်မိူင်းၶဝ်ၵူၺ်း။ ယၢမ်းလဵဝ် ၵူၼ်းမိူင်းသမ်ႉ ဢိုပ်းပွႆး ပေႃးႁဝ်း ၶဝ်ႈႁူမ်ႈလဵၼ်ႈၼမ်ႉ ၊ ႁူမ်ႈၵႂႃႇၵႃႈဝႅၼ်ႈၸွမ်း ၶဝ်၊ ၶဝ်သမ်ႉတေထၢႆႇၶႅပ်းႁၢင်ႈ ဢဝ်ဢွၵ်ႇၼႄၵမ်ႇၽႃႇဝႃႈ ၶဝ်ၵုမ်းထိင်းဝၢၼ်ႈမိူင်းလႆႈယဝ်ႉ ၼႆသေႁႂ်ႈၵူႈမိူင်းမိူင်း ယွမ်းႁပ်ႉၶဝ်ပဵၼ်လူင်ပွင်ၸိုင်ႈ မႃး။ သိုၵ်းမၢၼ်ႈ ဢမ်ႇသူၼ်ၸႂ်လေႃႇ ၵူၼ်းမိူင်းၶႂ်ႈတၢႆတၢႆ ၶႂ်ႈပဵၼ်တၢင်းပဵၼ်ၶူဝ်ႊဝိတ်ႉၵေႃႈယဝ်ႉ ၶဝ်လူဝ်ႇဢဝ် ၶႅပ်းႁၢင်ႈၼႄၵမ်ႇၽႃႇၵူၺ်း။ ၵွပ်ႈ ၼႆလႄႈ ႁဝ်းၵူၼ်းမိူင်းတႆး ႁူႉပွင်ႇၸႂ်ၵၼ်သေ ယႃႇပေၵႂႃႇၶဝ်ႈႁူမ်ႈ ပွႆးသွၼ်းၼမ်ႉ ၊ ၵူဝ်ၵႂႃႇတူၵ်းလွၵ်းသိုၵ်းမၢၼ်ႈလဵၼ်ႈၵၢၼ်မိူင်း၊ ယဝ်ႉ ၵေႃႈ ၵူဝ်တိတ်းၸပ်းတၢင်းပဵၼ်ၵၼ်ၶႃႈဢေႃႈ”- ဝႃႈၼႆ။
ပွႆးသွၼ်းၼမ်ႉ ဢၼ်သိုၵ်းမၢၼ်ႈ ပိုတ်ႇပၼ် ႁႂ်ႈၸတ်းႁဵတ်းယႂ်ႇလူင် ၶွၼ်ႈတုမ်ၵၼ်ၼမ်ၼၼ်ႉ သင်ပဵၼ်လႆႈ ယႃႇႁႂ်ႈၵူၼ်းမိူင်းတႆး ၸဵမ်ၵူၼ်းမိူင်း/ ၵူၼ်းၼုမ်ႇ ၶဝ်ႈႁူမ်ႈပႃးၸွမ်း ယိင်ႈၶႅၼ်းလီ ၵူဝ်တူၵ်းပဵၼ်ယိူဝ်ႇ ၼႂ်းလွၵ်းၵၢၼ်မိူင်း ၶွင်သိုၵ်းမၢၼ်ႈသေ ၵူဝ်လႆႈလူႉတၢႆ မၢတ်ႇၸဵပ်းၸွမ်းလၢႆလၢႆ။
ၽူႈယၢမ်ႈတူင်ႉၼိုင် ၼႂ်းၵၢၼ်မိူင်းတႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ် သိုၵ်းမၢၼ်ႈၼႆႉ ၶဝ်ၸမ်တူၵ်းသုမ်းယဝ်ႉ ၸင်ႇဝႃႈ ၶဝ်တေ ၶိုင်ၵူႈမဵဝ်း ပွႆးလၢမ်းၸိူဝ်းၼႆႉ ႁႂ်ႈၵူႈမိူင်းမိူင်းႁၼ်လီဝႃႈ ၶဝ်ၵုမ်းလႆႈဝၢၼ်ႈမိူင်း ဢမ်ႇသုၵ်ႉယုင်ႈသင် ၼႆၸိူဝ်းၼႆႉ ႁဝ်းၵူၼ်းမိူင်း တေၸၢင်ႈတူၵ်း လွၵ်းၶဝ်။ မိူၼ်ၼင်ႇ ပွႆးသွၼ်းၼမ်ႉ တႃႇတေၸတ်းႁဵတ်းတီႈ ယၼ်ႇၵုင်ႇ၊ မၼ်းတလေး ၸိူဝ်းၼႆႉ မၼ်းယၢပ်ႇ တေၵႆႉမီးလွင်ႈမၢၵ်ႇတႅၵ်ႇ ၵူၼ်း မိူင်းတၢႆ ၵူဝ်ဢမ်ႇႁတ်းၵႂႃႇၶဝ်ႈႁူမ်ႈၵၼ်ၸိူဝ်းၼႆႉသေ ႁူဝ်ၵူၼ်းတေဢေႇ။ ၵွပ်ႈၼႆ ပေႃးၸတ်းၼႂ်းမိူင်းတႆးႁဝ်း ၸဵမ်ၵူၼ်းၼုမ်ႇ ၵူၼ်းမိူင်းႁဝ်း ယႃႇပေၶဝ်ႈႁူမ်ႈ တူင်ႉၼိုင်သင်ၸွမ်း ၵမ်ႉမႃးမၢၵ်ႇတႅၵ်ႇ ပဵၼ်ပၢင်တိုၵ်းၵၼ် မိူဝ်ႈၶၢဝ်းသွၼ်းၼမ်ႉၼႆ ႁဝ်းၶႃႈ တေၸၢင်ႈပဵၼ် တူဝ်ယိူဝ်ႇမၼ်း ၼႂ်းၵႄႈပၢင်မူၼ်ႈသိူဝ်းပွမ်/ တု ဢၼ်ၶဝ်ဢွၼ်ၸတ်းၼၼ်ႉ”- ဝႃႈၼႆ။
