ၵူၼ်းပၢႆႈၽေးသိုၵ်း တီႈဝဵင်းမိူင်းၵိုင် ဢၼ်ၵိုတ်းဝႆႉထႅင်ႈမွၵ်ႈ 500 ၼႆႉ တိုၵ်ႉလူဝ်ႇတၢင်းၸွႆႈထႅမ် ၶွင်ၵိၼ်ယႅမ်ႉလႄႈ ၽႃႈႁူမ်ႈ  ။

ယၢမ်းလဵဝ် ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈ ၵၢင်ပၢင်ႇဝၢင်းထၢတ်ႈမူၺ်ႇတေႃႇ၊ ၸွမ်းဝတ်ႉဝႃး မုၼ်ၸဝ်ႈလႄႈ ၸွမ်းႁိူၼ်းယေး ပီႈၼွင်ႉ ၸွမ်းပွၵ်ႉ/ ယွမ်ႇ ၼႂ်းၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း မွၵ်ႈႁူဝ်ၵူၼ်း 500 တိုၵ်ႉလူဝ်ႇၸွႆႈထႅမ် ယွၼ်ႉဝႃႈ ပႆႇၸၢင်ႈပွၵ်ႈ တိုၵ်ႉမီးၸုမ်းယိပ်းၵွင်ႈၵၢင်ႇ တူင်ႉၼိုင်ယူႇဝႆႉၸွမ်းၼႂ်း ဝၢၼ်ႈလႄႈ ၶဵင်ႈၶႅင်ၵၢၼ်သိုၵ်းၵၼ်ယူႇ။

ၵူၼ်း မိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ် လူဝ်ႇတၢင်းၸွႆႈထႅမ်ၶွင်ၵိၼ်ယႅမ်ႉထႅင်ႈၶႃႈဢေႃႈ ယဝ်ႉၵေႃႈ ၽႃႈႁူမ်ႇၶူဝ်းၼွၼ်း ၸိူဝ်းၼႆႉထႅင်ႈ။ မိူဝ်ႈဝႃး ၵူၼ်းပၢႆႈၽေးႁဝ်းၶႃႈ တိုၵ်ႉထၢမ်ႁႃၽႃႈႁူမ်ႇထႅင်ႈယူႇ”- ဝႃႈၼႆ။

မိူဝ်ႈဝၼ်းတီႈ 31/1/2022 ပူၼ်ႉမႃးၼႆႉ ၵူၼ်းပၢႆႈၽေးသိုၵ်း တီႈဝဵင်းမိူင်းၵိုင် ၵမ်ႈၽွင်ႈ ဢွၼ်ၵၼ် ပွၵ်ႈမိူဝ်းႁိူၼ်းၶိုၼ်းသေတႃႉ တၼ်းယူႇလႆႈ တီႈႁိူၼ်းလၢႆဝၼ်းၵူၺ်း လႆႈပၢႆႈဢွၵ်ႇမႃးၶိုၼ်း ယွၼ်ႉလႆႈငိၼ်းသဵင်ၵွင်ႈတႅၵ်ႇၶိုၼ်း။

ယၢမ်းလဵဝ် ၼႂ်းၸႄႈဝဵင်းမိူင်းၵိုင်ၼႆႉ ပၢင်တိုၵ်းယဵၼ်ဝႆႉယူႇသေတႃႉ လွင်ႈၶဵင်ႈၶႅင် ၵၢၼ်သိုၵ်းတေႃႇၵၼ် တိုၵ်ႉမီး ဝႆႉယူႇလႄႈ ၵူၼ်းပၢႆႈၽေးသိုၵ်းတႄႉ ပႆႇႁတ်းပွၵ်ႈႁိူၼ်းယေးၵၼ်။

တႄႇဢဝ် ႁူဝ်လိူၼ်ၵျႅၼ်ႊၼိဝ်ႊရီႊ 2022 ၼႆႉမႃး ၼႂ်းၸႄႈဝဵင်းမိူင်းၵိုင်ၼႆႉ ယူႇတီႈၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ၼႂ်းမိူင်းတႆးၼင်ႇၵၼ် ပဵၼ် ပၢင်တိုၵ်းၵၼ် ထႅင်ႈႁၢဝ်ႈႁႅင်းသေ ႁဵတ်းႁႂ်ႈၵူၼ်းၼႂ်းထုင်ႉႁၢမ်းငၢႆး ဢွၼ်ၵၼ်တူၵ်းၸႂ်တိုၼ်ႇသၢၼ်ႈ ပၢႆႈၽေးၼပ်ႉႁူဝ်ႁဵင်။