ဝၢႆးသေ မၢၵ်ႇတႅၵ်ႇ ၼႂ်းပၢင်ၵမ်ႉထႅမ် တပ်ႉသိုၵ်းမၢၼ်ႈ တီႈဝဵင်းတႃႈၶီႈလဵၵ်းမႃးယဝ်ႉၼၼ်ႉ ၾၢႆႇသိုၵ်းမၢၼ်ႈ ဢမ်ႇမီးလၵ်းထၢၼ်ၼႅၼ်ႈၼႃသင်သေ ထၢင်ႇထိူမ်ၵူၼ်းၵေႃႉလႂ်ၵေႃႈ ၶဝ်ႈၵူတ်ႇထတ်းၸႅတ်ႈထၢမ် တီႉၺွပ်း ပေႃႉထုပ်ႉထႅင်ႈႁၢဝ်ႈႁႅင်း ဢမ်ႇဝႃႈၽူႈၸၢႆး/ ၼၢင်းယိင်း။
မိူဝ်ႈဝၼ်းတီႈ 1/2/2022 ယၢမ်းၵၢင်ၶမ်ႈ/ ၶိုၼ်း ၶွင်ႇသီႇသိုၵ်းမၢၼ်ႈ ယိုတ်းမိူင်း ၶဝ်ႈၵူတ်ႇထတ်း ၸႅတ်ႈထၢမ် တီႉၺွပ်း ပေႃႉထုပ်ႉ ၵူၼ်းမိူင်းပိုၼ်ႉတီႈမႃးႁၢဝ်ႈႁႅင်း ၸွမ်းၼႂ်းပွၵ်ႉ/ ယွမ်ႇ ၸွမ်းႁွင်ႈၶၢတ်ႈ/ သဝ်း ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း။
ၵူၼ်းမိူင်း တႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ဝၢႆးသေမၢၵ်ႇတႅၵ်ႉ တီႈၼႂ်းပၢင်ၵမ်ႉထႅမ်သိုၵ်းၶဝ်ယဝ်ႉၼၼ်ႉ ယၢမ်းၵၢင်ၶမ်ႈ/ ၶိုၼ်း သိုၵ်းမၢၼ်ႈၼႆႉ ၶဝ်ႈၵူတ်ႇထတ်းသွၵ်ႈတဝ်ၸွမ်းႁွင်ႈထႅဝ်(ႁွင်ႈသဝ်း) ၼႂ်းပွၵ်ႉသၼ်သၢႆး ၵူၼ်းၼုမ်ႇ ၸဝ်ႈၶွင်ႁွင်ႈထႅဝ် ၸိူဝ်းၼႆႉ ထုၵ်ႇပေႃႉထုပ်ႇ ၸႅတ်ႈထၢမ်ႁၢဝ်ႈႁႅင်း။ ၼၢင်းယိင်းၵေႃႈ ၺႃးပေႃႉထုပ်ႉႁၢဝ်ႈႁႅင်းမိူၼ်ၵၼ် တင်းမိူၵ်ႈသိုၵ်းမၢၼ်ႈၼႆႉ။ ၺွပ်းဢဝ်ၸဝ်ႈၶွင်ႁွင်ႈထႅဝ် ၵႂႃႇထႅင်ႈပဵၼ် လၢႆၵေႃႉၶႃႈဢေႃႈ”- ဝႃႈၼႆ။
ဢိင်ၼိူဝ် လွင်ႈသိုၵ်းမၢၼ်ႈ ၶဝ်ႈၵူတ်ႇထတ်းၸႅတ်ႈထၢမ် ၵူၼ်းမိူင်းပိုၼ်ႉတီႈ ၸွမ်းႁွင်ႈၶၢတ်ႈ ၼႂ်းပွၵ်ႉ/ ယွမ်ႇ ၸိူင်ႉၼႆၼႆႉ ဢမ်ႇမီးသၵ်ႈသေႇ လၵ်း ထၢၼ်ၼႅၼ်ႈၼႃသင်သေ ဢဝ်ၵမ်ႉၸႂ်ၶဝ်ထၢင်ႇထိူမ်ၵူၺ်း ၶႂ်ႈၶဝ်ႈၵူတ်ႇထတ်း တီႉၺွပ်း တီႈလႂ် ၸိူဝ်းၼႆႉ။
