Sunday, July 21, 2024

ၶၼ်ၼမ်ႉမၼ်းရူတ်ႉ/ ၸၢၵ်ႈ ပုင်ႈၶိုၼ်ႈသုင် 1 လိတ်ႉ  2,000 ပျႃးပၢႆ

Must read

ယၢမ်းလဵဝ် ၼႂ်းမိူင်းတႆး မိူင်းႁူမ်ႈတုမ် ၶၼ်ၼမ်ႉမၼ်းရူတ်ႉ/ ၸၢၵ်ႈ ပုင်ႈၶိုၼ်ႈႁႅင်း 1 လီႊတိူဝ်ႊ (1 လိတ်ႉ)  2,000 ပၢႆ ႁဵတ်းႁႂ်ႈၵူၼ်းမိူင်း ၸဝ်ႈလႅင်းၵႃး ၸဝ်ႈသူၼ် ၸိူဝ်းၼႆႉ ထူပ်းတၢင်းယၢပ်ႇၽိုတ်ႇႁႅင်း။

ၶၼ်ၼမ်ႉမၼ်းၶိုၼ်ႈ ထိုင် လိတ်ႉ 2000 ပျႃး ၵူၼ်းမိူင်းတႆးယၢပ်ႇၽိုတ်ႇ

တႄႇဢဝ် ဝၼ်းတီႈ 1/3/2022 ယၢမ်းႁူဝ်ၶမ်ႈ မႃး ၶၼ်ၼမ်ႉမၼ်းရူတ်ႉ/ ၶိူင်ႈၸၢၵ်ႈ ပုင်ႈၶိုၼ်ႈႁႅင်း  ပတ်းပိုၼ်ႉမိူင်းႁူမ်ႈတုမ် ၶိုၼ်ႈထိုင် 1 လီႊတိူဝ်ႊ 2,000 ပျႃးပၢႆ ၵူၼ်းမိူင်းတႆး ၵိၼ်းၸႂ်ၵူႈၸၼ်ႉထၢၼ်ႈ ။

- Subscription -

ၸဝ်ႈၶွင်ပမ်ႉၼမ်ႉမၼ်း ၸိုင်ႈတႆးပွတ်းႁွင်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တီႈၼႆႈတႄႉ ၼမ်ႉမၼ်းလႆႈၶၢႆ 1 လီႊတိူဝ်ႊ  2,000  မူတ်းယဝ်ႉ။ ၶၼ်ၼမ်ႉမၼ်းၵိုင်ႉၵၢင်ႉၶိုၼ်ႈမႃးႁႅင်းၼႆႉ မိူဝ်ႈသိုၼ်း ၵၢင်ၶမ်ႈၶႃႈဢေႃႈ။ ယွၼ်ႉဝႃႈ  ၶၼ်ၼမ်ႉမၼ်းလိပ်းလုမ်ႈၾႃႉ 1 ပေႊပႃႊ(1 ပိပ်ႉယႂ်ႇ)  လုၵ်ႉတီႈ 115 သေယၢမ်းလဵဝ် ၶိုၼ်ႈထႅင်ႈ 10 တေႃႊလႃႊပၢႆ၊ မီးႁိမ်းၸမ် 130 တေႃႊလႃႊယဝ်ႉ။ ပိူၼ်ႈလၢမ်းၶၢတ်ႈဝႆႉဝႃႈ တေၶိုၼ်ႈထႅင်ႈတိၵ်းတိၵ်း  ၼႆဢေႃႈ  ”- ဝႃႈၼႆ။

  ၵူၼ်းမိူင်းတႆး ၵမ်ႈၼမ် ၸဵမ်ပိုင်း ပေႃးဢမ်ႇမီးတၢင်းလူဝ်ႇယႂ်ႇလူင် ဢမ်ႇသူႈၸႂ်ႉရူတ်ႉၸႂ်ႉၵႃး။ ပေႃးၶၼ်ၼမ်ႉမၼ်း ၶိုၼ်ႈသုင်ၸိူင်ႉၼႆထႅင်ႈတိၵ်တိၵ်းၸိုင် ၸဝ်ႈသူၼ် ၸဝ်ႈၵႃးတၢင်ႇၵူၼ်း ၸိူဝ်းၼႆႉ တေၸၢင်ႈၵိုတ်းယင်ႉဝႆႉ ၸူဝ်ႈၶၢဝ်း ၵေႃႈပဵၼ်လႆႈ ဝႃႈၼႆ။    

ၵူၼ်း ၵူတ်ႉၶၢႆ ၸိုင်ႈတႆးပွတ်းႁွင်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၵူႈပွၵ်ႈၼႆႉ ပေႃးသႂ်ႇ 1,000 ၼႆႉ လုၵ်ႉတီႈၼႂ်းဝဵင်းသေ ၵႂႃႇမႃးတီႈလွႆ သၢမ်သိပ်းၵေႃႈ လႆႈဢေႃႈ။ မိူဝ်ႈလဵဝ်ၼႆႉ ၵႂႃႇၵူၺ်းဢမ်ႇပေႃးၶႂ်ႈၽႅဝ်ယဝ်ႉၶႃႈ။ ၸိူဝ်းပဵၼ်ၸဝ်ႈၵႃးလႅင်း ၸိူဝ်းၼႆႉ ၵမ်ႈၼမ် လႆႈႁၼ် ၵိုတ်းယင်ႉၵၼ် ၶႃႈဢေႃႈ ယွၼ်ႉၼမ်ႉမၼ်းၶိုၼ်ႈလႄႈ ၵႃႈၵႃးၵေႃႈၶိုၼ်ႈ ဢမ်ႇမီးၵူၼ်းၶီႇၵႃးၼမ်၊ ပေႃးလႅၼ်ႈယူႇတိၵ်းတိၵ်းၵေႃႈ သုမ်းတိၵ်းတိၵ်း ၸိူင်ႉၼႆဢေႃႈ”- ဝႃႈၼႆ။

တီႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇ မၢင်ႁၢၼ်ႉ ၶိုၼ်ႈထိုင် 2500 ပျႃး ဝႃႈၼႆ။

ဝၢႆးသိုၵ်းမၢၼ်ႈ ယိုတ်းမိူင်းမႃး တၢင်းပဵၼ်ၶူဝ်ႊဝိတ်ႉ 19 ၵေႃႈ ၽႄႈလၢမ်းႁႅင်း ၼႂ်းမိူင်းတႆး မိူင်းႁူမ်ႈတုမ်ၼႆႉ ၶၼ်ၼမ်ႉမၼ်းရူတ်ႉ/ ၶိူင်ႈၸၢၵ်ႈ 1 လီႊတိူဝ်ႊ လုၵ်ႉတီႈ 800 ပျႃး ၶိုၼ်ႈထိုင် 2000 ပၢႆ ။  ၶၼ်ၶူဝ်းၵုၼ်ႇ ၶွင်ၵိၼ်ယႅမ်ႉ ၸိူဝ်းၼႆႉၵေႃႈ ၶိုၼ်ႈသုင် ၵူႈဝၼ်း။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း