ၽူႈၸၢႆး ဢႃယု 27 ပီ ၵူၼ်းၼုမ်ႇၽူႈတူင်ႉၼိုင်ၼႂ်းတူင်ႇဝူင်းၵူၼ်း ၼႂ်းဢိူင်ႇၼွင်ဝူဝ်း ၸႄႈဝဵင်းလွၵ်ႉၸွၵ်ႇ ယဵပ်ႇၺႃးမၢၵ်ႇမႅင်း လူႉတၢႆထင်တီႈ။
မိူဝ်ႈဝႃး ဝၼ်းတီႈ 2/3/2022 ယၢမ်းဝၢႆးဝၼ်း မွၵ်ႈ 3 မူင်း ၸၢႆးၶမ်း ဢႃယု 27 ပီ ၵူၼ်းဝၢၼ်ႈပႃႇၶႃး ဢိူင်ႇၼွင်ဝူဝ်း ၸႄႈဝဵင်းလွၵ်ႉၸွၵ်ႇ ၸိုင်ႈတႆး ပွတ်းၸၢၼ်း ၵႂႃႇႁႃပႃသေ ယဵပ်ႇၺႃးမၢၵ်ႇ လႆႈလူႉတၢႆထင်တီႈ။
ၼၢင်းယိင်းၵေႃႉၼိုင်ႈ ဢၼ်ပဵၼ်ပီႈၼွင်ႉၵၼ်တင်းၸၢႆးၶမ်းၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၵႂႃႇမိူဝ်ႈဝႃးၶႃႈ။ မၼ်း ၵႂႃႇႁႃပႃသေ ယဵပ်ႇၺႃးမၢၵ်ႇ တၢႆထင် တီႈယဝ်ႉၶႃႈ ။ ၵူၼ်းဢၼ်ၵႂႃႇၸွမ်းတင်းလင် မၼ်းၵေႃႈမီးယူႇ။ မၼ်းၵႂႃႇယဵပ်ႇၺႃးလႄႈ တႅၵ်ႇသႂ်ႇမၼ်းၶႃႈဢေႃႈ”- ဝႃႈၼႆ။
ၸၢႆးၶမ်းၼႆႉ ပဵၼ်ႁူဝ်မၢဝ်ႇ၊ ပဵၼ်ၵူၼ်းၼုမ်ႇတူင်ႉၼိုင်ၼႂ်းတူင်ႇဝူင်းၵူၼ်း၊ လိူဝ်ၼၼ်ႉ ပဵၼ်ၶူးသွၼ်တွၼ်ႈၾၢႆႇယဵၼ်ႇငႄႈ ၊လွင်ႈၵႃႈလွင်ႈဝႅၼ် လၢႆးတႆး ၵေႃႉ ၼိုင်ႈ။
တီႈတၢင်း ဝၢၼ်ႈပႃႇၶႃးၼႆႉ လွင်ႈယဵပ်ႇၺႃးမၢၵ်ႇသေ လူႉတၢႆၼႆႉ မိူဝ်ႈၵူႈပွၵ်ႈ ဢမ်ႇယၢမ်ႈမီးမႃး ပွၵ်ႈၼႆႉပဵၼ်ပွၵ်ႈၵမ်းႁႅၵ်ႈ။ ယွၼ်ႉၸုမ်းယိပ်းၵွင်ႈ ၵၢင်ႇၸၢဝ်းၶိူဝ်းၼင်ႇၵၼ် ပိုတ်ႇယိုဝ်းၵၼ်မႃးလႄႈ လွင်ႈႁၢင်ႈၵၢင်မၢၵ်ႇၼႆႉ ၸင်ႇမီးမႃးၸိူင်ႉၼႆ။
