မီးၶၢဝ်းတၢင်းၸမ်လိူၼ်ယဝ်ႉ ၵူၼ်းမိူင်းသူႈ ဢၼ်ထုၵ်ႇၵႃးသိုၵ်းမၢၼ်ႈ ၽႃႇတၢႆၼၼ်ႉ တေႃႇထိုင်ယၢမ်းလဵဝ် ၾၢႆႇသိုၵ်းမၢၼ်ႈ ပႆႇမႃးၸွႆႈၵႃႈႁႅၼ်း တၢၼ်းပၢင်သွမ်း ၵႃႈၶုမ်မၼ်းၸၢႆးသင်သေပျႃး  လုၵ်ႈလၢင်းၼၢင်းမေး ၸိူဝ်းၵိုတ်းတၢင်းလင်တႄႉ  ပႂ်ႉမုင်ႈမွင်းယူႇ ဝႃႈတေမႃးၸွႆႈၼႆ။

ၸၢႆးမွင်ႇၺူဝ်ႇ (ႁွင်ႉ) ၸၢႆးၼေႃႇၶမ်း ၵူၼ်းမိူင်းသူႈ ဢၼ်ထုၵ်ႇၵႃးသိုၵ်းမၢၼ်ႈ ႁေႃႈၽႃႇသႂ်ႇ တီႈဝၢၼ်ႈလူင် ဢိူင်ႇပၢင်ႇၸွႆး ၸႄႈဝဵင်းမိူင်းသူႈ ၸိုင်ႈ တႆးပွတ်းၸၢၼ်း ထိုင်တီႈပေႃးလႆႈလူႉတၢႆၵႂႃႇ မိူဝ်ႈဝၼ်းတီႈ 29/1/2022 ပူၼ်ႉမႃးၼၼ်ႉ ယူႇတီႈသိုၵ်းမၢၼ်ႈ ၽူႈမီးပုၼ်ႈၽွၼ်းၾၢႆႇႁၢပ်ႇၵၢၼ် လူင်ပွင်ၸိုင်ႈ ၸႄႈဝဵင်းၶဝ်ဝႃႈ တေမႃးၸွႆႈၵႃႈႁႅၼ်းတၢၼ်းလႄႈ ၵႃႈၶုမ်မၼ်းၸၢႆးပၼ်ၼႆ ႁၢၼ်ႉတေႃႇထိုင်ယၢမ်းလဵဝ် ပႆႇမႃးၸွႆႈသင်သေပျႃး။

ၵူၼ်းပိုၼ်ႉတီႈ မိူင်းသူႈ လၢတ်ႈတီႈၽူႈတွႆႇႁွၵ်ႈဝႃႈ – “တေမီးၶၢဝ်းတၢင်း ၼိုင်ႈလိူၼ်ယဝ်ႉ ၶဝ်ပႆႇမႃးၸွႆႈ ၵႃႈႁႅၼ်းတၢၼ်း ၵႃႈၶုမ်မၼ်းၸၢႆး သင် သေပျႃး။ ဝၢႆးသေ ပူၼ်ႉၶၢပ်ႈတူဝ်မၼ်းၸၢႆးယဝ်ႉၼၼ်ႉ ဢမ်ႇမႃးတူၺ်းသင်သေဢိတ်း ႁၢၼ်ႉတေႃႇထိုင်ယၢမ်းလဵဝ်။ မေးၼၢင်းမၼ်းၸၢႆးတႄႉ ပႂ်ႉ မုင်ႈမွင်းပႂ်ႉတေလႆႈ ၵႃႈႁႅၼ်းတၢၼ်းပၢင်သွၼ်း ၵႃႈၶုမ်ယူႇဢိူဝ်ႈၼႆႉ။ ၶုမ်မၼ်းၸၢႆးတႄႉ တိုၵ်ႉႁဵတ်းယဝ်ႉၵႂႃႇ ပႆႇႁိုင်ၼႆႉၵူၺ်း”- ဝႃႈၼႆ။

ဢၼ်သိုၵ်းမၢၼ်ႈႁဵတ်းၽိတ်းယဝ်ႉဢမ်ႇတူၺ်းလူသၢႆႈတႅၼ်းပၼ်ၶိုၼ်းသင်သေဢိတ်းၼႆႉ ဢမ်ႇမီးလွင်ႈပဵၼ်ထမ်းတြႃး၊ ယိင်ႈသိုၵ်းမၢၼ်ႈ ဢမ်ႇဝူၼ်ႉတႃႇၵူၼ်းမိူင်း ၊ ယိင်ႈၵူၼ်းမိူင်းဢမ်ႇယွမ်းႁပ်ႉလႆႈလွင်ႈသိုၵ်းမၢၼ်ႈၶိၼ်ၽွင်းငမ်းဝၢၼ်း မိူင်းၵူၺ်းယဝ်ႉ ထဝ်ႈဝၢၼ်ႈထဝ်ႈၼႃး ၵူၼ်းမိူင်းသူႈၵေႃႈၼိုင်ႈၵေႃႈလၢတ်ႈၼင်ႇၼႆ။

