ၵူၼ်းပၢႆႈၽေးသိုၵ်း တီႈဝဵင်းမိူင်းၵိုင် ပႆႇၸၢင်ႈပွၵ်ႈၶိုၼ်းႁိူၼ်းမူတ်း၊ တိုၵ်ႉၵိုတ်းဝႆႉ 50 ပၢႆ ၵႂႃႇၵိၼ်ၸၢင်ႈႁဵတ်းသူၼ်ႁႃၵိၼ်လဵင်ႉတွင်ႉယူႇ။
ယၢမ်းလဵဝ် ငဝ်းလၢႆးပၢင်တိုၵ်း ၼႂ်းၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း သဵင် ၵွင်ႈမၢၵ်ႇ ယဵၼ်လူင်းတဵတ်ႇယဝ်ႉသေတႃႉ ၵူၼ်းပၢႆႈၽေးသိုၵ်းမၢင်ၸိူဝ်း တႃႇတေပွၵ်ႈၶိုၼ်းႁိူၼ်း ယေးၼၼ်ႉ တိုၵ်ႉမီးလွင်ႈ ယၢပ်ႇၽိုတ်ႇဝႆႉ လၢႆလွင်ႈ။ တိုၵ်ႉဢွၼ်ၵၼ်ယူႇသဝ်းဝႆႉၸွမ်းပၢင်ႇမူၺ်ႇတေႃႇ မိူင်းၵိုင်။
ၵူၼ်း မိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ -“ၼႂ်းလၢႆပိုၼ့်တီႈၵေႃႈ ဢမ်ႇလႆႈငိၼ်းသဵင်ၵွင်ႈသဵင်မၢၵ်ႇၼႆ့ မီးမွၵ်ႈၽၢၵ်ႇလိူၼ်ယဝ့်။ ၵူၼ်းပၢႆႈ ၽေးသိုၵ်း ၵမ်ႈၼမ် ဢွၼ်ၵၼ်ပွၵ်ႈၶိုၼ်းႁိူၼ်းယဝ်ႉသေတႃႉ မၢင်ၸိူဝ်းၵေႃႈ ပႆႇၸၢင်ႈပွၵ်ႈၶိုၼ်းႁိူၼ်းယေး ယွၼ့်ဝႃႈ ဢမ်ႇပႆႇမီးရူတ်ႉၵႃး တႃႇ တေႃႉၶူဝ်း။ မၢင်ၸိူဝ်းၵေႃႈ မႆႈၸႂ်ပေႃးပွၵ်ႈမိူဝ်ႈ ၶိုၼ်း မိူဝ်ႈလဵဝ် တီႈဝၢၼ်ႈပႆႇမီးၵၢၼ်သင်ႁဵတ်း။ပေႃးတေၵႂႃႇႁဵတ်းၵၢၼ်သူၼ်သမ်ႉၵူဝ်ယဵပ်ႇၺႃးမၢၵ်ႇ ၸိူဝ်းၼႆႉ။ ယွၼ့်ၼၼ့် ၵူၼ်းပၢႆႈၽေးသိုၵ်း ၵမ်ႈၽွင်ႈၵေႃႈ ႁႃႁဵတ်းၵၢၼ် ၵိၼ်ၸၢင်ႈၸွမ်းဝၼ်းဝႆႉယူႇ ၼႂ်းဝဵင်းမိူင်းၵိုင်”- ဝႃႈၼႆ။
တႄႇဢဝ် ႁၢင်ပီ 2021 ၼႆႉမႃး ၸုမ်းသိုၵ်းဢူၺ်းလီပွတ်းႁွင်ႇ/ တပ်ႉပွင်းၸုႉ ဢၼ်မီး SSPP တင်း TNLA ပိုတ်းယိုဝ်းၵၼ် တင်း RCSS ႁၢဝ်ႈႁႅင်း ၼႂ်းၸႄႈဝဵင်းမိူင်းၵိုင်။ မိူၼ်ၼင်ႇ ဝၢၼ်ႈၽႃလမ်၊ ႁူၺ်ႈတူၺ်၊ ဝဵင်းငိုၼ်း၊ ပႃႇမဵၼ့်၊ ၼမ်မေႃႇမုၼ်ႇ ၸိူဝ်းၼႆ့လႄႈ ၵူၼ်းဝၢၼ်ႈၼပ့်ႁူဝ် ႁဵင် လၢႆႈဢွၼ်ၵၼ်ငိူင်ႉဝႄႈၽေးမႃး။