ယၢမ်းလဵဝ် ပႆႇထိုင် ပွႆးသွၼ်းၼမ်ႉၵေႃႈ ယူႇတီႈပလိၵ်ႈမၢၼ်ႈ/ သိုၵ်းမၢၼ်ႈၼႆႉ ပေႃးပိုတ်ႇပၼ်တိုဝ်ႉတၢင်း ၵူၼ်းမိူင်းတႆး ၸတ်းႁဵတ်းပၢင်တေႃႇလွင်း ထၢင်ႇႁၢင်ႈလွတ်ႈလႅဝ်း ၵူႈတီႈယဝ်ႉ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း ပွတ်းၸၢၼ်းၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “သွၼ်းၼမ်ႉ ပီၼႆႉ ၶဝ်ပၼ်ၶႂၢင်ႉၵူၼ်းမိူင်း လႅၼ်ႈထၢင်ႇႁၢင်ႈ လွတ်ႈလႅဝ်း ႁႂ်ႈၵိုၼ်းၶွၼ်ႈၼႆၶႃႈဝႃႇ။ မိူၼ်ဝႃႈ ယႃႇႁႂ်ႈၵူၼ်းမိူင်း ပၵ်းၸႂ်သူၼ်ၸႂ်ၵၢၼ်မိူင်းသင် မၼ်းပဵၼ်လွၵ်းၵၢၼ်မိူင်းသိုၵ်းမၢၼ်ႈၶဝ် ယူႇ။ ပၢင်တေႃႇလွင်းၵေႃႈ ၶဝ်ပွႆႇၼမ်ၼႃႇ လႆႈငိၼ်းဝႃႈ တီႈမိူင်းပၼ်ႇၼႆႉ ပၢႆပိုတ်ႇပၢင်တေႃႇလွင်း ၼႂ်းႁူင်းပလိၵ်ႈၶဝ်ထႅင်ႈၵွၼ်ႇၼႆၼႃႇ။ ၵွပ်ႈၼႆႉ လႄႈ တိုၵ်းသူၼ်းထိုင်ၵူၼ်းမိူင်းႁဝ်း ယႃႇပေၶဝ်ႈႁူမ်ႈ ဢၼ်သိုၵ်းမၢၼ်ႈၶဝ် ဢွၼ်ၸတ်းႁဵတ်း ပွႆးလၢမ်းၸိူဝ်းၼၼ်ႉ”- ဝႃႈၼႆ။
ယၢမ်းလဵဝ် ၼႂ်းမိူင်းတႆးသမ်ႉ တၢင်းပဵၼ်ၶူဝ်ႊဝိတ်ႉ 19 ၵေႃႈ တိုၵ်ႉပုင်ႈၶိုၼ်ႈႁႅင်းယူႇ ၵူႈဝၼ်း ။ႁွင်ႈၵၢၼ်ၾၢႆႇပၢႆးယူႇလီ မိူင်းႁူမ်ႈတုမ် တႂ်ႈသိုၵ်းမၢၼ်ႈ ၵုမ်းၵမ်ၼၼ်ႉ ပိုၼ်ၽၢဝ်ႇဢွၵ်ႇမႃး မိူဝ်ႈဝႃး ဝၼ်းတီႈ 15/3/2022 ဝႃႈၼႂ်းမိူင်းတႆး 31 ၸႄႈဝဵင်း ၵူတ်ႇထတ်းႁၼ် ၵူၼ်းတိတ်း ၸပ်းၸိူဝ်ႉမႅင်း မီး 141 ၵေႃႉ ဝႃႈၼႆ။
ထႅင်ႈလွင်ႈၼိုင်ႈၵေႃႈ ယွၼ်ႉသိုၵ်းၸၢဝ်းၶိူဝ်းၼႂ်းမိူင်းတႆးၼင်ႇၵၼ် ပိုတ်းယိုဝ်ၵၼ် ယဝ်ႉၵေႃႈ သိုၵ်းမၢၼ်ႈ တင်းၸုမ်းၸၢဝ်းၶိူဝ်း ၼႂ်းမိူင်းတႆး ပိုတ်း ယိုဝ်းၵၼ် ၸိူဝ်းၼႆႉသေ ႁဵတ်းႁႂ်ႈၵူၼ်းမိူင်းတႆး ပွတ်းႁွင်ႇ ပွတ်းၸၢၼ်း လႆႈပၢႆႈၽေးသိုၵ်း ၼပ်ႉႁူဝ်ႁဵင်။ ၼွၵ်ႈလိူဝ်ၼၼ်ႉ ၵူၼ်းမိူင်းယၢင်းလႅင်ၵေႃႈ ပၢႆႈႁွတ်ႈထိုင် မိူင်းတႆးပွတ်းၸၢၼ်းထႅင်ႈ ၼပ်ႉႁူဝ်ႁဵင် ၼၼ်ႉၵေႃႈ ယွၼ်ႉသိုၵ်းမၢၼ်ႈတင်း ၸုမ်းၵႅတ်ႇၶႄၵူၼ်းမိူင်း PDF ပိုတ်းယိုဝ်းၵၼ် ႁၢဝ်ႈ ႁႅင်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