သိုၵ်းမၢၼ်ႈ လႃႈသဵဝ်ႈ လၢမ်းလိမ်းယိုဝ်းၵွင်ႈလူင် ၵႂႃႇၵူႈၾၢႆႇ/ ၵူႈတၢင်းသေ ႁဵတ်းႁႂ်ႈၵူၼ်းမိူင်း တူၵ်းၸႂ် တိုၼ်ႇသၢၼ်ႈ ၵူၼ်းမိူင်းဝႃႈဢမ်ႇထုၵ်ႇလီႁဵတ်းၽွင်းငဝ်းလၢႆးၵၢၼ်မိူင်း ၸိူင်ႉၼႆ။
မိူဝ်ႈဝၼ်းတီႈ 23/2/2022 ယၢမ်းၵၢင်ၶိုၼ်း မွၵ်ႈ 10 မူင်းၼၼ်ႉ တပ်ႉသိုၵ်းမၢၼ်ႈ ၶလယ 68 ဢၼ်ပၵ်းဝႆႉတီႈ တၢင်း ဢွၵ်ႇၵႂႃႇမိူင်းယေႃ ႁိမ်း ဝၢၼ်ႈတႃႈပုင်ႇ – ဝၢၼ်ႈၵွင်း ၸဵင်ႇႁွင်ႇဝၼ်းဢွၵ်ႇ ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ လၢမ်း လိမ်းယိုဝ်းၵွင်ႈလူင် 3-4 ၵမ်း၊ တင်ႈၸႂ် ႁဵတ်းႁႂ်ႈၵူၼ်းမိူင်း တူၵ်းၸႂ်တိုၼ်ႇသၢၼ်ႈ ။
ၵူၼ်း လႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်သိုၵ်းမၢၼ်ႈ ယိုဝ်းၵမ်းလဵဝ်ၶႃႈယဝ်ႉ ပဵၼ်တပ်ႉ 68 ၶႃႈဢေႃႈ။ ၶဝ်တင်ႈၸႂ် ယိုဝ်းၵွင်ႈ လူင်ၼႆႉ ဢမ်ႇယွမ်း 3 လုၵ်ႈၶႃႈ။ သဵင်ၵွင်ႈႁႅင်းဝႃႈႁႅင်း ယူႇၼႂ်းဝဵင်းၼႆႉယင်းလႆႈငိၼ်းသဵင်ဢေႃႈ။ မၢၵ်ႇလူင် ဢၼ်ၶဝ်ယိုဝ်းၵႂႃႇၼၼ်ႉ သင်ၵႂႃႇတူၵ်းသႂ်ႇ ၼႂ်း ဝၢၼ်ႈၵူၼ်းလူး တေႁဵတ်းႁိုဝ်ၼၼ်ႉ။ တပ်ႉ 68 ၼႆႉ ၶဝ်ၵႆႉလၢမ်းလိမ်း ယိုဝ်းၼႃႇၶႃႈၵွင်ႈလူင် ၸိူင်ႉၼႆ ။ ႁဵတ်းႁႂ်ႈၵူၼ်းမိူင်းၵူဝ် တူၵ်းၸႂ် ၵၼ်ၶႃႈ ဢေႃႈ”- ဝႃႈၼႆ။
ငဝ်းလၢႆးၵၢၼ်မိူင်းယုင်ႈ ငဝ်းလၢႆးၵၢၼ်သိုၵ်း သုၵ်ႉတူဝ်ႈမိူင်းတႆး မိူၼ်ၼင်ႇယၢမ်းလဵဝ် ဢၼ်သိုၵ်းမၢၼ်ႈယိုဝ်းၵွင်ႈလူင်ၸိူင်ႉၼႆ ၵူၼ်းဝၢၼ်ႈၵူၼ်းမိူင်းၵူၼ်းထဝ်ႈၸိူဝ်းမီးတၢင်းပဵၼ် ၸၢင်ႈတူၵ်းၸႂ်သေ ၸၢင်ႈပဵၼ်သေလွင်ႈလွင်ႈလႄႈ သိုၵ်းမၢၼ်ႈဢမ်ႇထုၵ်ႇလီႁဵတ်းၸိူင်ႉၼႆ ၵူၼ်းလႃႈသဵဝ်ႈလၢတ်ႈၼင်ႇၼႆ။
