မိူဝ်ႈၼႆႉ ဝၼ်းတီႈ 1/2/2022 ယၢမ်းၵၢင်ၼႂ် မွၵ်ႈ 8 မူင်း သိုၵ်းမၢၼ်ႈ သၶၢၼ်းတိတ်ႉၵူင်း ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈ တႆးပွတ်းႁွင်ႇ ယိုဝ်းမၢၵ်ႇလူင် ဢမ်ႇယွမ်း 10 ၵမ်း ၵူၼ်းၶၢႆၶူဝ်းၼႂ်းၵၢတ်ႇ ၼမ်ႉၶမ်း တူၵ်းၸႂ် တိုၼ်ႇသၢၼ်ႈၵူဝ်ႁႄ ၼႅတ်ႈသိမ်း ၶူဝ်းပိၵ်ႉႁၢၼ်ႉ ပွၵ်ႈႁိူၼ်း ။
ၵူၼ်းၶၢႆၼႂ်းၵၢတ်ႇ ၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ -“လႆႈငိၼ်းသဵင်ၵွင်ႈလူင် ဢမ်ႇယွမ်း 10 ၵမ်းၼႆႉၶႃႈ။ တေႁိုင်မွၵ်ႈ 15 မိၼိတ်ႉ ၼႆႉ။ ၸဝ်ႈႁၢၼ်ႉၶၢႆၶူဝ်း ၸိူဝ်းမႃးပိုတ်ႇဢိတ်းဢွတ်းၵေႃႈ တူၵ်းၸႂ်တိုၼ်ႇသၢၼ်ႈ ဢွၼ်ၵၼ်ၼႅတ်းသိမ်းၶူဝ်း ပွၵ်ႈႁိူၼ်းယေးဢေႃႈ” – ဝႃႈၼႆ။
ဝၼ်းတီႈ 1/2/2022 ၼႆႉ ၼင်ႇႁိုဝ်တေဢမ်ႇပဵၼ် Silent Strike ၼၼ်ႉ သိုၵ်းမၢၼ်ႈ တဵင်ၵႂၢမ်းၼၵ်း ၸီႉသင်ႇ ၵူၼ်းမိူင်းၼမ်ႉၶမ်း ဢမ်ႇပိုတ်ႇႁၢၼ်ႉၶၢႆၶူဝ်းဢမ်ႇလႆႈ ၊ တေပၼ်တူတ်ႈတၢမ်ႇၼႆလႄႈၵူၼ်းမိူင်းၸိူဝ်းလူင်းလၢႆးမိုဝ်းဝႆႉၼၼ်ႉ ၵႃႈလႆႈၵႂႃႇပိုတ်ႇႁၢၼ်ႉ။ ၵူၺ်းၵႃႈ ဢၼ်ၵႂႃႇပိုတ်ႇၶၢႆၶူဝ်းၼႂ်းၵၢတ်ႇ မီးဢိတ်းဢွၼ်ႇၵူၺ်း ၵူၼ်းၼမ်ႉၶၢမ်းလၢတ်ႈ။
