ၽူႈလၵ်ႉၵူၼ်းၸူၼ် လိူင်ႇၼမ်ႁၢႆႉႁႅင်း ၼႂ်းၸႄႈဝဵင်းလႃႈသဵဝ်ႈ တင်း ၵၢင်ဝၼ်း လႄႈၵၢင် ၶိုၼ်း ထိုင်ၶၵ်ႉတွၼ်ႈ   ယႃႉသေႃး ႁိူၼ်းၵူၼ်းဝၢၼ်ႈသေ ၶဝ်ႈလၵ်ႉဢဝ်ၶူဝ်းၶွင် ၼႂ်းႁိူၼ်းယေး   ။

ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃး ပီပၢႆၼႆႉ ၵူၼ်းလၵ်ႉၵူၼ်းၸူၼ်လိူင်ႇၼမ်ၼႂ်းၸႄႈဝဵင်းလႃႈသဵဝ်ႈ။ ဢမ်ႇမီးၽႂ်ဢဝ်လိူင်ႈ ဢမ်ႇမီးလွင်ႈႁူမ်ႇလူမ်ႈသေဢိတ်း။ ၽူႈလၵ်ႉဢမ်ႇမီးတၢင်းၵူဝ်ႁႄ ထိုင်တီႈယႃႉၽၵ်းတူ ၶဝ်ႈထိုင်ၼႂ်းႁိူၼ်းယေး လၵ်ႉဢဝ်ၶူဝ်းၶွင်သႂ်ႇရူတ်ႉၵႃးၵႂႃႇၵေႃႈမီး။

ၵူၼ်းလႃႈသဵဝ်ႈ ၽူႈၸၢႆး ဢႃယု 40 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ထူၼ်ႈၼႃႇယဝ်ႉ တီႈလႃႈသဵဝ်ႈၼႆႉ  ၶဝ်ႈလၵ်ႉၵူႈပွၵ်ႉယဝ်ႉ။  ဢၼ်ဢမ်ႇၺႃးလၵ်ႉတႄႉ ဢမ်ႇမီးယဝ်ႉယူဝ်ႉ။ ဢမ်ႇဝႃႈ ၵၢင်ဝၼ်း/ ၶိုၼ်း သင်ဝႃႈ ဢမ်ႇႁၼ်ၽႂ်ယူႇႁိူၼ်းၼႆ ယႃႉသေႃးႁိူၼ်းသေ ၶဝ်ႈလၵ်ႉ ဢဝ်ၶူဝ်းၶွင်ၽႅဝ်ၼႂ်းႁိူၼ်း တၢင်ႇၵႃးသွင်ႈပၢႆႈ ၸိူဝ်းၼႆႉ။ ပူၼ်ႉမႃး လိူၼ်ပၢႆၼႆႉ တီႈၼႃးမၢၵ်ႇၶေႃ ႁိမ်းၵႃးၵဵၵ်ႉၼႆႉ ယၢမ်းၵၢင်ၶိုၼ်း လၵ်ႉၶဝ်ႈၼႂ်းႁိူၼ်း ယေး ယုၵ်ႉဢဝ်ရူတ်ႉ ၶိူင်ႈတၢင်ႇၵႃးၶဝ် ၵႂႃႇ 2 လမ်း။ ယဝ်ႉၵေႃႈ ပၢႆဢဝ်ၵၢၵ်ႇသေႃး ဢၼ်ၶတ်းဝႆႉတၢင်းၼႂ်းႁိူၼ်းၼၼ်ႉ ဢဝ်မႃးၶတ်း တၢင်း ၼွၵ်ႈႁိူၼ်း  ၵႂႃႇလူးၵွၼ်ႇ။ ၸဝ်ႈႁိူၼ်းတႄႉ ႁူႉယူႇ မီးၵူၼ်းလၵ်ႉၶဝ်ႈႁိူၼ်း ဢမ်ႇႁတ်းဢွၵ်ႇမႃးတူၺ်း ၵူဝ်ၵၼ်။ ႁိူၼ်းၼၼ်ႉသမ်ႉ ပဵၼ် ၼၢင်းယိင်းယူႇလႄႈ ဢမ်ႇႁတ်းဢွၵ်ႇမႃးတူၺ်း ”- ဝႃႈၼႆ။