“ႁဝ်းၶႃႈတႄႉ တိုၼ်းဝႃႈ ဢမ်ႇႁၼ်လီၸွမ်းၶႃႈ လွင်ႈၶဝ်ၵႆႉယိုဝ်းၵွင်ႈၸိူင်ႉၼႆ ၵူၼ်းမိူင်းႁဝ်းၶႃႈၼႆႉ ဢမ်ႇၶႂ်ႈႁႂ်းမၼ်းပဵၼ်ၶႃႈ။ မဵဝ်းႁဝ်းၶႃႈ ၵူၼ်းမိူင်း လူဝ်ႇႁႃၵိၼ်လဵင်ႉတွင်ႉၵၼ် ၶႂ်ႈယူႇၵႂႃႇၵတ်းၵတ်းယဵၼ်ယဵၼ် သိူဝ်းသႃႇၵူၺ်းၶႃႈ။ ၶဝ်သမ်ႉ ယူႇယူႇၵႆႉဢဝ်မၢၵ်ႇလူင် ပွႆႇၵႂႃႇ ယိုဝ်းၵႂႃႇ ၽွင်းၵၢင်ၶမ်ႈ/ ၶိုၼ်း ၽွင်းပိူၼ်ႈၼွၼ်းလပ်းယဵၼ် ၸိူင်ႉၼႆၼႆႉ ႁဵတ်းႁႂ်ႈတူၵ်းၸႂ်တိုၼ်ႇသၢၼ်ႇၵၼ် သင်ဝႃႈ ၵူၼ်းၼိူဝ်ႉလိူတ်ႈမႂ်ႇ ၵူၼ်းထဝ်ႈ ၸဝ်ႈယေႃးၵႃႇတၢင်း ပဵၼ် ၸိူဝ်းၼႆႉ တူၵ်းၸႂ် လူႉတၢႆၵႂႃႇလူး တေႁဵတ်းႁိုဝ်”- ၵူၼ်းပိုၼ်ႉတီႈ လႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။
တၢင်းထုင်ႉၾၢႆႇဢွၵ်ႇလႃႈသဵဝ်ႈ သိုၵ်းမၢၼ်ႈလႄႈ ၸုမ်းဢူၺ်းလီပွတ်းႁွင်ႇ ပိုတ်းယိုဝ်းၵၼ်ႁၢဝ်ႈႁႅင်း။ယၢမ်းလဵဝ်ၵေႃႈ ယင်းတိုၵ်ႉၶဵင်ႈၶႅင်ၵၢၼ်သိုၵ်းယူႇ။ သိုၵ်းမၢၼ်ႈထၢင်ႇဝႃႈၸုမ်းဢူၺ်းလီတေမႃးတူင်ႉၼိုင်ၸမ်တပ်ႉၶဝ်လႄႈ လၢမ်းယိုဝ်းလွၵ်ႇၵေႃႈပဵၼ်လႆႈ ၵူၼ်းမိူင်းၵမ်ႈၽွင်ႈလၢမ်းၶၢတ်ႈၼင်ႇၼႆ။
“ၶဝ်ထၢင်ႇမီးၸုမ်းဢူၺ်းလီ၊ ၸုမ်း PDF ၸိူဝ်းၼၼ်ႉ တူင်ႉၼိုင်ၵႂႃႇမႃးယူဝ်ႉ တၢင်းဢၼ်ၶဝ်ယိုဝ်းၵႂႃႇၼၼ်ႉ မၼ်းဢမ်ႇမီးၶႃႈ ၸုမ်းၸိူဝ်းၼၼ်ႉ ၶဝ် တင်ႈၸႂ်ယိုဝ်း လွၵ်ႇငိူတ်ႈၵူၼ်းမိူင်းၵူဝ်ၵေႃႈ ၸၢင်ႈပဵၼ်လႆႈ။ ဢၼ်ၶဝ်ယိုဝ်းၵႂႃႇၼၼ်ႉ ယိုဝ်းၵႂႃႇၸွမ်းၼႂ်းထိူၼ်ႈၸိူဝ်းၼၼ်ႉ”- ဝႃႈၼႆ။
မိူဝ်ႈဝၼ်းတီႈ 17/2/2022 ပူၼ်ႉမႃးၼႆႉ ၵူၼ်းပၢႆႈၽေးသိုၵ်း ဝၢၼ်ႈပၢင်ၼၢင်း ၽွင်းဢွၼ်ၵၼ် ပွၵ်ႈၶိုၼ်း ႁိူၼ်းယေးၵၼ်ၼၼ်ႉ ၽႃႇၺႃးမၢတ်ႇ ၸွမ်းတၢင်း ၼႂ်းၵႄႈဝၢၼ်ႈလူင်တၢၵ်ႈ – ပၢင်ၼၢင်းသေ လႆႈလူႉတၢႆ 4 ၵေႃႉ မၢတ်ႇၸဵပ်း 4 ၵေႃႉ။
