ၵူၼ်းမိူင်းၵိုင် သၢမ်ၵေႃႉပေႃႈမႄႈလုၵ်ႈ ယဵပ်ႇၺႃးမၢၵ်ႇ ၵေႃႉပဵၼ်ပေႃႈလူႉတၢႆ မႄႈလႄႈလုၵ်ႈ မၢတ်ႇၸဵပ်းႁၢဝ်ႈႁႅင်း သူင်ႇယူတ်းယႃတူဝ် တီႈႁူင်းယႃလွႆ လႅမ် ယၢပ်ႇၽိုတ်ႇ ၵႃႈယူတ်းယႃ။
မိူဝ်ႈဝၼ်းတီႈ 12/3/2022 ၼၼ်ႉ ၵူၼ်းမိူင်းၵိုင် သၢမ်ၵေႃႉပေႃႈမႄႈလုၵ်ႈ ယဵပ်ႇၺႃးမၢၵ်ႇ ၼႂ်းၵႄႈပၢင်ႇၵေႇတု – ပၢင်ၼိမ် ၼႂ်းၸႄႈဝဵင်း မိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ။ ၵေႃႉပဵၼ် ပေႃႈလုၵ်ႈဢွၼ်ႇ လႆႈလူႉတၢႆထင်တီႈ ၵေႃႉပဵၼ်မႄႈလုၵ်ႈဢွၼ်ႇလႄႈတင်း လုၵ်ႈ ဢွၼ်ႇဢႃယု 3 ၶူပ်ႇတႄႉ လႆႈတိူဝ်ႉမၢတ်ႇၸဵပ်းႁၢဝ်ႈႁႅင်း။
ၽူႈၶဝ်ႈၸုမ်း ၸွႆႈထႅမ်ပရႁိတ မိူင်းၵိုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၶဝ်သၢမ်ၵေႃႉ ပေႃႈမႄႈလုၵ်ႈ ယဵပ်ႇၺႃးမၢၵ်ႇ ၼႂ်း ၵႄႈပၢင်ႇၵေႇတု – ပၢင်ၼိမ်။ ၵေႃႉပဵၼ်ၽူႈၸၢႆး ပေႃႈလုၵ်ႈဢွၼ်ႇတႄႉ လူႉတၢႆၶႃႈဢေႃႈ။ ၵေႃႉပဵၼ်မေးၼၢင်းတႄႉ လႆႈတိူဝ်ႉမၢတ်ႇၸဵပ်ႈ တီႈပုမ်ႁၢဝ်ႈႁႅင်း၊ ၵေႃႉပဵၼ်လုၵ်ႈယိင်းဢွၼ်ႇ ဢႃယု 3 ၶူပ်ႇတႄႉ လႆႈတိူဝ်ႉမၢတ်ႇၸဵပ်းတီႈၶႃ ယၢမ်း လဵဝ် လႆႈသူင်ႇယူတ်းယႃဝႆႉတီႈ ႁူင်းယႃလွႆလႅမ်ဝႆႉယဝ်ႉ။ ”- ဝႃႈၼႆ။
ၵူၼ်းဝၢၼ်ႈထုင်ႉၼၼ်ႉ ပၢႆလိူဝ်ထူပ်းၽေးသိုၵ်းမႃးတင်းႁိုင် ၊ ဢမ်ႇလႆႈႁဵတ်းၵၢၼ်ႁဵတ်းငၢၼ်း၊ ယၢမ်းလဵဝ်သမ်ႉ ယဵပ်ႇၺႃးမၢၵ်ႇသေ ၵေႃႉပဵၼ်ၽူဝ် လႆႈလူႉတၢႆၵႂႃႇလႄႈ တွၼ်ႈတႃႇသွင်ၵေႃႉမႄႉလုၵ်ႈ တေယူတ်းယႃတူဝ်ၼၼ်ႉ ပဵၼ်ဢၼ်ယၢပ်ႇၽိုတ်ႇလိူဝ်ႁႅင်း ဝႃႈၼႆ။
ၼႂ်းၸႄႈဝဵင်းမိူင်းၵိုင်ၼႆႉ ၵူၼ်းမိူင်းၵႆႉၵႆႉ ယဵပ်ႇၺႃးမၢၵ်ႇ ။ ဢၼ်ၵႂႃႇယဵပ်ႇၺႃးမၢၵ်ႇ သေတၢႆၼႂ်းထိူၼ်ႇ၊ ဢမ်ႇမီးၽႂ်ႁတ်းၵႂႃႇဢဝ်တူဝ်တၢႆမႃးလုမ်းလႃးၵေႃႈမီး ။ ၼွၵ်ႈလိူဝ်ၼၼ်ႉ ဝူဝ်းၵႂၢႆး ၵူၼ်းဝၢၼ်ႈ ၵေႃႈ ယဵပ်ႇၺႃးမၢၵ်ႇသေ တၢႆႁၢႆမီးတင်းၼမ်။ ၶၢဝ်းတၢင်း 3 လိူၼ် ႁူဝ်ပီ 2022 ၼႆႉၵူၺ်းၵူၼ်းမိူင်းတႆးဢၼ်ယဵပ်ႇၺႃးမၢၵ်ႇ လင်ပၢင်တိုၵ်း သေ လူႉတၢႆမီး ႁိမ်း 20 မၢတ်ႇၸဵပ်းမီး 50 ပၢႆယဝ်ႉ။
ၾၢႆႇၸွႆႈထႅမ် ပရႁိတ တႄႉ တုၵ်းယွၼ်းႁႂ်ႈၸုမ်းယိပ်းၵွင်ႈၵၢင်ႇ ၽဵဝ်ႈပၼ်ၶိုၼ်းမၢၵ်ႇမႅင်းၾင်လိၼ်ၸိူဝ်းၼႆႉၶိုၼ်းမူတ်းမူတ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