“ယူႇတီႈႁဝ်းၶႃႈတႄႉ ႁၼ်ထိုင်ဝႃႈ ဢၼ်ၶဝ်ႁဵတ်းၵႂႃႇၸိူင်ႉၼႆ မၼ်းဢမ်ႇတြႃးသင်သေဢိတ်းၶႃႈ သင်ဝႃႈ ႁေႃႈၽႃႇယဝ်ႉၼႆၵေႃႈ ႁႂ်ႈမႃးႁွပ်ႇဢဝ် သေ ၵႂႃႇသူင်ႇတီႈႁူင်းယႃၵမ်းလဵဝ် ၼႆႉပဵၼ်တႄႉ ပဵၼ်မဵဝ်းၼိုင်ႈ။ ၼႆႉသမ်ႉ ႁူႉယူႇ ၽႃႈယဝ်ႉ သမ်ႉႁေႃႈၵႃးပၢႆႈ ၵူၼ်းသိုၵ်းၶဝ်သမ်ႉဝႃႈ ၵူၼ်းႁေႃႈ ၵႃးၶဝ် မၼ်းမဝ်းလဝ်ႈၼႆ လၢႆးဢၼ်ၶဝ်ႁဵတ်းၼႆႉ မၼ်းလိူင်းၼႃႇ လွင်ႈဢၼ်ဝႃႈ ႁပ်ႉပုၼ်ႈၽွၼ်း (တာဝန်ခံမှု တာဝန်ယူမှု) ဢၼ်ဝႃႈ ၼၼ်ႉ ၶဝ်တိုၼ်းဢမ်ႇမီး။ လိူင်းတႄႉတႄႉၼၼ်ႉယဝ်ႉ ၶဝ်တိုၼ်းဢမ်ႇဝူၼ်ႉတႃႇၵူၼ်းမိူင်းသင်သေဢိတ်းၶႃႈယဝ်ႉ”- ၵူၼ်းပိုၼ်ႉတီႈ မိူင်းသူႈ သိုပ်ႇ လၢတ်ႈၼႄၼင်ႇၼႆ။

ၸၢႆးမွင်ႇၺူဝ်ႇ/ ၸၢႆးၼေႃႇၶမ်းၼႆႉ ဢႃႇယုမီး 28 ပီ ပဵၼ်ၵူၼ်းပွၵ်ႉ 3 မိူင်းသူႈ မီးလုၵ်ႈယိင်းဢွၼ်ႇ ၵေႃႉၼိုင်ႈ တိုၵ်ႉလႆႈ 2 ၶူပ်ႇၵူၺ်း။ မၼ်းၸၢႆးၼႆႉ ပဵၼ်ၵူၼ်း ႁႃလဵင်ႉၼႃႈႁိူၼ်း မေးမၼ်းၸၢႆးတိုၵ်ႉမီးဢႃယု မွၵ်ႈ 24 ပီၼႆႉၵူၺ်း။ ယၢမ်းလဵဝ် ႁဵတ်းႁႂ်ႈၵူၼ်းၵိုတ်းတၢင်းလင် ထူပ်းတၢင်းယၢပ်ႇၵိၼ်း ၸႂ်ၸွမ်း။  

ၵႃးသိုၵ်းမၢၼ်ႈ ဢၼ်ၽႃႇၸၢႆးမွင်ႇၺူဝ်ႇ လူႉတၢႆၼၼ်ႉ ပဵၼ်ၵႃးသိုၵ်းမၢၼ်ႈ တၢင်ႇၶူဝ်းၵိၼ်ယႅမ်ႉ(တပ်ႉၼမ်ႉၸၢင်) ႁေႃႈမႃးၽႃႇသႂ်ႇမၼ်းၸၢႆး မိူဝ်ႈ ၽွင်ႈၵႂႃႇၸွႆႈထႅမ်ပၢင်ၶႅၵ်ႇ၊ ၵႃးသိုၵ်းမၢၼ်ႈၼၼ်ႉ ႁေႃႈဝႆး တမ်ၽႃႇလၢၵ်ႈဢဝ်တူဝ်မၼ်းၸၢႆးၵႂႃႇ ၵႆမွၵ်ႈ 15 ထတ်း/ ပေႇ။ ၵႃးသိုၵ်းမၢၼ်ႈၼၼ်ႉ ယင်းဢမ်ႇၵိုတ်းသေ သိုပ်ႇႁေႃႈၶဝ်ႈၵႂႃႇ တီႈတပ်ႉၶလယ 149  တေႃႇထိုင်ဝၼ်းမိူဝ်ႈၼႆႉ ဢမ်ႇၶိုၼ်းမႃးတူၺ်းလူ သၢႆႈတႅၼ်းပၼ်သင်။