“မိူဝ်ႈလဵဝ် လွင်ႈႁူမ်ႇလူမ်ႈၵူၼ်းမိူင်း ဢၼ်ဝႃႈၼၼ်ႉ ဢမ်ႇမီးယဝ်ႉ။ ယၢမ်းၵၢင်ၶမ်ႈ/ ၶိုၼ်းၼႆႉ ယဵၼ်သီႇမူတ်း တီႈတႃႈၶီႈလဵၵ်းၼႆႉ။ ပေႃးတေၵႂႃႇ တၢင်းၼွၵ်ႈၼႆၸိုင် ၾူၼ်းလႄႈ ငိုၼ်း ၸိူဝ်းၼႆႉ တိုၼ်းဢမ်ႇပႃးၸပ်းတူဝ်သေဢိတ်းၼၼ်ႉယဝ်ႉ။ လႆႈမႆႈၸႂ်ထိုင်ၵႃႈၼႆႉ။ ပေႃးၵႂႃႇၺႃး မိူဝ်ႈၽွင်း ၶဝ်ၵူတ်ႇထတ်းယူႇၼၼ်ႉ ဢမ်ႇမဵဝ်းၼိုင်ႈၵေႃႈ မဵဝ်းၼိုင်ႈ ၶဝ်တိုၼ်းႁႃလိူင်ႈၼၼ်ႉၶႃႈယဝ်ႉ။ မၢင်ၵေႃႉ ၵေႃႈလွတ်ႈ မၢင်ၵေႃႉၺႃးၺွပ်း”- ၵူၼ်း ၼုမ်ႇပိုၼ်ႉတီႈ တႃႈၶီႈလဵၵ်း လၢတ်ႈၼႄၼင်ႇၼႆ။
တႄႇဢဝ် ဝၼ်းတီႈ 1/2/2022 ဝၢႆးမၢၵ်ႇတႅၵ်ႇ ၼႂ်းပၢင်ၵမ်ႉထႅမ် တပ်ႉသိုၵ်းမၢၼ်ႈ တီႈဝဵင်းတႃႈၶီႈလဵၵ်းယဝ်ႉၼၼ်ႉ။ တႄႇၼၼ်ႉမႃး ၸဵမ်သိုၵ်း/ ပလိၵ်ႈမၢၼ်ႈ ႁူမ်ႈၵၼ် ၶဝ်ႈၵူတ်ႇထတ်းၸွမ်းႁိူၼ်းယေး ၸွမ်းႁွင်ႈၶၢတ်ႈ ႁၢဝ်ႈႁႅင်းမႃးလိူဝ်ၵဝ်ႇ။ ယဝ်ႉၵေႃႈ တင်ႈလၢၼ်ႇၵူတ်ႇထတ်း ၵူၼ်းၵႂႃႇမႃး ၸွမ်းၼိူဝ်သဵၼ်ႈတႃႈသၢႆတၢင်း ၸိူဝ်းၼႆႉ။
“လွင်ႈမၢၵ်ႇတႅၵ်ႇ မိူဝ်ႈဝၼ်းတီႈ 1 ၼၼ်ႉ ထုၵ်ႇလီဝူၼ်ႉယူႇ။ ႁဵတ်းႁိုဝ်လႄႈ မၢၵ်ႇၵႂႃႇတႅၵ်ႇၼႂ်းပၢင်ၼၼ်ႉ ၵူၼ်းသိုၵ်းၶဝ် ပေႃးဢဝ်ႁူမ်ႇလူမ်ႈ ၼႅၼ်ႈ ၼႃပဵၼ်တၢၼ်ႇၼၼ်ႉ ၸဵမ်ၼႂ်းပၢင်/ ၼွၵ်ႈ ၸိူဝ်းၼၼ်ႉ။ ယဝ်ႉၵေႃႈ ၵူၼ်းၵႂႃႇၶိုၼ်ႈႁွတ်ႈ ၵမ်ႈၼမ် ပဵၼ်ၵူၼ်းသိုၵ်းၵဝ်ႇ၊ မေးၼၢင်းၶွပ်ႈၶူဝ်းၵူၼ်း သိုၵ်းၵမ်ႈၼမ်။ ယူႇတီႈႁဝ်းထတ်းတူၺ်းတႄႉ လႅပ်ႈတေၽႅၼ်ၵၢၼ်ၶဝ်ၶိုၼ်းၵေႃႈ ပဵၼ်လႆႈ တင်ႈၸႂ်ႁဵတ်းႁႂ်ႈဝၢၼ်ႈမိူင်းသုၵ်ႉယုင်ႈၼၼ်ႉၵူၺ်း”- ၽူႈတူင်ႉၼိုင် ၼႂ်းတူင်ႇဝူင်း ၵေႃႉၼိုင်ႈ တႃႈၶီႈလဵၵ်း လၢတ်ႈၼႄၽူႈတွႆႇႁွၵ်ႈၼင်ႇၼႆ။
မိူဝ်ႈဝၼ်းတီႈ 1/2/2022 ပဵၼ်ဝၼ်းၶွပ်ႈတဵမ် 1 ပီ သိုၵ်းမၢၼ်ႈယိုတ်းဢႃႇၼႃႇမႃးလႄႈ တီႈတႃႈၶီႈလဵၵ်း ၸတ်းႁဵတ်းပၢင်ၵမ်ႉထႅမ်သိုၵ်းမၢၼ်ႈ တီႈ ၵၢင်ပၢင်ႇသျၢၼ်းယူဝ်းမႃႉ (ရှမ်းရိုးမကွင်း) ၼၼ်ႉသေ မီးလွင်ႈမၢၵ်ႇတႅၵ်ႇၼႂ်းပၢင်ၵမ်ႉထႅမ် တုမ်ႉတိူဝ်ႉသႂ်ႇၽူႈၶဝ်ႈႁူမ်ႈ လႆႈလူႉတၢႆ 2 ၵေႃႉ မၢတ်ႇ ၸဵပ်း 35 ၵေႃႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