ၸဝ်ႈသိလ်ထမ်း ၶူးဝႃး ဝုၼ်းၸုမ်ႉ တႅမ်ႈလိၵ်ႈ မဵတ်ႉတႃႇထိုင်ဝႃႈ ဢမ်ႇလီၽိတ်းမေႃးတေႃႇၵၼ် ႁႂ်ႈမီးၸႂ်ႁၵ်ႉႁႅင်းပႅင်းယႂ်ႇၼိူဝ်ၵၼ် ၸွႆႈထႅမ် ႁၼ်လီၼိူဝ် ၵၼ် သေၵမ်း ဝႃႈၼႆ။
ဝၼ်းတီႈ 1/3/2022 ၸဝ်ႈသိလ်ထမ်း ၶူးဝႃး ဝုၼ်းၸုမ်ႉ ၺႃၼသံဝရ ထမ်ႈလူင် မိူင်းၵႅတ်ႇ ဢိူင်ႇမိူင်းၵႅတ်ႇ ၸႄႈဝဵင်းမိူင်း တူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း တႅမ်ႈလိၵ်ႈ မဵတ်ႉတႃႇထိုင် လုၵ်ႈသိတ်ႇတပႄး တၵ်ႉၵႃႇတင်းလၢႆ ၵူႈဝၢၼ်ႈ/ မိူင်းၵူႈ ၵေႃႉၶိင်းၵူၼ်း ႁႂ်ႈလႆႈပွင်ႇၸႂ်ၵၼ် ဢမ်ႇလီၽိတ်းမေႃးတေႃႇၵၼ် လီမီးထၢတ်ႈၼမ်ႉၸႂ်လီတေႃႇၵၼ် မီးၸႂ်ဢီးလူၼိူဝ်ၵၼ် မီးၸႂ်ႁၵ်ႉႁႅင်းပႅင်းယႂ်ႇ ၼိူဝ်ၵၼ် မီးၸႂ်လီမဵတ်ႉတႃႇ ၵရုၼႃႇ မုတိတႃႇ ဢုပဵၵ်ႉၶႃႇ ၼိူဝ်ၵၼ်။
ၸဝ်ႈၶူးလူင် ၺႃႇၼသီႇရိ (ၸဝ်ႈမၢၼ်ႇတႃဢွၼ်ႇ) ႁူဝ်ပဝ်ႈၵိင်ႇၽႄငဝ်ႈငုၼ်း မုၵ်ႉၸုမ်းလူင် သင်ႇၶႃႇ ၸိုင်ႈတႆးပွတ်းဢွၵ်ႇၶူင်း လၢတ်ႈတီႈၽူႈ တွႆႇႁွၵ်ႈဝႃႈ – “ၶူးဝႃးပေႃႈ တႅမ်ႈလိၵ်ႈမဵတ်ႉတႃႉဢွၵ်ႇမႃး မိူဝ်ႈဝႃးတႄႉ ယူႇလီသုင်းဝၢၼ်ႈယူႇ ၵျၢင်ႉၵမ်ၽႃႇဝၼႃႇၵမ်ႇမထၢၼ်းတြႃးယူႇ ယဝ်ႉၵေႃႈ ယွၼ်းသင်ႇမႃးထႅင်ႈဝႃႈ ႁႂ်ႈမေႃယူႇၸွမ်းတြႃး ယႃႇပေၽိတ်းမေႃးၵၼ် ဝႆႉၸႂ်မဵတ်ႉတႃႇၼိူဝ်ၵၼ် တေၵတ်းယဵၼ် ပေႃးဢမ်ႇၸႂ်ႈၸိူင်ႉၼၼ် တေ လႆႈလွင်ႈသုၵ်ႉသၵ်ႉ တေလႆႈလွင်ႈတုၵ်ႉၶ တင်းၼမ်ၵူၺ်းယဝ်ႉ”- ဝႃႈၼႆ။
