တိူၵ်ႈႁပ်ႉငိုၼ်းတၢၼ်း ၼိူဝ်ၽြႃးထၢတ်ႈလွႆလဵင်းၼၼ်ႉ ၵူၼ်းႁၢႆႉထုပ်ႉတိူၵ်ႈမၢၼ်ႇ တႅၵ်ႇလႅဝ်သေ ဢဝ်ငိုၼ်း ၼႂ်းတိူၵ်ႈၵႂႃႇတင်းမူတ်း ဢမ်ႇဝႆႉလိူဝ်ပၼ်သေပႅၵ်ႉ။

ဝၼ်းတီႈ 1/2/2022 ပူၼ်ႉမႃး တိူၵ်ႈႁပ်ႉငိုၼ်းတၢၼ်း ဢၼ်တၢမ်း ဝႆႉဝိႁၢၼ် ၼိူဝ်ၽြႃးထၢတ်ႈလွႆလဵင်း၊ တီႈလူႇတၢၼ်းၵွင်းမူး ဢၼ်သိၼ်ထမ်းၸဝ်ႈ ၶူးဝႃးဝုၼ်ႉၸုမ်ႉ လူႇတၢၼ်း တၢင်ႇထီးဝႆႉ။ တိူၵ်ႈႁပ်ႉငိုၼ်းတၢၼ်း ဢၼ်ဝႆႉတီႈသႃလႃး ႁိမ်းၽြႃးထၢတ်ႈ ၵွၼ်းမူး ဢၼ်မီးၼိူဝ် ၸိၵ်းလွႆလဵင်း ဢၼ်သုင်သုတ်းၼႂ်းမိူင်းတႆး ။

ၵူၼ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝၼ်းတီႈ 1 ႁဝ်းၶႃႈ လႆႈၵႂႃႇၶိုၼ်ႈလွႆလဵင်းသေ ႁၼ်မႅၼ်ႈ တိူၵ်ႈလူႇၶၢမ်ႇငိုၼ်း ဢၼ်တမ်းဝႆႉ တီႈၼိူဝ်ၼၼ်ႉ ၺႃးထုပ်ႉယႃႉၵွႆသေ ငိုၼ်းၼႂ်းမၼ်းၵေႃႈ ႁၢႆၵႂႃႇမူတ်း။ မိူဝ်ႈႁၢင်ပီ 2021 ၼၼ်ႉ ႁဝ်းၶႃႈ ၶိုၼ်ႈၵႂႃႇၵမ်းၼိုင်ႈ တိူၵ်ႈလူႇၶၢမ်ႇၼႆႉ တိုၵ်ႉမီး ငိုၼ်းၼႂ်းမၼ်း ၼမ်ယူႇ၊ တေႃႈလဵဝ်တႄႉ ဢမ်ႇမီးသေပႅၵ်ႉယဝ်ႉ”- ဝႃႈၼႆ။

ၼိူဝ်လွႆလဵင်းၼႆႉ မီးထၢတ်ႈၵွင်းမူး ဢၼ်သိၼ်ထမ်းၸဝ်ႈ ၶူးဝႃးဝုၼ်ႉၸုမ်ႉ ပဵၼ်ငဝ်ႈ၊ ၸဝ်ႈသြႃႇလူင် သုၶမ်း တၢၼ်းတၢင်ႇထီးဝႆႉ။ ႁဵတ်းဝႆႉပႃး သႃလႃး တီႈဝႆႉၽႃး၊ တမ်းဝႆႉပႃးတိူၵ်ႈႁပ်ႉငိုၼ်းတၢၼ်းတီႈၼၼ်ႈ ႁႂ်ႈၽူႈၶိုၼ်ႈဝႆႈ ၶိုၼ်ႈဢႅဝ် ၼိူဝ်လွႆလဵင်း လႆႈႁဵတ်းၵၢၼ်တၢင်းလီ။

ၸဝ်ႈတႃႇၼ ဢၼ်ယၢမ်ႈၶိုၼ်ႈ ၵႂႃႇလူႇတၢၼ်းၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢွင်ႈတီႈၼၼ်ႈ ပဵၼ် ၸဝ်ႈၶူးသုၶမ်းလႄႈ ၸဝ်ႈၶူးဝႃးပေႃႈသိလ်ထမ်းဝုၼ်းၸုမ်ႉ ဢွၼ်ႁူဝ်ၵေႃႇထၢတ်ႈဝႆႉ ယဝ်ႉၵေႃႈ ပဵၼ်ဢွင်ႈတီႈသႃသၼႃၵေႃႈၸႂ်ႈလႄႈ ဢိင်ၼိူဝ် ၵူၼ်းမႃးယႃႉတိူၵ်ႈလူႇၶၢမ်ႇငိုၼ်း တၢၼ်းလူႇၸိူင်ႉၼႆ မၼ်းဢမ်ႇထုၵ်ႇလီႁဵတ်းၶႃႈ”- ဝႃႈၼႆ။

မိူဝ်ႈႁၢင်လိူၼ် ပူၼ်ႉမႃးၼႆႉ တပ်ႉသိုၵ်းတဢၢင်း TNLA ၶိုၼ်ႈၵႂႃႇတူင်ႉၼိုင် ထိုင်ၼိူဝ် ၸိၵ်းလွႆလဵင်း – ထၢႆႇၶႅပ်းႁၢင်ႈလူင်း တီႈ Social Media သုၼ်ႇတူဝ်ၶဝ်။

လွႆလဵင်းၼႆႉ ပဵၼ်လွႆဢၼ်သုင်သုတ်းၼႂ်းမိူင်းတႆး တီႈၼိုင်ႈ တၢင်းသုင် မီး 8,777 ထတ်း/ ပေႇ။ လွႆဢၼ်မီး မွၵ်ႇမႆႉၶၢဝ်းၵတ်း၊ တူၼ်ႈမႆႈဢၼ်ၶၢမ်ႇလႆႈၵတ်း၊ မုင်ႈသႃႇ ႁၼ်ၵႆ တေးသၼ်လွႆမိူင်းတႆး ဢၼ်ႁၢင်ႈလီတႃ။