ၼၢင်းယိင်းဢွၼ်ႇ ဢႃယု 24 ပီၵူၼ်းၵႃႉၶၢႆရူတ်ႉၵႃးတီႈမူႇၸေႊ ၵေႃႉၼိုင်ႈ ၺႃးၽူႈၸၢႆးၸုမ်းၼိုင်ႈသိုပ်ႇၾူၼ်း ႁွင်ႉဝႃႈတေသိုဝ်ႉရူတ်ႉၵႃးၼႆသေ ၵၼ်ႉၸၼ်လူလၢႆၶႃႈႁႅမ်ယဝ်ႉဢဝ်တူဝ်တၢႆမၼ်းၼၢင်းၵႂႃႇပႅတ်ႈဝႆႉတီႈပႃႇႁဵဝ်ႈၶႄႇ ။

မိူဝ်ႈဝၼ်းတီႈ 12/3/2022  ယၢမ်းႁူဝ်ၶမ်ႈ ၵူၼ်းၸၢႆး 2 ၵေႃႉ သိုပ်ႇၽူၼ်းမႃးၸူးမၼ်းၼၢင်းဝႃႈ ၶႂ်ႈသိုဝ်ႉရူတ်ႉၵႃး ဢၼ်မၼ်းၼၢင်းၶၢႆ  ၊ ႁႂ်ႈဢဝ်မႃးၼႄ ၼႆလႄႈ မၼ်းၼၢင်းလၢတ်ႈၵူၼ်းႁိူၼ်းၶဝ်သေ ဢွၵ်ႇၵႂႃႇၶၢႆၵႃး။ ထိုင်ယၢမ်းၵၢင်ၼႂ် မႃး ပေႃႈမႄႈၵူၼ်းႁိူၼ်းၵႂႃႇႁၼ်တူဝ်တၢႆမၼ်းၼၢင်းၼႂ်းပႃႇႁဵဝ်ႈ။

“ၶဝ်ပဵၼ်ၸၢဝ်းၶႄႇဢေႃႈ ၼၢင်းယိင်းဢွၼ်ႇၼၼ်ႉ ။ ဢႃယုမၼ်းတိုၵ်ႉမီးမွၵ်ႈ 21 ပီၼႆႉၵူၺ်း။ ၶဝ်ယူႇတၢင်း သဵၼ်ႈတၢင်းၶူင်ႇႁိူဝ်းမိၼ်ၼၼ်ႉၶႃႈၼေႈ။ ၵူၼ်းၸၢႆး 2 ၵေႃႉဢၼ်သိုပ်ႇၾူၼ်းႁွင်ႉမၼ်းၼၢင်းၵႂႃႇၼၼ်ႉတႄႉ ဢႃယုတေမီးမွၵ်ႈ 20 ၸိူဝ်းၼႆႉ။ ထိုင်ဝၼ်းတီႈ 13 ယၢမ်းဝၢႆးဝၼ်းမွၵ်ႈ 3 မူင်းၼႆႉ ပိူၼ်ႈၵႂႃႇတီႉလႆႈၶဝ် တီႈႁိူၼ်း လင်ၼိုင်ႈဢၼ်မီးၼႂ်းပွၵ်ႉ 3 ၸွၼ်ႊၸူဝ်ႇ ။ တီႉလႆႈၶဝ် 3-4 ၵေႃႉ။ ပလိၵ်ႈတင်းၵူၼ်းဝၢၼ်ႈၵႂႃႇႁႃ ႁၼ်သေႃးရူတ်ႉ ၼၢင်းယိင်းဢွၼ်ႇၼၼ်ႉ တီႈႁိူၼ်းၶဝ်လႄ တီႉဝႆႉယဝ်ႉၶႃႈ ”- ၵူၼ်းမူႇၸေႊၵေႃႉၼိုင်ႈလၢတ်ႈ။

တူဝ်တၢႆၼၢင်းယိင်းဢွၼ်ႇဢၼ်မီးတီႈ ပႃႇႁဵဝ်ႈၶႄႇၼၼ်ႉ သိူဝ်ႈၶူဝ်းၼႂ်းၵေႃႈဢမ်ႇသႂ်ႇဝႆႉ ။ မီးထဵပ်ႉပိၵ်ႉဢိုတ်းသူပ်းမၼ်းၼၢင်းဝႆႉသေ မေႃယႃၾၢႆႇၵူတ်ႇထတ်းလွင်ႈၽိတ်းမၢႆမီႈလၢတ်ႈဝႃႈ ပဵၼ်ၾၢင်ႁၢင်ႈ ၵၼ်ႉၸၼ်လူလၢႆၶႃႈႁႅမ်တၢႆဝႆႉ ဝႃႈၼႆ။

