ၼႂ်းလိူၼ်ၾႅပ်ႊပိဝ်ႊရီႊ 2022 ၼႆႉ ၵူၼ်းမိူင်းၵျွၵ်ႉမႄးတင်း သီႇပေႃႉ ယဵပ်ႇၺႃးမၢၵ်ႇ တႅၵ်ႇသႂ်ႇ လူႉတၢႆထင်တီႈ 2 ၵေႃႉ မၢတ်ႇၸဵပ်း 4 ၵေႃႉ။
ဝၼ်းတီႈ 7/2/2022 ယၢမ်းၵၢင်ဝၼ်းမွၵ်ႈ 12 မူင်း ၵူၼ်းဝၢၼ်ႈႁူးၵွတ်ႈ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ 3 ၵေႃႉ ၵႂႃႇယဵပ်ႇၺႃးမၢၵ်ႇ ၼႂ်းသူၼ်ၼဵင်ႈ တႅၵ်ႇတိူဝ်ႉတႃႇ 2 ၵေႃႉ လႆႈလူႉတၢႆ ထင်တီႈ။ ထႅင်ႈၵေႃႉၼိုင်ႈ လႆႈမၢတ်ႇၸဵပ်းႁၢဝ်ႈႁႅင်း။
ၵူၼ်း ၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ယဵပ်ႇၺႃးမၢၵ်ႇတႅၵ်ႇသေ လူႉတၢႆ ထင်တီႈ 2 ၵေႃႉ။ မၢတ်ႇၸဵပ်းႁၢဝ်ႈႁႅင်း 1 ၵေႃႉ။ ၵေႃႉမၢတ်ႇၸဵပ်းၼၼ်ႉ ပဵၼ်ၵူၼ်းဢႃယုယႂ်ႇၶႃႈ။ ႁဵတ်းႁိုဝ်လႄႈ မၢၵ်ႇတႅၵ်ႇ သႂ်ႇဢၼ်ဝႃႈၼၼ်ႉ ႁဝ်းၶႃႈဢမ်ႇလႆႈႁူႉႁူဝ်ယွႆႈမၼ်းၶႃႈ။ တႅၵ်ႇ ၼႂ်းသူၼ်ၼဵင်ႈၶႃႈဢေႃႈ” – ဝႃႈၼႆ။
ၵူၼ်းဝၢၼ်ႈႁူးၵွတ်ႈ 2 ၵေႃႉ ဢၼ်လႆႈလူႉတၢႆၵႂႃႇၼၼ်ႉ ၸိုဝ်ႈႁွင်ႉ မၢႆးၵျေႃႇလိၼ်းထူၺ်း ဢႃယု 17 ပီလႄႈ မၢႆးလႃႉမိၼ်းထေး ဢႃယု 15 ပီ။ ၵေႃႉမၢတ်ႇၸဵပ်းၼၼ်ႉတႄႉ ၸိုဝ်ႈႁွင်ႉ လုင်းဢၢႆႈထေး ပဵၼ်ပေႃႈ မၢႆးလႃႉမိၼ်းထေး။
ပူၼ်ႉမႃး မိူဝ်ႈလိူၼ်သႅပ်ႊထႅမ်ႊပိူဝ်ႊ 2021 ၼၼ်ႉၵေႃႈ တီႈဝၢၼ်ႈႁူးၵွတ်ႈၼၼ်ႉၵူၺ်း ၵူၼ်းဝၢၼ်ႈသွင်ၵေႃႉ ၵႂႃႇသူၼ်သေ ယဵပ်ႇၺႃးမၢၵ်ႇ လႆႈ မၢတ်ႇၸဵပ်းတင်းသွင်။
ၼွၵ်ႈလိူဝ်ၼၼ်ႉ မိူဝ်ႈဝၼ်းတီႈ 3/2/2022 ၼႆႉ ၵူၼ်းမိူင်းသီႇပေႃႉ ယဵပ်ႇၺႃးမၢၵ်ႇ တႅၵ်ႇသႂ်ႇ လႆႈမၢတ်ႇၸဵပ်း 3 ၵေႃႉ ယၢမ်းလဵဝ် သူင်ႇယူတ်းယႃ တူဝ်ဝႆႉတီႈႁူင်းယႃလႃႈသဵဝ်ႈ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈၶႃႈဢေႃႈ ပဵၼ်ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉ တီႈဝတ်ႉ ၽြႃးၵၢင်ႉမေႃႇၼႆႉသေ တိုၵ်ႉပွၵ်ႈမိူဝ်းႁိူၼ်း ပႆႇႁိုင် ယဵပ်ႇၺႃးမၢၵ်ႇသေ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉတီႈႁူင်းယႃလႃႈသဵဝ်ႈၶႃႈ”- ဝႃႈၼႆ။
ၵူၼ်းမိူင်း ဢၼ်ယဵပ်ႇၺႃးမၢၵ်ႇတႅၵ်ႇ လႆႈမၢတ်ႇၸဵပ်း 3 ၵေႃႉၼၼ်ႉ ပဵၼ်ၼၢင်းၶိၼ်ႇထေး ဢႃယု 54 ပီလႄႈ လုၵ်ႈၸၢႆးၼၢင်းၶိၼ်ႇထေး ဢႃယု 30 ပီ ပဵၼ်ၵူၼ်းဝၢၼ်ႈတူၼ်ႈၶေႃႉ ဢိူင်ႇၼမ်ႉသိမ်ႇ။ လိူဝ်ၼၼ်ႉ ၸၢႆးၵေႃႇ ဢႃယု 40 ပီ ၵူၼ်းမၢၼ်ႈသၢႆး (မန်ဆိုင်းကျေးရွား) ၼၼ်ႉတႄႉ ယဵပ်ႇ ၺႃးမၢၵ်ႇ ၼႂ်းႁႆႈ။