“မိူဝ်ႈၵူႈပွၵ်ႈ ဢမ်ႇမီးၶႃႈ လွင်ႈၵူၼ်းဝၢၼ်ႈယဵပ်ႇၺႃးမၢၵ်ႇသေ လူႉတၢႆ ၸိူင်ႉၼႆ ၼႆႉပဵၼ်ပွၵ်ႈၵမ်းဢွၼ်တၢင်းၶႃႈ။ လွင်ႈႁၢင်ႈၵၢင်မၢၵ်ႇၵေႃႈ ဢမ်ႇမီး ၶႃႈ။ ဝၢႆးသေ ပၢင်တိုၵ်းၼႆႉယဝ်ႉ ၸင်ႇမီးမႃးလွင်ႈႁၢင်ႈၵၢင်ႇမၢၵ်ႇ ၸိူင်ႉၼႆၶႃႈဢေႃႈ”- ပီႈၼွင်ႉၸၢႆးၶမ်း သိုပ်ႇလၢတ်ႈၼႄၼင်ႇၼႆ။
ယွၼ်ႉသိုၵ်း RCSS တင်း ၸုမ်းဢူၺ်းလီ ပွတ်းႁွင်ႇ ပိုတ်းယိုဝ်းတိုၵ်းတေႃးၵၼ် လုၵ်ႉတၢင်းႁွင်ႇ ထိုင်မႃးတၢင်းၸၢၼ်း၊ ၶၢဝ်းတၢင်းႁိမ်းၸမ်ပီၼႆႉ ၸႂ်ႉလွင်ႈႁၢင်ႈၵၢင်မၢၵ်ႇတေႃႇၵၼ် ၊ ပၢင်တိုၵ်းယဵၼ်သေ သိုၵ်းထွၼ်ဢွၵ်ႇပိုၼ်ႉတီႈၵႂႃႇ သေတႃႉ သမ်ႉဢမ်ႇၽဵဝ်ႈပၼ်မၢၵ်ႇမႅင်းၸိူဝ်းႁၢင်ႈၵၢင်ဝႆႉၸိူဝ်းၼၼ်ႉၶိုၼ်းလႄႈ ပၼ်တၢင်းတုၵ်ႉၶ ၵူၼ်းမိူင်းပိုၼ်ႉတီႈ ၊ ၶၢဝ်းၵူၼ်းမိူင်းၵႂႃႇႁႆႈ ၵႂႃႇသူၼ် ၵႂႃႇႁႃၵိၼ်လဵင်ႉတွင်ႉၸွမ်းႁူၺ်ႈၸွမ်းလွႆ ၸွမ်းၼမ်ႉၸွမ်းၼွင်ၼၼ်ႉ ၵႂႃႇ ယဵပ်ႇၺႃး မၢၵ်ႇတႅၵ်ႇ မၢတ်ႇၸဵပ်း လူႉတၢႆ ။ ဢမ်ႇမီးၽႂ်ႁပ်ႉပုၼ်ႈၽွၼ်းတူၺ်းလူပၼ်ၶိုၼ်း။
ၼႂ်းၶၢဝ်းတၢင်း 20 ဝၼ်းၼႆႉၵူၺ်း ၼႂ်းၸႄႈဝဵင်းလွၵ်ႉၸွၵ်ႇၼႆႉ ၵူၼ်းမိူင်းဢၼ်ယဵပ်ႇၺႃးမၢၵ်ႇမႅင်းၾင်လိၼ် သေမၢတ်ႇၸဵပ်း လႄႈလူႉတၢႆ ၼႆႉ မီး 3 ၵမ်း (4 ၵေႃႉ) ယဝ်ႉ ။ ၸုမ်းပရႁိတ ပိုၼ်ႉတီႈ တုၵ်းယွၼ်းႁႂ်ႈၸုမ်းဢၼ်ၵဵဝ်ႇၶွင်ႈမႃးၽဵဝ်ႈပၼ်ၶိုၼ်းမၢၵ်ႇမႅင်းၸိူဝ်းၼၼ်ႉသေၵမ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