ၵဵဝ်ႇၵပ်းလွင်ႈၼႆႉ ၽူႈယိင်းၵေႃႉၼိုင်ႈ ဢၼ်တူင်ႉၼိုင်လွင်ႈသုၼ်ႇလႆႈၼၢင်းယိင်း တၢင်းထုင်ႉမၢဝ်း လၢတ်ႈတီႈၽူႈတွႆႇႁွၵ်ႈဝႃႈ – “ ယၢမ်းလဵဝ် တၢင်းမူႇၸေႊ တၢင်းထုင်ႉမၢဝ်းၼႆႉ ပၢင်တေႃႇပၢင်လွင်းလိူင်ႇ၊ ၵူၼ်းၵိၼ်သူႇသမ်းယႃႈမဝ်းၵမ် လိူင်ႇ  ။ လွင်ႈလၵ်ႉလွင်ႈၸူၼ်ၵၼ်မီးၵူႈဝၼ်း။ ၸုမ်းယိပ်းၵွင်ႈၵေႃႈၼမ်။ ဢမ်ႇဝႃႈၼၢင်းယိင်း ဢမ်ႇဝႃႈၵူၼ်းၸၢႆး လႆႈမႆႈၸႂ်လွင်ႈႁူမ်ႇလူမ်ႈတႄႉတႄႉၶႃႈဢေႃႈယၢမ်းၼႆႉ ” ဝႃႈၼႆ။

ၸူဝ်ႈသိုၵ်းယိုတ်းမိူင်းၼႆႉ ယိင်ႈၶႅၼ်းတွၼ်းလိူဝ်ၵဝ်ႇ။ ပေႃးမီးလွင်ႈလၵ်ႉၸၵ်ႉၶူတ်ႈ ဢမ်ႇၼၼ် ၶႃႈႁႅမ်ၵၼ်တၢႆမႃး ဢမ်ႇမီးၽႂ်ၸုမ်းလႂ် သႂ်ႇၸႂ်ဢဝ်လိူင်ႈပၼ်ထိုင်တီႈ။ ဢမ်ႇၸၢင်ႈပိုင်ႈဢိင်ၸႂ်ယႂ်ႇၽႂ် ။ ၵမ်ႈၽွင်ႈၶိုင်ႁႃၶႂ်ႈၶၢႆႉၵႂႃႇယူႇတၢင်ႇဝၢၼ်ႈတၢင်ႇမိူင်းၵေႃႈမီးယူႇယဝ်ႉ ၵူၼ်းမူႇၸေႊ ၼၼ်ႉလၢတ်ႈထႅင်ႈၼင်ႇၼႆ။

“ပေႃးမီးလွင်ႈမီးတၢင်းမႃး ပလိၵ်ႈ ၵုမ်ႇဝႃႈ တိုၵ်ႉၸွမ်းၶႆႈယူႇ၊ တိုၵ်ႉၸွပ်ႇထၢမ်ယူႇၼႆတိၵ်းတိၵ်း။ ဢမ်ႇတွၼ်ႉၸတ်းၵၢၼ် ဢဝ်လိူင်ႈပၼ်တူတ်ႈတၢမ်ႇၵူၼ်းၽိတ်းၼၼ်ႉထိုင်တီႈသေပွၵ်ႈ။ ၵွပ်ႈၼႆႁဝ်းၶႃႈၵေႃႈ ပႆႇဝႃႈတၢင်းၼွၵ်ႈလႃႈ ယူႇၼႂ်းႁိူၼ်းႁင်းၵူၺ်းလီလီၵေႃႈ ယင်းဢမ်ႇမီးလွင်ႈႁူမ်ႇလူမ်ႈဢေႃႈ။ ဢမ်ႇၸၢင်ႈၵႂႃႇမႃးႁႃၵိၼ်လဵင်ႉတွင်ႉလႆႈလွတ်ႈလွတ်ႈလႅဝ်းလႅဝ်း။ဢမ်ႇလီယူႇသေဢိတ်းယဝ်ႉတီႈၼႆႉ။ ၵမ်ႈၽွင်ႈပိူၼ်ႈပေႃးၶိုင်ႁႃတၢင်းပၢႆႈယူႇယဝ်ႉဢေႃႈ။”- ဝႃႈၼႆ။

တီႈဝဵင်းမူႇၸေႊၼႆႉ မီးတပ်ႉသိုၵ်းမၢၼ်ႈယိုတ်းမိူင်း ပၵ်းသဝ်းဝႆႉ 3 တပ်ႉၵွင်၊ လိူဝ်ၼၼ်ႉယင်းမီး တပ်ႉမ 88 ၊ 99 လႄႈ 11 ဢၼ်လုၵ်ႉတၢင်းမိူင်းမၢၼ်ႈ /တူင်ႈပဵင်းမႃးတူင်ႉၼိုင်။ ဢၼ်ၼမ်လိူဝ်ပိူၼ်ႈသုတ်းတႄႉပဵၼ်ၸုမ်းသိုၵ်းၵူၼ်းမိူင်း ပျီႇတူႉၸိတ်ႉ။ တီႈမူႇၸေႊၼႆႉမီႊပဵၼ် 20 ၸုမ်းပၢႆ။ လိူဝ်ၼၼ်ႉ ၸုမ်းသိုၵ်းၸၢဝ်းၶိူဝ်းၵေႃႈ ၵႂႃႇမႃးတူင်ႉၼိုင် ယွၼ်းၶွၼ်ႇၵူႈပီ။