ႁႅင်းၵၢၼ်တႆး ဢၼ်ၵႂႃႇႁဵတ်းၵၢၼ် ၼႂ်းဝဵင်းမိူင်းမၢဝ်း ၸႄႈမိူင်းယုၼ်ၼၢၼ် မိူင်းၶႄႇၼၼ်ႉ တၢႆၽၢၵ်ႇသေ လႆႈၶဝ်ႈယူတ်းယႃတူဝ် တီႈႁူင်းယႃလူင်မိူင်းမၢဝ်း၊ ယၢမ်းလဵဝ်ဢမ်ႇမီးၵႃႈယႃႈယႃလႄႈ ယိုၼ်းမိုဝ်း ယွၼ်းထိုင် ၽူႈမီးၼမ်ႉၸႂ် တႃႇလႆႈႁပ်ႉတၢင်းၸွႆႈထႅမ်။

ၸၢႆးၵျေႃႇတဵင်း ဢႃယု 48 ပီ ပဵၼ်ၵူၼ်းဝၢၼ်ႈၺွင်ႇလႅင် ၸႄႈဝဵင်းမိူင်းမိတ်ႈ မိူင်းတႆးပွတ်းႁွင်ႇ ၵႂႃႇႁဵတ်းၵၢၼ်ၵေႃႇသၢင်ႈ တီႈမိူင်းမၢဝ်း၊ ၵိုင်ႉၵၢင်ႉဢမ်ႇယူႇလီ တၢႆၽၢၵ်ႇၵႂႃႇလႄႈ လႆႈသူင်ႇ ယူတ်းယႃတူဝ် တီႈႁူင်း ယႃမိူင်းမၢဝ်း မီးမႃးၶၢဝ်းတၢင်း 3 ဝၼ်း ပႃးမိူဝ်ႈၼႆႉ ဝၼ်းတီႈ 24/2/2022 ။ ယၢမ်းလဵဝ် မၼ်းၸၢႆး ထူပ်းတၢင်းယၢပ်ႇၽိုတ်ႇ ဢမ်ႇမီးၵႃႈယူတ်းယႃတူဝ် တုၵ်းယွၼ်းႁႂ်ႈၸိူဝ်ႉၶိူဝ်းပီႈၼွင်ႉ မၼ်းၸၢႆး ၵႂႃႇႁပ်ႉ ဢဝ်မႃးယူတ်းယႃတူဝ်ၶိုၼ်း ၼႂ်းမိူင်းတႆး။

ၸၢႆးလႅင်း ၵူၼ်းမိုတ်ႈၵိုဝ်းၸမ်ၸႂ် မၼ်းၸၢႆး လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် လုင်းၵျေႃႇတဵင်းၼႆႉ လႆႈတၢႆၽၢၵ်ႇ၊ တၢႆတွၼ်ႈ ဢမ်ႇတူင်ႉၼိုင်လႆႈ။ ယူတ်းယႃတူဝ်ဝႆႉတီႈႁူင်းယႃမိူင်းမၢဝ်းၶႃႈ။ ဢၼ် ယၢပ်ႇၽိုတ်ႇ ႁႅင်းတႄႉ ၵႃႈယူတ်းယႃ ဢေႃႈ။  ႁဝ်းၶႃႈ တႆးၵေႃႉ တႆးသေႈ ႁူမ်ႈငိုၼ်းၵၼ် ပႃးငိုၼ်းလုင်းၵျေႃႇတဵင်းၽွင်ႈ မီးငိုၼ်းယူႇ  5-6 ႁဵင်ယႂၼ်ၶႃႈ။ ႁၢၼ်ႉတေႃႇ ပေႃးလူင်းႁူင်းယႃတႄႉ တေသဵင်ႈထႅင်ႈၵႃႈ ႁိုဝ်ပႆႇႁူႉ”- ဝႃႈၼႆ။

ဢၼ်ၸွႆႈတူၺ်း ၸၢႆးၵျေႃႇတဵင်း ဝႆႉ ယၢမ်းလဵဝ် ပဵၼ်တႆးၵေႃႉတႆးသေႈ၊ ယွၼ်ႉပဵၼ်ၵူၼ်းတေႃႇတူဝ်ၼင်ႇ ၵၼ် လႄႈ ဢမ်ႇၸၢင်ႈလႆႈတူၺ်းၵၼ်ထိုင်တီႈ၊ သင်ပဵၼ်လႆႈ ၶႂ်ႈႁႂ်ႈပီႈၼွင်ႉ မႃးၸွႆႈၵၼ် ဢဝ်ၸၢႆးၵျေႃႇတဵင်း ပွၵ်ႈမိူဝ်းယႃတူဝ် တၢင်းဝၢၼ်ႈၵဝ်ႇမိူင်းလင်ၶိုၼ်းၵူၺ်းယဝ်ႉဝႃႈၼႆ။

ၸၢႆးၵျေႃႇတဵင်းၼႆႉ ပဵၼ်ၵူၼ်းၸႃတိ မိူင်းမိတ်ႈ မီးလုၵ်ႈယိင်းဝႆႉ 2 ၵေႃႉ။ ၵေႃႉၼိုင်ႈ ၵႂႃႇႁဵတ်းၵၢၼ်ဝႆႉ တၢင်းမိူင်းထႆး၊ ထႅင်ႈၵေႃႉၼိုင်ႈ တိုၵ်ႉၶိုၼ်းႁဵၼ်း ယူႇဝႆႉတီႈမိူင်းမိတ်ႈ။

ယွၼ်ႉတၢင်းပဵၼ်ၶူဝ်ႊဝိတ်ႉ 19 ၽႄးလၢမ်းသေ ၵူၼ်းၸိူဝ်းလုၵ်ႉမိူင်းတႆး မိူင်းမၢၼ်ႈၵႂႃႇႁဵတ်းၵၢၼ် ဝႆႉတီႈမိူင်းမၢဝ်းၼၼ်ႉ ၵမ်ႈၼမ်ဢွၼ်ႇၵၼ်ပွၵ်ႈၶိုၼ်း၊ ၸိူဝ်းၶဝ်ႈၵႂႃႇယူႇ ၼႂ်းမိူင်းၶႄႇလူင် တေႉတေႉ သေ ပႆႇၸၢင်ႈပွၵ်ႈၵေႃႈၵိုတ်းၼမ်။ ပီႈၼွင်ႉၸၢႆးၵျေႃႇတဵင်း ဢၼ်ၶဝ်ႈၵႂႃႇႁဵတ်းၵၢၼ်ဝႆႉ တၢင်းၼႂ်းမိူင်းၶႄႇလူင် ၵေႃႈမီးယူႇလၢႆၵေႃႉ ဝႃႈၼႆ။