ၼႂ်းၶေႃႈမဵတ်ႉတႃႇထိုင် ၸဝ်ႈသိလ်ထမ်းၶူးဝႃး ဝုၼ်းၸုမ်ႉ ဢွၵ်ႇမႃး မိူဝ်ႈဝႃးၼႆႉဝႃႈ ဢမ်ႇလီၽိတ်းမေႃး တေႃႇၵၼ် လီမီးထၢတ်ႈၼမ်ႉၸႂ်လီတေႃႇ ၵၼ်၊ မီးၸႂ်ဢေးလူၼိူဝ်ၵၼ်၊ မီးၸႂ်ႁၵ်ႉႁႅင်းပႅင်းယႂ်ႇၼိူဝ်ၵၼ်၊ မီးၸႂ်လီမဵတ်ႉတႃႇၵရုၼႃႇမုတိတႃႇ ဢုပဵၵ်ႉၶႃႇၼိူဝ်ၵၼ်၊ မီးၵႃႇယၵၢမ်ႇမဵတ်ႇတႃႇ ဝ ၸီႇၵၢမ်ႇမဵတ်ႉတႃႇ၊ မၼေႃးၵၢမ်ႇမဵတ်ႉတႃႇ ယႂ်ႇၼမ် ၼိူဝ်ၵၼ်၊ ၸွႆႈၵၼ်၊ မီးၼမ်ႉၸႂ်တေႃႇၵၼ်၊ ၵမ်ႉၸွႆႈထႅမ်ပၼ်ၵၼ်၊ ႁၼ်လီၼိူဝ်ၵၼ်၊ မီးၸႂ် ပူတ်းဝၢင်းၶႂၢင်းပၼ်ၵၼ်၊ ယႃႇဝႆႉၸႂ်ဢမ်ႇလီတေႃႇၵၼ်၊ ႁႂ်ႈမီးတၢင်းဢူတ်းယိူၼ်ႉၵၼ်ႈၶၼ်ႇထီႇၽႂ်မၼ်း မီးၸႂ်ႁၵ်ႉဢေးလူၵၼ် တင်းသဵင်ႈ ဢၼ် ဝႃႈၼႂ်းလေႃးၵ ၵၢမ်ႇၽႃႇ ဝၢၼ်ႈမိူင်းတိူင်းၵႃး တီႈယူႇသဝ်းၼမ်ႉလိၼ်ႁိၼ်ၽႃပႃႇမႆႉႁူၺ်ႈလွႆမိူင်းတင်းသဵင်ႈ ၸၢင်ႈလႆႈၵတ်းယဵၼ် သျၢမ်းသႃႇယဵၼ် ၸႂ် လူမ်ၸႂ်ၽႂ်မၼ်းယဝ်ႉ။
“ၽွင်းဢၼ် ၶူးဝႃးပေႃႈႁဝ်း တေဢွၵ်ႇထမ်ႈမႃး 3 ပီ 3 လိူၼ် 3 ဝၼ်းတဵမ်ၼၼ်ႉ သင်ဝႃႈမီး လွင်ႈၵတ်းယဵၼ် တင်းမူတ်း တင်းသဵင်ႈၼႆ ယိင်ႈၶႅၼ်းတေလီ ႁႃတီႈဝႃႈဢမ်ႇမီးယဝ်ႉ”- ၸဝ်ႈၶူးလူင် ၺႃႇၼသီႇရိ (ၸဝ်ႈမၢၼ်ႇတႃဢွၼ်ႇ) သိုပ်ႇ လၢတ်ႈၼႄၼင်ႇၼႆ။
ၸဝ်ႈသိလ်ထမ်းၶူးဝႃး ဝုၼ်းၸုမ်ႉ ၶဝ်ႈတိုဝ်းၵမ်သိလ် တီႈထမ်ႈလူင် မိူင်းၵႅတ်ႇ ဢတိတ်ႉထၢၼ်ႇဝႆႉ တႃႇၶၢဝ်းတၢင်း 3 ပီ 3 လိူၼ်ပၢႆ 3 ဝၼ်း ၸဝ်ႈ တႄႇၶဝ်ႈထမ်ႈ မိူဝ်ႈဝၼ်းတီႈ 28/4/2019 သေ ပေႃးထိုင်မႃး ဝၼ်းတီႈ 1/8/2022 ၼႆႉ တေၶွပ်ႈတဵမ် 3 ပီ 3 လိူၼ် 3 ဝၼ်းယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