ယၢမ်းလဵဝ် ၽူႈလၵ်ႉၵူၼ်းၸူၼ် ၼႂ်းၸႄႈဝဵင်းလႃႈသဵဝ်ႈၼႆႉ တင်ႈဝႆႉပဵၼ်မူႇ/ ၸုမ်း ၼိုင်ႈၸုမ်းလႂ် ဢဵၼ်ႁႅင်း ဢမ်ႇယွမ်း 9 – 10 ၵေႃႉ။ ပႃးၵႃး သေ ဢႅဝ်ႇလၵ်ႉ။ သင်ဝႃႈ တူၺ်းႁိူၼ်းလႂ် ဢမ်ႇမီးၵူၼ်းယူႇၼႆ ယႃႉၽၵ်းတူ သေႃးႁိူၼ်းသေ ၶဝ်ႈလၵ်ႉ။ သိုၵ်းမၢၼ်ႈ ပလိၵ်ႈမၢၼ်ႈ ဢမ်ႇႁဵတ်းပၼ်လွင်ႈႁူမ်ႇလူမ်ႈၵူၼ်းမိူင်းသင်။ ပေႃးပဵၼ်ၵိဝ်ႇၸွၵ်ႉ ပွၵ်ႉၵႆပိူၼ်ႈၼႆ တႃႇဢွၵ်ႇႁိူၼ်းၵႂႃႇ ၵေႃႉလဵဝ် ယင်းလီၵူဝ် – ၵူၼ်းယူႇပွၵ်ႉပူႇတႃႇ ဝဵင်းလႃႈသဵဝ်ႈ လၢတ်ႈၼင်ႇၼႆ။

ၵူၼ်းၼုမ်ႇ လႃႈသဵဝ်ႈ ဢႃယု 30 ပၢႆ ၵေႃႉၼိုင်ႈ ၽူႈၸၢႆး လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၵႂႃႇၸွမ်းတၢင်းၸိူင်ႉၼႆ ၵေႃႉလဵဝ်ၵေႃႈ ဢမ်ႇၶႂ်ႈ ႁတ်းၵႂႃႇယဝ်ႉ လွင်ႈႁူမ်ႇလူမ်ႈတႄႉ မၼ်းဢမ်ႇမီးသေဢိတ်း။ ယူႇႁိူၼ်းၵေႃႈ ဢမ်ႇမီး လွင်ႈႁူမ်ႇလူမ်ႈၶႃႈ။ ပီႈၼွင်ႉႁဝ်း ၶၢႆတီႈလိၼ်ယဝ်ႉ တႃႇဢဝ်ငိုၼ်းၵႂႃႇသႂ်ႇၼႂ်းယေးငိုၼ်းဝႆႉ ၵေႃႈဢမ်ႇႁတ်းၵႂႃႇ ။ ၵူဝ်ၺႃးၸူၼ်ၸွမ်းတၢင်း။ တေဝႆႉတီႈႁိူၼ်းၵေႃႈ သမ်ႉၵူဝ်ၸူၼ်ၶဝ်ႈ။ တေလႆႈႁဵတ်းႁိုဝ်ယင်းဢမ်ႇႁူႉသေဢိတ်းယဝ်ႉၶႃႈၼႆႉ” – ဝႃႈၼႆ။

 ၼႂ်းဝူင်ႈဝၢင်ႈၼႆႉ ၾႆးၾႃႉသမ်ႉမွတ်ႇဢမ်ႇႁူႉၶိင်ႇႁူႉၶၢဝ်း၊ မွတ်ႇဝၼ်းဝၼ်းၶိုၼ်းၶိုၼ်းလႄႈယိင်ႈၶႅၼ်းႁဵတ်းႁႂ်ႈ ပဵၼ်တိုဝ်ႉတၢင်းလီတႃႇၽူႈလၵ်ႉၵူၼ်းၸူၼ်ၵဝ်းၼႂ်းဝၢၼ်ႈၼႂ်းသူၼ်။ ပၢင်လွင်းၵေႃႈမီးၵူႈပွၵ်ႉ။ ၵူၼ်းၵိၼ်ယႃႈ ၵိၼ်ၾိၼ်ႇၵေႃႈလိူင်ႇ။ ပလိၵ်ႈလႄႈ သိုၵ်းမၢၼ်ႈ ဢမ်ႇဢဝ်ပုၼ်ႈၽွၼ်း ဢမ်ႇႁဵတ်းပၼ်လွင်ႈႁူမ်ႇလူမ်ႈသင်ၵူၼ်းမိူင်းသေဢိတ်း ၵူၼ်းလႃႈသဵဝ်ႈလၢတ်ႈၼင်ႇၼႆ။