မိူဝ်ႈၼႆႉ ဝၼ်းတီႈ 8/2/2022 ယၢမ်းၵၢင်ၼႂ် သဵင်ၵွင်ႈတႅၵ်ႇထႅင်ႈ ၸွမ်းသၼ်လွႆ ၾၢႆႇဢွၵ်ႇမိူင်းယေႃ   ၼႂ်း ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ယွၼ်ႉသိုၵ်းမၢၼ်ႈတင်း ၸုမ်းဢူၺ်းလီပွတ်းႁွင်ႇ တႄႇပဵၼ်ပၢင်တိုၵ်းၵၼ်။

ၵူၼ်းၼႂ်းဢိူင်ႇမိူင်းယေႃ လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ် ႁဝ်းၶႃႈ ၵူၼ်းမိူင်းတႄႉ မႆႈၸႂ်ၵူဝ်သိုၵ်းမၢၼ်ႈ ဢဝ်ၶိူင်ႈမိၼ် မႃးထႅင်ႈ ၵူၺ်း ယဝ်ႉ။ မၢင်ၵေႃႉဝႃႈ လူဝ်ႇၶုတ်းလုၵ်ႉပဵမ်ႇဝႆႉယဝ်ႉယူဝ်ႉၼႆလူးၵွၼ်ႇ။ မၢင်ၵေႃႉ ပေႃးႁၢင်ႈႁႅၼ်းၶူဝ်းလဵင်းဝႆႉယဝ်ႉပေႃးလူဝ်ႇပၢႆႈမႃးႁႂ်ႈပေႃးတူဝ်ႈတၼ်း ”- ဝႃႈၼႆ။

ၾၢႆႇၼိုင်ႈ သိုၵ်းမၢၼ်ႈလုၵ်ႉတၢင်းလႃႈသဵဝ်ႈ ထႅမ်ႁႅင်းသိုၵ်း မုင်ႈၸူးတၢင်းထုင်ႉမိူင်းယေႃထႅင်ႈ တင်းၼမ် ။ ၵူၼ်းမိူင်းပိုၼ်ႉတီႈမႆႈၸႂ် ၵူဝ်ပၢင် တိုၵ်း ပဵၼ်ႁၢဝ်ႈႁႅင်းလႄႈ ၶၢဝ်းႁိုင်။

“သင်ဝႃႈ  ဢမ်ႇထွႆထွၼ်ပၼ်ၵၼ်သေၸုမ်းၸိုင် ပၢင်တိုၵ်းတၢင်းထုင်ႉမိူင်းယေႃၼႆႉ တေၸၢင်ႈၵိူတ်ႇယႂ်ႇႁၢဝ်ႈႁႅင်းသေ တေၸၢင်ႈ ပဵၼ်ၶၢဝ်းယၢဝ်း။ ယွၼ်ႉတၢင်းၾၢႆႇသိုၵ်းမၢၼ်ႈ ၽူႈမီးၸၼ်ႉၶဝ် လႆႈလူႉတၢႆၵႂႃႇ 3 ၵေႃႉယဝ်ႉလႄႈ တူၺ်းၶဝ် တႃႇတေထွႆ တႄႉ တေပႆႇငၢႆႈ။ ယၢမ်းလဵဝ် ၶဝ်တိုၵ်ႉထႅမ်ႁႅင်းသိုၵ်း လုၵ်ႉလႃႈသဵဝ်ႈမႃးထိုင်တၢင်းဢိူင်ႇမိူင်းယၢင်းဝႆႉတင်းၼမ် လႆႈငိၼ်းဝႆႉၼင်ႇၼႆ”- ၵူၼ်း မိူင်းယေႃ လၢတ်ႈၼႄၼင်ႇၼႆ။   

မိူဝ်ႈဝႃး ဝၼ်းတီႈ 7 ၼႆႉ  သိုၵ်းမၢၼ်ႈတင်း ၸုမ်းဢူၺ်းလီ ပွတ်းႁွင်ႇ ပဵၼ်ပၢင်တိုၵ်းၵၼ် ႁိုင် 2 ၸူဝ်ႈ မူင်းပၢႆ။ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်မႅင်းမီႈသွင်လမ်း ၸွႆႈပိုတ်းယိုဝ်း ။   လွင်ႈမၢတ်ႇၸဵပ်းလူႉတၢႆတႄႉ ဢမ်ႇလႆႈႁူႉၸွမ်း။ ၽွင်းပိုတ်းယိုဝ်းၵၼ်ယူႇၼၼ်ႉ ၵူၼ်းဝၢၼ်ႈ ၼႂ်းထုင်ႉပၢင်ႇၵဵင်လူင် 2-3 ဝၢၼ်ႈလႆႈဢွၼ်ၵၼ်ပၢႆႈၽေးသိုၵ်းၸူဝ်ႈၵႅပ်ႉ ။ ပေႃးပၢင်တိုၵ်းယဵၼ် သမ်ႉဢွၼ်ၵၼ်ပွၵ်ႈမႃးႁိူၼ်းၶိုၼ်း ၵူၼ်းထုင်ႉမိူင်းယေႃလၢတ်ႈ။

ဝၢၼ်ႈလူင်ၵိတ်ႈ ဝၢၼ်ႈၶူဝ်ၶမ်း ထုင်ႉပၢင်ႇၵဵင်လူင် ၼႆႉ ယူႇၾၢႆႇဢွၵ်ႇမိူင်းယေႃ ။

ၼႂ်းဝၼ်းတီႈ 28 ပူၼ်ႉမႃးၼၼ်ႉ ဝၢႆးသေ သိုၵ်းမၢၼ်ႈဢဝ်ၶိူင်ႈမိၼ် လေႃႇတိုၵ်းသိုၵ်းၶႄႇၵဝ်ႈၵၢင်ႉ ၼႂ်းၵႄႈဢိူင်ႇမိူင်းႁႅတ်ႈတင်း ဢိူင်ႇလူင် မူၼ်း ၼႂ်းထုင်ႉမိူင်းယေႃ ၊ ၼၼ်ႉၵေႃႈ ၵူၼ်းသိုၵ်း လူႉယႂ်ႇတၢႆၼမ် မိူၼ်ၵၼ်။

 ထုင်ႉမိူင်းယေႃဢၼ်မီးၾၢႆႇဢွၵ်ႇဝဵင်းလႃႈသဵဝ်ႇ မွၵ်ႈ 30-50 လၵ်းၼၼ်ႉ မီးၸုမ်းသိုၵ်းမၢၼ်ႈ ၵႂႃႇမႃးတူင်ႉၼိုင်။ ၸုမ်းဢူၺ်းလီသိုၵ်းပွတ်း ႁွင်ႇသမ်ႉ ၸုမ်းသိုၵ်းၶၢင် KIA, ၸုမ်းၶႄႇၵဝ်ႈၵၢင်ႉ MNDAA, ၸုမ်းသိုၵ်းလွႆ TNLA, တင်း ၸုမ်းသိုၵ်း SSPP ၸိူဝ်းၼႆႉ ၵႂႃႇမႃးတူင်ႉၼိုင် ။